ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ Адыгеим щыщ бзылъфыгъэу экстремизмэм хэщагъэу зэгуцафэхэрэм пае уголовнэ Iоф къызэIуихыгъ.

ЗэрагъэунэфыгъэмкIэ, цIыфыр щымыIэ къэралыгъом игражданинэу къэзыгъэлъэгъорэ тхылъхэр ыгъэпсынхэу экстремизмэм пылъ организацием аштэгъагъ. Ащ имызакъоу, ар кIэу къыхащэщтхэм алъыхъущтыгъ, зэригъашIэщтыгъэх, ­Урысые Федерацием ихэбзэгъэуцугъэхэр амыгъэцэкIэнхэу, къэралыгъо хэбзэ къулыкъухэм апэшIуекIонхэу, щымыIэ къэралыгъом изаконхэм адырагъэштэнэу ыгъэдэIонхэм пылъыгъ.
Джыри зы нэбгырэ, ар хъулъфыгъ, Адыгеим щыпсэоу, экстремизмэм пылъ организацием хэтыгъэу щынэгъончъэнымкIэ Федеральнэ къулыкъум АР-мкIэ и ГъэIорышIапIэ уголовнэ Iоф къыфызэIуихыгъ.
ЗэрагъэунэфыгъэмкIэ, ащи щымыIэ къэралыгъом игражданствэ къэзыушыхьатырэ тхылъхэр ыгъэпсыщтыгъэх, организацием кIэу къыхащэщтхэм ауж итыгъ, УФ-м ихэбзэгъэуцугъэхэм апэшIуекIонхэу ыгъэдаIощтыгъэх.
УФ-м и Уголовнэ кодекс ия 282-рэ статья ия 2-рэ Iахьэу мы нэбгыритIур зэрагъэмысагъэхэм илъэси 6 хьапс ыкIи илъэси 5-м IэнэтIэ гъэнэфагъэхэм аIутын фимытхэу къыщыдэлъытагъ.
Джащ фэдэу Мыекъуапэ щыщ хъулъфыгъэу экстремизмэм зэрэдыригъа­штэрэр шъхьэихыгъэу къэзыIощтыгъэм пае уголовнэ Iоф къызэIуахыгъ.
Ар псэукIэ шапхъэхэм адимыштэу щыIагъ, психоневрологическэ сымэджэщым иучет хэтыгъ. Ипсихикэ зэрэзэ­щыкъуагъэм ыкIи УФ-м ихэбзэ къулыкъухэм гухьэ-гужъэу афыриIэм апкъ къикIэу, цIыфхэр бэу зыщызэхэхьэрэ чIыпIэм щыIэу полицием иIофышIэхэр аукIынхэу Мыекъуапэ дэсхэм къяджэщ­тыгъ.
БзэджэшIагъэ зезыхьагъэхэм пшъэ­дэкIыжь ягъэхьыгъэнымкIэ Федеральнэ къулыкъум и ГъэIорышIапIэу АР-м щыIэм ихьапсэу N 1-м Адыгеим щыщ хъулъфыгъэу дэсыри мы лъэныкъомкIэ агъэ­мысэу джыри уголовнэ Iоф къыфызэIуа­хыгъ. Ащ хьапсым иIофышIэхэм апэшIуекIонхэу къыдыдэсхэр ыгъэдаIощтыгъэх.
УФ-м и Уголовнэ кодекс ия 280-рэ статья иапэрэ Iахьэу ыужкIэ зигугъу къэтшIыгъэ нэбгыритIур зэрагъэмысагъэхэм илъэси 4 хьапс ыкIи ащ фэдизрэ IэнэтIэ гъэнэфагъэхэм аIутынхэ фимытхэу къыщыдэлъытагъ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу