Зыныбжь хэкIотагъэхэм я Мафэ Адыгеим и ЛIышъхьэу КъумпIыл Мурат Хэгъэгу зэошхом иветеранэу, респуб­ликэм инахьыжъхэм ащыщэу, мы илъэсым иублэгъу зыныбжь илъэси 100 хъугъэ Иван Дзюбэ дэжь щыIагъ.

Республикэм ипащэ игъусагъэх АР-м IофшIэнымрэ социальнэ хэхъоныгъэм­рэкIэ иминистрэу Мырзэ Джанбэчрэ Мыекъуапэ имэрэу Геннадий Митрофановымрэ.
Адыгеим и ЛIышъхьэ мэфэкIымкIэ ветераным фэгушIуагъ, шIухьафтын лъапIэхэр ритыгъэх, ипсауныгъэ къыкIимычынэу, шIоу щыIэр къыдэхъунэу фэлъэIуагъ.
«Иван Иван ыкъор, гъэшIэ гъогу мыпсынкIэ къэзыкIугъэ, опыт бай зиIэ, бэ зылъэгъугъэ, бэ зышIэрэ цIыфэу ущыт. Ощ фэдэ цIыф гъэшIэгъонхэр илъэсыбэрэ къытхэтынхэм, щыIэныгъэр, дунаир шIу зэрэшъулъэгъурэр, неущрэ мафэм шъуицыхьэ зэрэтелъыр зэхэтшIэным тэркIэ мэхьанэшхо яI», — къы­Iуагъ КъумпIыл Мурат.
ХьакIэхэм зыгу афихыгъэ бысымым щай ешъонэу КъумпIыл Мурат ыдэжь ригъэблэгъагъ, къызэрэфэгумэкIыгъэм фэшI зэрэфэразэр риIуагъ.

«Тэ, ныбжь хэкIотагъэ зиIэхэм, шIу къытфэзышIэхэрэм, гуфэбэныгъэ къытпэзыгъохыхэрэм сыдигъуи тафэраз. Мурат Къэралбый ыкъор, «тхьауегъэ­псэу» осэIо зыныбжь хэкIотагъэхэм унаIэ ренэу зэратебгъэтырэм, ахэм ящыIэныгъэ узэрэхэлажьэрэм афэшI», — къыIуагъ ветераным.
Иван Дзюбэ 1925-рэ илъэсым щылэ мазэм и 4-м Ставрополь краимкIэ псэупIэу Николина Балка къыщыхъугъ. ИкIэлэцIыкIугъо заом зэпиутыгъ — Свердловскэ хэкум ар агъэкощыгъ. 1943-рэ илъэсым ищылэ мазэ дзэ къулыкъум ащагъ. Ленинград дэтыгъэ пехотнэ училищэу С. М. Кировым ыцIэ зыхьырэр псынкIэу къызеухым, Кенигсберг ащагъ, ыужкIэ Германием щызэуагъ. Я 290-рэ шхончэо дивизием ия 885-рэ шхончэо полк ипулеметнэ взвод икомандирэу заохэм ахэлэжьагъ. ЛIыхъужъныгъэу зэрихьагъэм фэшI Жъо­гъо Плъыжьым иорден, медальхэр къы­фагъэшъошагъэх.
Зэоуж илъэсхэм Иван Дзюбэ дзэ къулыкъур Могилев щихьыгъ. Ишъхьэгъу­сэ хъущт пшъашъэу Валентина Павел ыпхъум ащ щыIукIи, бын унэгъо дахэ зэдашIагъ, пхъоу, къоу къапыфагъэр алъэ тырагъэуцуагъ. Илъэс заулэ тешIагъэу дзэ къулыкъур Мыекъуапэ, етIанэ Астрахань, Баку ащылъигъэкIотагъ. ДзэмкIэ советникэу Мысыр щыIагъ. 1979-рэ илъэсым фронтовикыр запасым кIуагъэ. СССР-м иминистрэхэм я Совет къе­пхыгъэ топогеодезическэ предприятием щы­лэ­жьагъ. Илъэси 10 профсоюз Iофхэм апы­лъыгъ. 1980-рэ илъэсым Мыекъуапэ къэкощыжьыгъ, 1990-м нэс Iахьзэхэлъ обществэу «Адыгпромстроим» граждан зыу­хъумэжьынымкIэ инженерэу щылэжьагъ.
Иван Дзюбэ республикэм и ЛIышъхьэ къыфиIотагъ игупсэхэр лъэшэу къызэрэфэгумэкIыхэрэр, кIэли 2-рэ пхъо­рэлъф 13-рэ зэриIэр, ахэр Москва, Самарэ, Мыекъуапэ зэрэщыпсэухэрэр. 2016-рэ илъэсым къыщегъэжьагъэу ве­тераным ищыкIэгъэ социальнэ фэIо-фашIэхэр фагъэцакIэх. Социальнэ Iофы­шIэм гъунэ къылъифызэ, ащ зэрядкэ ешIы, ренэу тезекIухьэ. Пандемиер къе­мыжьэзэ компьютерыр ыгъэIорышIэн зэрилъэкIырэмкIэ сертификат ветераным къыратыгъагъ.
Иван Дзюбэ республикэм и ЛIышъхьэ къыфиIотагъ Адыгеири, Мыекъуапи ичIыпIэ гупсэ зэрэхъугъэхэр, ащ адыгэхэр, ахэм ялъэпкъ шхыныгъохэр, ямэкъамэхэр, якъашъохэр зэрикIасэхэр. ЩыIэныгъэр шIу зэрилъэгъурэр, шэнышIоу зэрэщытыр, егъэлыегъэ щыIакIэм зызэрэщидзыерэр арэу елъытэ ащ илъэ­си 100 къезыгъэгъэшIагъэр.
Шъугу къэтэгъэкIыжьы зыныбжь илъэс 90-м къехъугъэ нэбгырэ 1293-рэ джыдэдэм Адыгеим зэрэщыпсэурэр. Ахэм ащыщэу 24-мэ аныбжь илъэси 100-м нэсыгъ. ЛIэшIэгъу ныбжьым шъхьадэкIыгъэхэри ахэтых.
АР-м и ЛIышъхьэ
ипресс-къулыкъу