Лъэпкъ шъуашэр непэрэ щыIакIэм зэрэдиштэрэм фэгъэхьыгъэ шъолъыр Iэнэ хъурае мы мафэхэм Мыекъопэ къэралыгъо технологическэ университетым щыкIуагъ.

«Лъэпкъ шъуашэм ихудожественнэ хабзэхэр: культурнэ лъэныкъоу непэрэ щыIакIэм ащ щиубытырэр» зыфиIорэм Санкт-Петербург, Москва, Адыгеим идизайнерхэр, шIэныгъэлэжьхэр, ушэта­кIохэр, студентхэр хэлэжьагъэх. ХьэкIэ гъэшIуагъэу къекIолIагъ Адыгэ Респуб­ликэм культурэмкIэ изаслуженнэ Iофы­шIэу, художник-модельерэу, искусствэм ылъэныкъокIэ АР-м и Къэралыгъо шIухьафтын илауреатэу СтIашъу Юрэ.
Мыекъопэ къэралыгъо технологическэ университетыр, Урысые культурологие обществэр ыкIи Адыгэ Респуб­ликэм и Лъэпкъ музей Iофтхьабзэм кIэщакIо фэхъугъэх. Лъэпкъ шъуашэм итарихъ, ар непэрэ щыIакIэм зэрэдиштэрэм тегущыIэгъэныр ыкIи тиобществэ чIыпIэу щиубытырэр гъэунэфыгъэныр ары пшъэ­рылъ шъхьаIэу ащ иIагъэр.
Зэхэсыгъор КIэдэкIое Нафсэт зэрищагъ. Пэублэм СтIашъу Юрэ къэзэрэугъоигъэхэм шIуфэс къарихыгъ ыкIи иIофшIагъэхэм афэгъэхьыгъэу къафиIотагъ.
Лъэпкъ шъуашэр лъэныкъо зэфэшъхьафхэмкIэ къагъэлъэгъуагъ, ащ мэхьанэу иIэр къыраIотыкIыгъ. Ар непэрэ щыIакIэм щыщ зэрэхъугъэм, ижъырэ шъуашэм икъэухъумэнкIэ гумэкIыгъоу къэуцухэрэм, джырэ дизайнер проектхэм агъэфедэрэ пкъыгъохэм, дышъэидэм ащ чIыпIэу щиубытырэм, нэмыкIхэм къэзэрэугъоигъэхэр атегущыIагъэх.
Лъэпкъ шъуашэхэм Iоф адэзышIэхэу Санк-Петербург, Москва къарыкIыгъэхэм, республикэм щыщхэм яIоф­шIагъэхэр къагъэлъэгъуагъэх.
Iэнэ хъураем хэлэжьагъэхэр Лъэпкъ музеим щыIагъэх, экспозициехэр зэрагъэлъэгъугъэх, МКъТУ-м щеджэрэ студентхэмрэ къычIитIупщыгъэхэмрэ къагъэ­хьазырыгъэ шъуашэхэм яплъыгъэх. Евгений Шварц иунэ нэужым зэрагъэлъэгъугъ, адыгэмэ къахэкIыгъэ иорданскэ сурэтышIэу Зейны Эль-Саид икъэгъэлъэгъо­нэу «Коды родной культуры» зыфиIорэм нэIуасэ зыфашIыгъ, джащ фэдэу Еутых Асе иIэшIагъэхэр зыщызэгъэуIугъэхэ Дышъэ ордэунэм щыIагъэх.
ДЕЛЭКЪО Анет.