Тэхъутэмыкъое районым щыпсэурэ хъулъфыгъэу компьютерым къэбарэу дэлъыр хэбзэнчъэу къызIэкIэзыгъэхьагъэм хьыкумым тырилъхьагъэм кIуачIэ иIэ хъугъэ.

ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ къыгъэхьазырыгъэ материалхэм къапкъырыкIызэ, УФ-м хэгъэгу кIоцI IофхэмкIэ и Министерствэ Тэхъутэмыкъое районымкIэ иследственнэ отдел илъэс 20 зыныбжь А.А. Альван пае уголовнэ Iоф къызэIуихыгъ.
ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, илъэситIукIэ узэкIэIэбэжьмэ, А.А. Альван Урысые банкышхохэм ащыщ зыщязгъэтхыгъэхэм «яунэе кабинетхэм» ары­хьагъ. Ахэм ясчетхэм язытет, нэмыкI къэбарэу апылъыр къызIэкIигъахьи, ацIэкIэ кредитхэр ыгъэпсыгъэх, ахъщэр ежь зэрэфаеу ыгъэфедагъ.
ЗэкIэмкIи А.А. Альван сомэ мин 640-рэ ащ тетэу къызфигъэфедагъэр. ЦIыфэу Iофым зыпари хэзымышIыкIыхэрэм чIыфэр атыжьын фаеу къызщиIорэ тхылъхэр къызаIокIэхэм, полициер къа­деIэнэу зыфагъэзагъ. Оперативнэ Iофэу зэхащагъэхэм яшIуагъэкIэ, бзэджэшIагъэр зезыхьагъэм илъэуж техьагъэх. Хъулъфыгъэр къызаубытым, нэбгыритфымэ ацIэкIэ ахъщэ чIыфэ банкым къызэрэIихыгъэм еуцолIэжьыгъ.
Тэхъутэмыкъое район хьыкумым ар мысэу ылъыти, илъэси 3-рэ мэзи 6-рэ хьапс тырилъхьагъ. Агъэмысагъэм ащ дыримыгъаштэу, нэмыкI хьыкум хэплъэ­жьынэу тхылъхэр ытыгъэх. АР-м и Апшъэрэ хьыкум Iофым джыри зэ хэп­лъэжьыгъ, ау тыралъхьагъэр зытетым тетэу къыгъэнагъ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу