Ставрополь краим гандболымкIэ ифедерацие и Кубок икъыдэхын фэгъэхьыгъэ зэнэкъокъоу илъэс къэс зэхащэрэм Мыекъуапэ икомандэ хэлэжьагъ ыкIи хагъэунэфыкIырэ чIыпIэ къыщыдихыгъ.

Зыныбжь илъэс 14-м емыхъугъэ пшъашъэхэр ары зызыушэтыгъэхэр. Мыекъуапэ, Тольятти, Волгоград, Ростов-на-Дону, Краснодар ыкIи Ставрополь якомандэхэр текIоныгъэм фэбэнагъэх. Адыгэ Республикэм ыцIэкIэ тур­нирым хэлэжьагъэх спорт еджапIэу С.М. Джэнчатэм ыцIэ зыхьырэм зыщызыгъасэхэрэр. Мые­къуапэрэ Ставропольрэ анэмыкIэу адрэ къалэхэм командэ тIурытIу къагъэлъэгъуагъ. Ахэр зэкIэмкIи 10 хъущтыгъэх, купитIоу гощы­гъагъэх.

Мыекъуапэ илIыкIохэм зы ешIэгъу ашIуахьыгъ, Волгоград игандболисткэхэр 11:27-у къатекIуагъэх. Ау тикомандэ Рос­тов-на-Дону (19:18), Краснодар (16:13) ыкIи Ставрополь (31:15) анахь лъэшыгъ ыкIи купым ятIонэрэ чIыпIэр щиубытыгъ. Ащ ыуж ящэнэрэ чIыпIэм фэбанэзэ Тольятти икомандэ IукIагъ. ЕшIэ­гъур гъэшIэгъонэу, узIэпищэу кIуагъэ ыкIи охътэ шъхьаIэр 20:20-у аухыгъ. ПенальтикIэ Адыгеим икомандэ текIоныгъэр къыдихыгъ ыкIи ащ хэтхэм джэрз медальхэр къафагъэшъошагъэх. Мыекъуапэ икомандэ иешIэкIо анахь дэгъоу къыхагъэщыгъэр Виктория Баховар ары. ЯтIонэрэ чIыпIэр Волгоград илIыкIохэм къыдахыгъ, Краснодар икомандэ пэрытны­гъэр ыубытыгъ.
Тигандболисткэ ныбжьыкIэхэм хагъэунэфыкIырэ чIыпIэ къызэрэдахыгъэмкIэ тафэгушIо, тапэкIи гъэхъэгъэшIухэр ашIынхэу афэтэIо.