ФутболымкIэ Урысыем изэнэкъокъу иятIонэрэ лигэ икупэу «Б-м» хэт «Зэкъошныгъэм» яплIэнэрэ ешIэгъу хъугъэу текIоныгъэр къыдихышъурэп. Первенствэм иятIонэрэ едзыгъо къыдыхэлъытагъэу ар «Шъачэ-2-м» IукIагъ, пчъагъэр зэфэдизэу ар аухыгъ.

«Шъачэ-2» — «Зэкъошныгъ» — 0:0 (0:0).
«Шъачэ-2-м» хэтыгъэх: Д. Силиевыр (къэлэпчъэ­Iут), А. Кошман, П. Платоновыр, С. Калиновыр, М. Носатэр, А. Мециевыр, А. Янгаевыр, Ш. Шариповыр (А. Филимоновыр), Д. Шиловыр, А. Балкизовыр, Е. Тоцкэр.
Тренер шъхьаIэр — К. Гашичевыр.
«Зэкъошныгъэм» щешIагъэх: Т. Хачировыр (къэлэпчъэIут), М. Гаджимагомедовыр, М. Къэбжыр (С. Черджиевыр), Т. Мохбалиевыр, К. Юшко, К. Антонец, З. Коблыр, Т. Хьэхыр, Г. Абдуллаевыр (Т. Едыджыр), А. Делэ­къор, Е. Рагулькиныр.
Тренер шъхьаIэр — С. Мирошниченкэр.
Командэхэм къэлапчъэм Iэгуа­ор дадзагъэп нахь мышIэми, зэIукIэгъур гъэшIэгъонэу кIуагъэ. Апэрэ такъикъхэм къащегъэжьагъэу «Зэкъошныгъэр» ыпэкIэ илъыщтыгъ, ау пчъагъэр къызэIуи­хын ылъэкIыгъэп. Тифутболистхэр текIоныгъэм нахь пэблэгъагъэх, ащ къыхэкIыкIэ зэIукIэгъур 0:0-у зэраухыгъэм ахэр ыгъэрэзагъэ­хэп.
— Командэр зэрешIагъэр сыгу рихьыгъ, ау къэлап­чъэм Iэгуаор дэтыдзэнымкIэ амалэу тиIэхэр зэрэтымгъэфедэхэрэм сегъэгумэкIы. Мы лъэныкъом тынаIэ нахь тедгъэтыщт, ыпэкIэ тылъыкIотэщт, — къыIуагъ зэфэхьысыжьхэр къышIызэ «Зэкъошныгъэм» итренер шъхьа­Iэу Сергей Мирошниченкэм.
Я 2-рэ турым изэфэхьысыжьхэр:
«Шъачэ-2» — «Зэкъош­ныгъ» — 0:0, «Ангушт» — «Рубин Ялта» — 1:0, «Спартак-Налщык» — «Астрахань» — 0:1, «Дина­мо-2» — «Легион» — 2:2.
Джырэ уахътэм турнир таблицэм «Астрахань» пэрытныгъэр щиIыгъ, «Шъачэ-2-р» ятIонэр, «Зэкъошныгъэм» ящэнэрэ чIыпIэр еубыты. Зичэзыу ешIэгъур тикомандэ чъэпыогъум и 4-м Мыекъуапэ щыриIэщт, «Динамо-2-р» тихьакIэщт.
Командэхэр зыдэщыт чIыпIэхэр ыкIи очко пчъа­гъэу рагъэкъугъэр:

1. «Астрахань» — 43.
2. «Шъачэ-2» — 42.
3. «Зэкъошныгъ» — 38.
4. «Рубин Ялта» — 36.
5. «Легион» — 30.
6. «Ангушт» — 26.
7. «Спартак-Налщык» — 17.
8. «Динамо-2» — 3.