Адыгэ Республикэм и Мафэ ехъулIэу социальнэ-экономикэ хэхъоныгъэхэм адакIоу, спортым ылъэныкъокIи гъэхъагъэу тиIэхэм язэфэхьысыжьхэр тшIынхэр хабзэ. АщкIэ тызэрыгушхон спортсменхэр тиIэх. Мы илъэсым ахэм ащыщхэм дунэе, къэралыгъо ыкIи шъолъыр мэхьанэ зиIэ чемпионатхэм, первенствэхэм, зэнэкъокъухэм медалыбэ къащахьыгъ, республикэм ыцIэ дахэкIэ рарагъэIуагъ. Джащ фэдэу мы аужырэ илъэсхэм спорт инфраструктурэми хэхъоныгъэшIухэр ышIыгъэх.

Спорт лъэпкъ зэфэ­шъхьафхэмкIэ зэхащэрэ зэнэкъокъухэм Адыгеим илIыкIохэм текIоныгъэр ыкIи хагъэунэфыкIырэ чIыпIэхэр къащыдахых. Анахьэу шъхьафит бэнэнымкIэ, самбэмкIэ ыкIи дзюдомкIэ къэгъэлъэгъонышIухэр тиIэх. Боксер ныбжьыкIэхэри ахэм ауж къинэ­хэрэп, къэралыгъом щызэхащэрэ турнирхэм къащахэщых. ЦIыфхэм анахь агу рихьырэ футболым хэщэгъэ клубхэм, кIэлэцIыкIу ыкIи ныбжьыкIэ командэхэм зэрифэшъуашэу зыкъагъэлъагъо. Джащ фэдэу футболымкIэ, волейболымкIэ, баскетболымкIэ, гандболымкIэ, атлетикэ псынкIэмкIэ, дзюдомкIэ, самбэмкIэ, шъхьафит бэнэнымкIэ, теннис цIыкIумкIэ, художественнэ ыкIи спорт гимнастикэмкIэ, боксымкIэ, тхэквондомкIэ, каратэмкIэ, киберспортымкIэ, нэмыкIхэмкIи зэнэкъокъухэр республикэм ирайонхэм ащызэхащэх, сэнаущыгъэ зыхэлъ ныбжьыкIэхэр къыхагъэщых. Адыгеим зэкIэмкIи спорт лъэпкъ 50-м ехъумэ хэхъоныгъэ щашIы.

Мыщ дэжьым анахь мэхьанэшхо зиIэр спорт инфраструктурэм изэтегъэ­псыхьанрэ мы лъэныкъом епхыгъэу Iоф зышIэщтхэм ягъэхьазырынрэ. Олимпийскэ резервым испорт еджапIэхэр, хэушъхьафыкIыгъэ секциехэр, ахэм ащылэжьэщт тренер IэпэIасэхэр тиIэх. Спортым ыкIи физическэ культурэм пыщагъэхэм япчъагъэ нахьыбэ хъуным, ащкIэ амалэу щыIэхэр гъэфедэгъэнхэм рес­публикэм ипащэхэм анаIэ тет. Теннис цIыкIумкIэ шъо­лъыр гупчэм ишIын Мыекъуапэ щаухы, къихьащт илъэсым ипэублэ мыщ фэдэ псэуалъэ Тэхъутэмыкъое районым щатыщт.
Республикэм и Мафэ ехъу­лIэу спорт лъэпкъ зэфэ­шъхьафхэмкIэ зэнэкъокъухэр муниципалитетхэм зэкIэми ащыкIощтых.
МэфэкIэу къэблагъэрэмкIэ тиспортсменхэм, ахэр зыгъэсэрэ тренерхэм тафэгушIо, тапэкIи гъэхъэгъэшIухэр ашIынхэу, лъэгэпIэ инхэм анэсынхэу афэтэIо.