Олимпийскэ чемпионэу, спортымкIэ заслуженнэ мастерэу Арсен Галстян ишIухьафтынхэр зэрылъ Урысые зэнэкъокъур шIэхэу Мыекъуапэ щаублэщт. Зыныбжь илъэс 18-м шIомыкIыгъэ кIалэхэр ыкIи пшъашъэхэр ащ хэлэжьэщтых. МФОК-у «Ошъутенэм» испортзал Iофтхьабзэр щыкIощт.

Къэралыгъом ишъолъыр зэфэшъхьафхэм спортсмен 300-м ехъу къарыкIынхэу зэхэщакIохэм агъэнафэ. ТекIоныгъэр ыкIи хагъэунэфыкIырэ чIыпIэхэр къыдэзыххэрэм кубокхэр, медальхэр ыкIи дипломхэр афагъэшъошэщтых.
ПэшIорыгъэшъэу зэрагъэнэфагъэмкIэ, турнирыр чъэпыогъум и 2 — 3-м рагъэкIокIыщт. Мы спорт лъэпкъыр зыгу рихьыхэрэр зэхэщакIохэм рагъэблагъэх, зэнэкъокъухэм шъуяплъыным ыпкIэ лъышъу­тын ищыкIагъэп.