Тинахьыжъхэм аныбжь емылъытыгъэу щынэгъончъэу зэрэпсэухэрэр зэхашIэу, щыIэныгъэм илъэныкъо пстэуми ахэщагъэхэу, яунагъуи, къэралыгъоми яIэпыIэгъу алъыIэсэу щытын фае. Мы Iофыр дэгъоу ыкIи гъэшIэгъонэу Красногвардейскэ районым щызэхэщагъ. ЦIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэм мафэрэ зыщалъыплъэхэрэ иотделение ипащэу Марина Котовам «Адыгэ макъэр» гущыIэгъу фэхъугъ.

— Анахьэу тынаIэ зытедгъэтын фаер нахьыжъхэр пенсием зыкIохэкIэ ящыIэныгъэ къызэтемыуцоу, язакъоу унэм имысынхэм фэшI лъэныкъо зэфэ­шъхьафхэм афэIорышIэрэ Iоф­тхьабзэхэр афызэхэтщэнхэр ары. Ащ тегъэпсыхьагъэу федеральнэ проектэу «Унагъор» зыфиIорэм къыдыхэлъытэгъэ проектэу «Нахьыжъхэр» Адыгеим щыпхырыщыгъэным фэшI шъо­лъыр программэу «ГъэшIэ кIыхьэм ыкIи чаным» игъэцэкIэн мы илъэсым ищылэ мазэ рагъэ­жьагъ. Тирайони ар чанэу зэрэщызэшIотхыщтым ыуж тит, — къыIуагъ Марина Котовам.
Программэм имурадыр псауныгъэр зыгъэпытэрэ, социальнэ, творческэ амалхэр агъэфедэхэзэ, зыныбжь хэкIотагъэхэм, сэкъатныгъэ зиIэхэм ящыIэныгъэ изытет нахьышIу ыкIи ягъашIэ нахь кIыхьэ шIыгъэнхэр ары.
Адыгеим и ЛIышъхьэу КъумпIыл Мурат исоциальнэ нэкIубгъо къызэрэритхагъэмкIэ, тинахьыжъхэм лъытэныгъэ афэтшIыным хэти ицIыкIугъом щегъэжьагъэу фапIугъ.
— Тикъэралыгъуи, Адыгейми ащыпсэурэ лъэпкъ пстэуми ар яхэбзэшIу, — къыIуагъ ащ. —ЛIэшIэгъухэм азыфагу илъ зэпхыныгъэр, обществэм игу­шъхьэбайныгъэхэр гъэпытэгъэнхэр, шIэныгъэу аIэкIэлъымкIэ зэдэгощэнхэр сыдигъуи нахьыжъхэм апшъэ дэкIы.

Мафэрэ зыныбжь хэкIотагъэхэм зыщалъыплъэхэрэ отделением нэбгырэ 60-м ехъу къекIуалIэ. Ахэм аныбжь илъэс 60-м къыщегъэжьагъэу, анахьы­жъыр илъэс 87-м нэсыгъ. Шъхьадж ыныбжь, ыкIуачIэ, ипсауныгъэ елъытыгъэу программэ гъэнэфагъэ фызэхагъэ­уцо. Зыныбжь хэкIотагъэхэм япсауныгъэ агъэпытэным, тицIыфхэм ягъашIэ нахь кIыхьэ хъуным фэIорышIэх спортзалхэм, шахмат клубым, культурэм иунэхэм, тхылъеджапIэхэм, музейхэм ащызэхащэрэ Iофтхьабзэхэр, джащ фэдэу чIыпIэ дахэхэр къарагъэкIухьэх. Зэхэубытэгъэ гупчэм иIофышIэхэм анаIэ зытырагъэтыхэрэм ащыщ мэхьанэ зиIэ мэфэкIхэм зыныбжь хэкIотагъэхэр ахэгъэлэжьэ­гъэнхэр.
Программэ ыкIи Iофтхьэбзэ зэфэ­шъхьафхэу афызэхащэхэрэр тинахьыжъхэм лъэшэу агу зэрэрихьыхэрэм ишыхьат гущыIэгъу тызыфэхъугъэхэм къаIуагъэр.
Зэпымыоу отделением къакIо­хэрэм ащыщ Манакова Раиса Никонор ыпхъур:
«Мы чIыпIэм ныбджэгъукIэхэр къыщызгъотыгъэх ыкIи сикIэсэ Iэпэщысыхэм яшIынкIэ амалышIухэр сIэкIэлъ хъугъэ. Мастер-класс зэфэшъхьафхэм та­хэлажьэ, зызэрэдгъэпсэфырэм имызакъоу, кIэ горэ зэдгъэшIэным тыпылъ. Сигуапэу зекIо Iоф­тхьабзэхэми сахэлажьэ».
Валентина Дементьевар мыщ къызыкIорэм къыщегъэжьагъэу игумэкIыгъо­хэм ащыщхэр дэгъэзыжьыгъэхэ хъугъэ.
— Пенсием сызыкIокIэ сищыIэныгъэ ащ къыщыуцунэу къысшIошIыщтыгъ. Сизакъоу унэм сиубытагъэ хъумэ, сшIэн горэ къэзгъотын Iоу сшIагъэп. Мы гупчэм сыкъэкIонэу зесэгъа­жьэм, джыри сыныбжьыкIэу зыслъытэжьыгъ. ДжэгукIэ зэфэшъхьафхэм сахэлажьэ, тимафэхэм мэхьанэ яIэ зышIырэ нэмыкI Iофтхьабазэу тфызэхащэхэрэри бэ, — еIо Валентинэ.
Грантыр, проектыкIэр
Нэжъ-Iужъхэм яуахътэ шIуагъэ хэ­лъэу, шъхьэзэкъоныгъэм зэлъимыштэхэу агъэ­кIоным фэшI шъолъыр къэралыгъо программэ закъор арэп къызфагъэфедэрэр. ЦIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Красногвардейскэ районым щыIэм иамалхэм нахь заушъомбгъуным фэшI грантхэр къыдэхыгъэнымкIэ зэнэкъокъухэм ахэлажьэх. Мары бэмышIэу проектыкIэу «Новый путь» зыфиIорэм игъэцэкIэн ащ щырагъэжьагъ. Ар къадэзгъэхъугъэр фондэу Тимченкэм ыцIэ зыхьырэм изэIухыгъэ зэнэкъокъоу «Сила внимания» зыфиIорэм хэлажьэхи, грантэу сомэ мин 455-рэ къызэрэдахыгъэр ары. Ащ иавторыр зыныбжь хэкIотагъэхэм мафэрэ зыщалъыплъэхэрэ отделением ипащэу Марина Котовар ары.
Зыныбжь хэкIотагъэхэу ыкIи сэкъат­ныгъэ зиIэхэу IэпыIэгъу зищыкIагъэхэм инклюзивнэ мастерскоир къафызэIуахынымкIэ проектэу «Новый путь» зыфиIорэр амалышIу хъущт. Маринэ мы проектыр ыгъэхьазырынэу ыгу къызыкIыгъэр блэкIыгъэ илъэсыр ары. На­хьыжъхэм ямызакъоу, сэкъатныгъэ зиIэхэм апае ащ культурнэ-зыгъэпсэфыгъо программэ гъэшIэгъон ыгъэхьазыри, сэкъатныгъэ зиIэхэм районымкIэ яобществэ зэзэгъыныгъэ дишIыгъ ыкIи ащ хэтхэр къыхигъэлэжьагъэх. Нэужым ахэм ар агу зэрэрихьыгъэр хагъэунэфыкIыгъ ыкIи нахьыбэрэ къэкIонхэу къыкIэлъэIугъэх. Ащ диштэу проектыр ыгъэпси, зэнэкъокъум ыгъэхьыгъ ыкIи текIоныгъэ къыщыдихыгъ.
Мы уахътэ етIупщыгъэу инклюзивнэ мастерскоир зэтырагъэпсыхьэ. Куп-купэу ащ къекIолIэщтых, лъэныкъо зэфэ­шъхьафхэмкIэ Iоф адашIэщт: «Психология общения», «Азбука здоровья», «Кругозор», «Навигатор» (компьютернэ шIэныгъэр), «Скандинавская ходьба», «Рукоделие», «Правополушарное рисование», «Музыкальная шкатулка», «Встреча поколений», «Волонтерство» зыфиIохэрэр. Мыхэм анэмыкIэу мазэм зэ ахэр зекIо ащэщтых, республикэм ичIыпIэ дахэхэр къарагъэплъыхьащтых.
— Тинахьыжъхэм яуахътэ шIуагъэ къытэу агъэкIоным, щыIэныгъэм кIэдгъэгушIунхэм, зэдэгущыIэгъухэр адэтшIынхэм, культурнэ ыкIи социальнэ шIоигъоныгъэу яIэхэр щыIэныгъэм щыпхырытщынхэм тапэкIи тыпылъыщт, — хигъэунэфыкIыгъ Марина Котовам.
Грант IэпыIэгъум ишIуагъэкIэ мастерскоим чIэтыщт массаж зыщашIырэ тIысыпIэр, караоке-системэр, сканди­нав­скэ зекIонымкIэ бэщхэр, фитнес Iэ­мэ-псымэхэр, творческэ егъэджэнхэм апае пкъыгъо зэфэшъхьафхэр къащэфыгъэх.
Iэшъынэ Сусан.
.