Адыгеим щыщ бзылъфыгъэу къэралыгъом ищынэгъончъагъэ пэшIуекIорэ Iофтхьабзэхэм ахэлэжьэнхэу цIыфхэм къяджэщтыгъэм иIоф хьыкумым зэхифыгъ.

Мыекъуапэ щыщ Татьяна Москаленкэм иIоф Мыекъопэ къэлэ хьыкумыр зыхаплъэм, Урысыем и Уголовнэ кодекс ия 280.4-рэ статья ия 2-рэ Iахь ыкIи ия 207.3-рэ статья ия 2-рэ Iахь къадэлъы­тэгъэ бзэджэшIагъэхэмкIэ мысэу ылъы­тагъ.
ЗэрагъэунэфыгъэмкIэ, Т.М. Москаленкэм социальнэ хъытыоу «ВКонтакте» зыфиIорэм щыриIэ нэкIубгъом хэушъхьа­фыкIыгъэ дзэ операциеу Украинэм щызэхащагъэм пэшIуекIонхэу, мобилизацием епхыгъэ Iофтхьабзэхэм, дзэ комиссариатхэм яIофшIэн пэрыохъу афэхъунхэу цIыфхэм къызщяджэхэрэ видеоматериалхэр къыригъэхьагъэх. Ащ имызакъоу, Урысые дзэхэм Украинэм щыкIорэ зэо-зэпэуцужьым чIэнагъэу щашIыгъэхэм афэгъэхьыгъэ къэбар нэпцIхэр ытIупщыщтыгъэх.
ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ следствиехэмкIэ иотдел уголовнэ Iоф къызэIуихи, зэхифыгъ.
Мыекъопэ къэлэ хьыкумым Т.М. Мос­каленкэр мысэу ылъытагъ ыкIи илъэси 5-рэ зы мазэрэ хьапс ­тырилъхьагъ.
Хьыкумым рихъухьагъэм кIуачIэ иIэ хъугъэ.