ГандболымкIэ Урысыем и Суперлигэ хэт «АГУ-Адыифыр» мы мафэхэм Москва икомандэу «Лучым» дешIагъ ыкIи мы илъэс ешIэгъум апэрэ текIоныгъэр къыщыдихыгъ.

«АГУ-Адыиф» — «Луч» — 32:31 (18:16)
«АГУ-Адыифым» хэтыгъэх: къэлэпчъэIутхэр — Черницовар, Гобадзе, Черновар. Коблыр — 8, Миловар — 5, Локян — 5, Хавронинар — 3, Казихановар — 3, Вайкум — 2, Кожубековар — 2, Смирновар — 2, Алексеевар — 1, Коваленкэр — 1.
«Лучым» щешIагъэх: къэлэпчъэIутхэр — Бударевар, Чипула, Моревар. Къэбж — 7, Голец — 4, Черняевар — 4, Зюринар — 4, Коробко — 3, Селиверстовар — 3, Гульцевар — 2, Германовар — 2, Алексеевар – 1, Смирновар – 1.

«АГУ-Адыифым» текIоныгъэр къыдихыныр къыфэпсынкIагъэп. Апэрэ таймым ыгузэгу нэс тикомандэ Iэгоуи 5-кIэ ыпэ итыгъ. Ау ащ ыуж «Лучым» иешIакIэ ригъэ­хъугъ ыкIи ятIонэрэ едзыгъом пчъагъэр зэфэдиз ышIын, нэужым зы IэгуаокIэ ыпэ ишъын ылъэ­кIыгъ. ЗэIукIэгъур аухынкIэ такъи­къитIум ехъу къэнагъэу, а уахътэм пчъагъэр 30:30-у щытыгъ, Адыгеим икомандэ хэт Кобл Зуретэ къэлапчъэм Iэгуаор дидзагъ. Джащ фэдэу «АГУ-Адыифым» ыпэкIэ хэтыгъэу, джырэ уахътэ «Лучыр» къэзыгъэлъэгъорэ Къэбж Заремэ дахэу джэгугъэ, къэлап­чъэм Iэгоуи 7 дидзагъ. Кобл Зуретэ игъусэу тикомандэ текIоныгъэр къыфыдихыгъ ащ икъэлэпчъэIутэу Ольга Черницовам. ЗэIукIэгъур аухынкIэ тIэкIу дэдэ къэнагъэу «Лучым» щешIэрэ Алена Германовам къыдзыгъэ Iэгуаор ащ къызэкIидзэжьыгъ, ащ ишIуагъэкIэ 32:31-у республикэм игандболисткэхэм зэIукIэгъур къахьыгъ.
— ЕшIэгъур гъэшIэгъонэу, узIэпищэу кIуагъэ. Пенальти пчъагъэ дгъэцэкIагъ, ау ащ къыкIэлъыкIоу къэлапчъэм Iэгоо макI дэты­дзагъэр. «Лучым» удешIэныр зэрэмыпсынкIэр зэIукIэгъум къыгъэлъэ­гъуагъ. ОчкоуитIу къэтхьыгъ, ау хэукъоныгъабэ тшIыгъэ, ахэм ядэгъэзыжьын Iоф дэтшIэщт, — къы­Iуагъ «АГУ— Адыифым» итренер шъхьаIэу Никита Голуб.
Я 3-рэ турым къыдыхэлъытагъэу «Уфа-Алисэм» 27:35-у «Звездар» къытекIуагъ. «ЦСКА-р» «Кубань» нахь лъэшыгъ, пчъа­гъэр — 25:38. Джащ фэдэу «Ростов-Доныр» «Динамо-Синарэм» «Астраханочкэр» «Ладэм» атекIуагъэх. КъыкIэлъыкIощт ешIэгъур тикомандэ чъэпыогъум и 3-м псэупIэу Абрау-Дюрсо щыриIэщт, «Черноморочкэм» IукIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 6.
2. «Астраханочка» — 6.
3. «Черноморочка» — 6.
4. «ЦСКА» — 6.
5. «Лада» — 4.
6. «Динамо-Синара» — 2.
7. «АГУ-Адыиф» — 2.
8. «Звезда» — 2.
9. «Луч» — 2.
10. «Уфа-Алиса» — 0.
11. «Кубань» — 0.
12. «Университет» — 0.