Мыекъуапэ шэмбэт шIыхьафым хэлажьэ
Iоныгъор къызихьагъэм къыщегъэжьагъэу Урысые экологие Iофтхьабзэу «Зеленая Россия» зыфиIорэм къыдыхэлъытагъэу Адыгеим икъэлэ шъхьаIэ шэмбэт шIыхьафхэр щэкIох. Ащ къэлэ къулыкъухэм, общественнэ организациехэм ялIыкIохэр, гуфакIохэр ыкIи къэбзэныгъэм фэгумэкIыхэрэ цIыфхэр хэлажьэх.
Паркхэм, скверхэм, нэмыкI зыгъэпсэфыпIэ чIыпIэхэм, гъогубгъухэм, къэлэ дэкIыпIэ-дэхьапIэхэм хэбзэнчъэу ащыратэкъугъэ хэкIыр шIыхьафым хэлажьэхэрэм аугъои.
БлэкIыгъэ шэмбэтым къэлэдэс нэбгырэ мин пчъагъэ шIыхьафым къекIолIагъ.
— Къэбзэныгъэм фэIорышIэрэ Iофтхьабзэм къыдыхэлъытагъэу хэбзэнчъэу цIыфхэм ратэкъухьэгъэ пыдзэфэ кубометри 110-м ехъу дащыгъ, хэкIитэкъупIэ ашIыгъэ чIыпIэхэр агъэкъэбзагъэх. Фэтэрыбэу зэхэт унэхэм ящагухэм ыкIи чIылъэ унэхэм апэIулъ чIыпIэхэм цIыфхэм гъэкъэбзэн Iофтхьабзэхэр ащызэшIуахыгъэх. Тикъалэ икъэбзэныгъэ лъыплъэнхэу сыкъяджэ. Мыекъуапэ нахь кIэракIэ зэрэхъущтыр нэбгырэ пэпчъ изекIуакIэ елъытыгъ, — хигъэунэфыкIыгъ Мыекъуапэ имэрэу Геннадий Митрофановым.