Адыгеим хэгъэгу кIоцI IофхэмкIэ и Министерствэ республикэм щыпсэухэрэм агу къегъэкIыжьы гумэкIыгъо хэфагъэхэмэ е бзэджэшIагъэ къадызэрахьагъэмэ зэрэзекIонхэ фаер.

ЦIыфым ифитыныгъэхэр аукъуагъэ­хэмэ е ащ ылъэныкъокIэ бзэджэшIагъэ зэрахьагъэмэ псынкIэу полицием макъэ рагъэIун фае.
БзэджэшIагъэу зэрахьагъэхэм ыкIи административнэ хэбзэукъоныгъэхэм афэгъэхьыгъэ тхьаусыхэ тхылъхэр полицием иIофышIэхэм зэраIэкIэбгъэхьан плъэкIыщт шIыкIэхэр:
— цIыфыр ежь-ежьырэу Адыгэ Республикэм хэгъэгу кIоцI IофхэмкIэ и Министерствэ е къалэхэм ыкIи районхэм адэт полицием иотделхэм якIолIэныр;
— хэгъэгу кIоцI IофхэмкIэ къулыкъухэм яIэ сайтхэмкIэ;
— телефонэу 02-мкIэ (мобильнэмкIэ — 102-рэ).
ЦIыфэу IэпыIэгъу зищыкIагъэм иIоф зытетыр тхьапэм тетхагъэу аритын фит. Джащ фэдэу хабзэу щыIэм къызэрэдилъытэу, ащ къыщышIыгъэр къыIотэ къодыеми икъущт.
Адыгэ Республикэм хэгъэгу кIоцI IофхэмкIэ и Министерствэрэ муниципитетхэм ащыIэ полицием иотделхэм ядежурнэ къулыкъухэмрэ яIофышIэхэм чэщи мафи къяолIэрэ цIыфхэм ятхьаусыхэ тхылъхэр къаIахынхэ ыкIи джащ лъыпытэу оперативникхэмрэ следовательхэмрэ къыхагъэлажьэхэзэ Iофтхьабзэхэр зэрахьанхэ фае.

Электроннэ шIыкIэр умыгъэфедэу, ор-орэу полицием иотдел укIон хъумэ, пас­портыр зыдэпIыгъын фае. ТелефонымкIэ утеомэ плъэкъуацIэ, пцIэ, уятэ ыцIэ, узыщыпсэурэ чIыпIэр ыкIи телефоныр япIонхэу щыт.
Плъэгъугъэмрэ бгъэунэфыгъэмрэ полицием иIоф­ы­шIэхэм къафэпIуа­тэмэ, бзэджэшIагъэр зезыхьагъэхэр нахь псынкIэу къыхагъэщыщтых ыкIи ахэм пшъэ­дэкIыжь арагъэ­хьыщт. НэпцI къэ­бар полицием зыIэкIэбгъа­хьэкIэ уголовнэ пшъэ­дэкIыжь уагъэхьын алъэкIыщт.
Полицием иотдел укIуагъэу тхьаусыхэ тхылъыр зыптырэм, дежурнэ къулыкъум иIофышIэхэм ар зэрэпIахыгъэр къэзыгъэнэфэрэ талоныр къыуатын фае. Ащ итхагъэмкIэ тхьаусыхэ тхылъыр зэрэзэхафырэм защыбгъэгъозэн плъэкIыщт.

Гъомлэшк Байзэт.