Лъэс зекIонымкIэ Iофтхьабзэу «Жъогъо 12» зыфиIорэр Мыекъуапэ щэкIо. Адыгэ Рес­публикэм и Мафэ ар фэгъэхьыгъ, шъолъырым икъэлэ шъхьаIэ физическэ культурэмкIэ ыкIи спортымкIэ и Комитет икIэщакIу.

ЗэхэщакIохэм зэрагъэнэфа­гъэу, марафоным хэлажьэхэрэм мэфи 7-м лъэбэкъу мини 100 къакIун фае. Зызыушэтыхэрэр зэнэкъокъу гъэшIэгъонхэм, викторинэхэм ыкIи квестхэм ахэлажьэх, ахэм жъуагъохэр къащахьых. ЗэрэхъурэмкIэ, гъэцэкIэн 12 къапыщылъ. Мафэм зэхащэрэ викторинэхэр спортсмен цIэ­рыIохэм, тренерхэм афэгъэхьыгъэх. Пчыхьэм квестхэр рагъэ­кIокIых, ахэм япхыгъэ гъэцэкIэнхэм Адыгеим ичIыпIэ анахь лъэ­гъупхъэхэр, спорт псэуалъэхэр къащыбгъотынхэ, селфи шIыкIэм тетэу сурэт защытепхыжьын фае. Ахэр зыщызэхащэрэ чIыпIэхэр ренэу зэблахъух.

Джырэ уахътэм ехъулIэу нэбгыри 10-мэ лъэбэкъу мини 100 къакIугъ. А пшъэрылъыр апэу зыгъэцэкIагъэр Мыекъуапэ щып­сэурэ Елена Зезюкинар ары. Iофтхьабзэм зэкIэмкIи нэбгыри 194-рэ хэлажьэ. Ахэр Мыекъуапэ, республикэм ипсэупIэхэм ыкIи Урысыем ишъолъыр зэфэшъхьафхэм ялIыкIох. Зэрэзэнэкъо­къухэрэм, зызэраушэтырэм ада­кIоу япсауныгъэ агъэпытэ, нэIуасэ зэфэхъух.