Адыгэ Республикэм изаслуженнэ журналистэу, тиIоф­шIэгъугъэу, Адыгэ Хасэм хэтыгъэу ЕмтIылъ Нурбый ишIэжь фэгъэхьыгъэ зэнэкъокъу самбэмкIэ спорт еджапIэм Iоныгъом и 27-м щыкIуагъ. Ащ Адыгэ Хасэр кIэщакIо фэхъугъ.

Шъугу къэдгъэкIыжьын, ЕмтIылъ Нурбый 1982-рэ илъэсым къыщыублагъэу опсэуфэ (илъэситIум ехъукIэ узэкIэ­Iэ­бэжьымэ идунай ыхъожьыгъ) «Адыгэ макъэм» щылэжьагъ. А уахътэм къыкIоцI «АР-м изаслуженнэ журналист» зыфиIорэ щытхъуцIэм имызакъоу журналистикэм ылъэныкъокIэ ЛIышъхьэм ишIухьафтын къыфагъэшъошагъ, медаль ыкIи щытхъу тхылъыбэ къылэжьыгъ. Культурэм, искусствэм афэгъэхьыгъэу зэрытхэщтыгъэм дакIоу, мафэ къэс спорт нэкIубгъо ыгъэхьазырыщтыгъ. Сыд фэдэрэ спорт лъэпкъи хэт цIыфхэм журналистыр дэгъоу ашIэщтыгъ, пстэуми яныбджэгъушIугъ. Ащ епхыгъэу респуб­ликэм щызэлъашIэрэ спортсмен цIэры­Iохэу Беданэкъо Рэмэзанрэ Бастэ Сэлымрэ ягукъэкIыкIэ илъэс къэс Нурбый ишIэжь фэгъэхьыгъэ спорт зэнэкъо­къухэр рагъэкIокIынхэу Адыгэ Хасэм тыриубытагъ.
Шэмбэт мафэм самбэмкIэ зэнэкъо­къоу щыIагъэм кIэщакIо фэхъугъ ыкIи зэрищагъ ныбжьыкIэхэм яIэпэIэсэныгъэ зыщыхагъахъорэ Адыгэ респуб­ликэ спорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс.

— ИкIыгъэ илъэсым ЕмтIылъ Нурбый ишIэжь фэгъэхьыгъэ спорт зэнэкъокъур дзюдомкIэ редгъэкIокIыгъ, джы мыгъэ самбэмкIэ зэхэтщагъ. Адыгэ Хасэм хэтхэм тызэрегупшысагъэмкIэ, ежь журналист цIэрыIом анахь ыгу рихьэу къытхыщтыгъэ спорт лъэпкъхэр илъэс къэс зэблэтхъузэ зэнэкъокъур редгъэ­кIокIыщт. Мафэр ыкIи мазэр теубытагъэу гъэнэфэгъэщтэп, спорт комитетым имэфэпчъ а спорт лъэпкъыр къызэрэдыхэ­лъытагъэм тетэу къыхэтхыщт. КъэкIощт илъэсым футболымкIэ зэхэтщэнэу гухэлъ тиI, — хигъэунэфыкIыгъ Хъот Юныс.
СамбэмкIэ зэнэкъокъум Мыекъуапэ, Теуцожь, Тэхъутэмыкъое, Шэуджэн, Кощхьэблэ районхэм, Адыгэкъалэ яспорт­сменхэр хэлэжьагъэх, пстэумкIи команди 6 хъущтыгъэх. Хэти зэрифэшъуа­шэу иIэпэIэсэныгъэ алырэгъум къыщигъэлъэгъуагъ.

— КомандэхэмкIэ зэнэкъокъунхэу зыкIэтшIыгъэр ар нахь гъэшIэгъонышъ ары, текIоныгъэр къыдахыным пае ныбжьыкIэхэр нахь зэдеIэжьых, ныбджэгъуныгъэр ащкIэ мэпытэ. ЕтIани ащ хэт зы нэбгырэм къытекIуагъэ­хэми, адрэхэм ягъэхъагъэхэмкIэ хащыжьы ыкIи зэфэдэу медаль къахьы. А шIыкIэм кIэлэцIыкIу­хэр спортым нахь кIегъэгушIух, — къыхигъэщыгъ Адыгеим изаслуженнэ тренерэу Хъот Юныс.
ТигущыIэгъу къызэриIуагъэмкIэ, командэ пэпчъ илъэс 13 — 14 зыныбжь нэбгырэ пшIырыпшI хэтыгъ. Анахь дэгъухэр къызэрэхагъэщыгъэхэ кубокхэр, щытхъу тхылъхэр, медальхэр Адыгэ Хасэм къыгъэхьазырыгъэх.

Апэрэ чIыпIэр зыфагъэшъошагъэр Теуцожь районым къикIыгъэ купыр ары. Тренерхэр: Дзыбэ Хьамзэт, НатIыжъ Азэмат, Къуекъо Руслъан.
ЯтIонэрэ чIыпIэр зыхьыгъэр Адыгэкъа­лэ икоманд. Тренерхэр: Чэтыжъ Алый, Шъэумэн Байзэт.
Ящэнэрэ чIыпIэр купитIумэ зэдагощыгъ: самбэмкIэ Мыекъопэ спорт еджа­пIэмрэ Шэуджэн районым икупрэ. Тре­нерхэр: ГуIэтыжь Хъалид, Мэрэтыкъо Сахьид, Джармэкъо Аслъан, Хьабыйхэу Байзэтрэ Мыхьамэтрэ.
ЕплъыкIэхэр
ЕмтIылъ Нурбый ишIэжь фэгъэхьыгъэ спорт зэнэкъокъум къекIолIагъэхэм ащыщхэм гущыIэгъу тафэхъугъ.
Общественнэ организациеу «Адыгэ Хасэм» итхьаматэу ЛIымыщэкъо Рэмэзан:
— Тиныбджэгъу лъапIэу, журналист цIэрыIоу, хэсашъхьэм хэтыгъэу ЕмтIылъ Нурбый ты­къыфызэхэхьагъ. Лъэныкъуабэмэ афэгъэзагъэу ащ Iоф зэришIэщтыгъэм зэкIэми тыщыгъуаз. Ахэм зэу ащыщ спортыр. Ащ епхыгъэу илъэс къэс ащ ишIэжь фэгъэхьыгъэ зэнэкъокъу зэхэтэщэ. Къыхэзгъэщымэ сшIоигъу, Адыгэ Хасэми ишIогъэшхо къыригъэкIэу зэрэхэтыгъэр, лъэпкъ Iофхэм япхырыщыни иIахьышIу зэрэхилъхьагъэр. ИтеплъэкIэ цIыф мэкIагъэми, ыгукIэ иныгъэ, къыпкъоуцон ылъэкIыщтыгъ.

МэщфэшIу Нэдждэт, Адыгэ Хасэм хэт:
— Хэти ешIэ ЕмтIылъ Нурбый спортми, нэмыкI лъэныкъохэми афэгъэзагъэу, лъэпкъым ыпсэ хэтIагъэу Iоф зэришIэщтыгъэр. Ащ фэдэ цIыфэу бэп тиIэр, бэ зымыIоу, башIэу. ЗэкIэми зыкъаригъэштэн ылъэкIыгъ, лъэпкъым фэлэжьагъ, ащ шIу къыдэхъуным дэшъхьахыгъэп. Нурбый синыбджэгъушIугъ, сыригъусэу бэрэ тыкъызэдекIокIыгъ, сыд фэдэрэ Iофтхьабзэ хэлэжьагъэми, зэраухэу къычIэкIыжьыщтыгъэп, спортсменхэм, артистхэм ахэхьан, сурэтхэр атырихын, пстэури ыгъэрэзэн фэягъ. ЧIэнэгъэшхо тшIыгъэ. Iоф­шIагъэу, джащ фэд сурэттехыгъэу иIэр бэдэд. ТапэкIэ ахэр амал зэриIэкIэ зэхэтыугъоежьыхэмэ, къэгъэлъэгъон зэхэтщэнэу гухэлъ зыдэтIыгъ.
Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адам:
— Спортым пылъхэмкIэ зэкIэми Нурбый шIу дэдэ тлъэгъу­щтыгъ, тиныбджэгъушIугъ. ИгущыIэ емыпцIыжьэу, ыгукIи ышъхьэкIи пытэу щытыгъ. «Адыгэ макъэр» къызытштэкIэ, аужырэ нэкIубгъомкIэ теджэныр едгъажьэщтыгъ, сыда пIомэ, игъэкIотыгъэу ащ спортым ищыIэныгъэ къыщыриIотыкIыщтыгъ. Зэнэкъокъухэм тахэлэжьэнэу тызыкIокIэ, чэщым къысфытеон ылъэкIыщтыгъ, «сыда кIалэхэм агъэхъагъэр, сыдэущтэу бэнагъэха?» ыIоти ыгъэгумэкIэу къыкIэуп­чIэщтыгъ. Джащ фэдизэу ти­Iофхэм апы­лъыгъ. Журналист цIэрыIоу тиреспубликэ исхэм ар ащыщэу сэлъытэ. Непэрэ зэнэ­къокъум игугъу къэтшIымэ, сигуапэ тизал къызэрэхахыгъэр, мыщ Iофтхьабзэр щызэхащэнэу зэрэрахъухьагъэр. Тэри тфэлъэ­кIыщтымкIэ тадеIагъ.
Iэшъынэ Сусан.