Адыгеим и ЛIышъхьэу КъумпIыл Мурат компаниеу ССК-м къыфэгъэзэгъэ псэолъэшIыпIэхэу «Зэкъошныгъ», «Долина» зыфиIохэрэм ащыIагъ.

ПсэолъэшIыпIэу «Зэкъошныгъэр» къалэм икъыблэ-къохьэпIэ лъэныкъокIэ щыI, псэупIэ комплексышхоу «Яблоневэм» ар пэгъунэгъу. Ащ къыпэбла­гъэу гурыт еджэпIакIэр, кIэлэцIыкIу IыгъыпIэр, псауныгъэр зыщагъэпытэрэ физкультурэ комплексэу «Ошъутенэр» щытых, теннис цIыкIумкIэ шъолъыр гупчэри агъэпсы. 2023-рэ илъэсым ащ ишIын фежьагъэх. Къат 12-у зэтетыщт, фэтэр 550-рэ зыхэтыщт унэм гектар 1,5-рэ зэлъиубытыщт. Автомобиль уцупIэхэр, зыгъэпсэфыпIэхэр, кIэлэцIыкIу, спорт джэгупIэхэр комплексым хэхьащтых.
Проектэу «Долина» зыфиIорэм 2024-рэ илъэсым Iоф дашIэу рагъэжьагъ. Мыекъуапэ итемыр лъэныкъо ар щагъэ­псы, фэтэр мини 3,8-рэ фэдиз зыхэ­тыщт унэ 16-мэ гектар 24-рэ зэлъаубытыщт. Джащ фэдэу комплексым хахьэу нэбгырэ 240-мэ ателъытэгъэ кIэлэцIыкIу IыгъыпIэрэ нэбгырэ 1100-мэ ателъытэгъэ еджапIэрэ ашIыщтых.

Республикэм и ЛIышъхьэ IофшIэнхэр зэрэкIорэм зыщигъэгъозагъ, псэолъэшI­хэмрэ АР-м псэолъэшIынымкIэ, тран­спортымкIэ, псэупIэ-коммунальнэ, гъогу хъызмэтымкIэ и Министерствэ ипащэрэ инфраструктурэ IофыгъохэмкIэ адэгущыIагъ, чIыпIэхэм язэтегъэпсыхьанкIэ, социальнэ псэуалъэхэм яшIынкIэ пшъэ­рылъхэр къафигъэнэфагъэх.
«Лъэпкъ проектэу «ЩыIэны­гъэм пае инфраструктурэр» зыфиIорэм тапашъхьэ пшъэрылъ къырегъэуцо унэхэр нахьыбэу тшIынэу. Унэхэр нахьыбэу ашIы къэс псэолъэшIыным пылъхэри яIоф нахь егугъущтых, IофшIэпIакIэхэр щыIэ хъущтых, фэ­гъэкIотэныгъэ зиIэ цIыфхэм социальнэ унэхэр аратыщтых. Ау ащ дакIоу чIыпIэхэр зэдиштэу зэтегъэпсыхьэгъэнхэм иIофыгъуи зэшIотхын фае. Джащ пае ахэр дгъэнафэхэ зыхъукIэ, псэолъэшIынымкIэ проектхэм гъэсэныгъэмкIэ, псауныгъэм икъэухъумэнкIэ, спортымкIэ псэуалъэхэр хэтэгъахьэх цIыфхэр чыжьэу мыкIохэу яфэIо-фашIэхэр къафагъэцэкIэнхэм фэшI», — къыIуагъ АР-м и ЛIышъхьэ.
Мы мафэм КъумпIыл Мурат аэропортым зэлъиубытыщтыгъэ чIыпIэу псэупIакIэхэр зыщашIырэми щыIагъ. Сабыибэ зэрыс унагъохэм чIыгу Iахьхэр мыщ къащаратыгъэх. Республикэ бюджетым имылъкукIэ инженер коммуникациехэр мыщ щагъэпсыгъэх, гъогухэр щашIыгъэх. Микрорайоным унэе унэхэр шIукIаеу щагъэпсыгъэх.
АР-м и ЛIышъхьэ
ипресс-къулыкъу къытырэ
къэбархэмкIэ ЛIышэ Саныет.