АР-м тыкъэзыуцухьэрэ дунаим икъэухъумэнкIэ ыкIи чIыопсым икъэкIуапIэхэмкIэ и ГъэIорышIапIэ экологием лъыплъэгъэнымкIэ испециалист шъхьаIэ уголовнэ Iоф къыфызэIуахыгъ.

ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ иIофышIэхэм тыкъэзыуцухьэрэ дунаим икъэухъумэнкIэ ыкIи чIыопсым икъэкIуа­пIэхэмкIэ шъолъыр ГъэIорышIапIэм испециалист къуалъхьэ къаIихыгъэу къаубытыгъ.
Урысыем и Следственнэ комитет иследственнэ гъэIорышIапIэу АР-м щыIэм щынэгъончъэнымкIэ Федеральнэ къулыкъум АР-мкIэ и ГъэIорышIапIэ иIоф­ы­шIэхэм къаугъоигъэ материалхэм къа­пкъырыкIызэ уголовнэ Iоф къызэIуи­хыгъ.
БзэджэшIагъэр зэрихьагъэу зэгуцафэхэрэм 2021-рэ илъэсым имэкъуогъу мазэ къыщыублагъэу 2025-м ищылэ нэс унэе предпринимателым уплъэкIунхэр фызэхамыщэнхэм фэшI сомэ мин 500-м ехъу къуалъхьэу къы­Iихыгъ.
Мы уахътэм зэхэфынхэр макIох, бзэджэшIагъэр зэрихьаным лъапсэ фэхъугъэр агъэунэфы.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу