АР-м иминистрэхэм я Кабинет зэхэсыгъоу иIагъэм зыщытегущыIэгъэхэ Iофыгъохэм ащыщ Адыгэ Республикэм социальнэ-экономикэ хэхъоныгъэмкIэ иунэе программэ диштэу цумпэ лъэпкъ зэфэшъхьафхэр зылэжьыхэрэм 2025-рэ илъэсым субсидиехэр зэраIэкIагъахьэхэрэр. Адыгеим и ЛIышъхьэу КъумпIыл Мурат Iофтхьабзэр зэрищагъ.

АР-м мэкъу-мэщымкIэ иминистрэу Къуанэ Анзаур къызэриIуагъэмкIэ, унэе программэм диштэу цумпэхэм ялэжьын мылъкоу пэIуагъэхьагъэм щыщ афэлъэ­гъужьыгъэным пае сомэ миллиони 100 мыгъэ къыхагъэкIыщт. Министерствэм испециалистхэр, муниципальнэ образованиехэм мэкъумэщ-къыдэгъэкIыжьынымкIэ якъулыкъухэм япащэхэр зыхэлэжьэгъэхэ дэкIыгъо зэIукIэхэр зэхащагъэх. Ащ фэдэ Iофтхьабзэхэм субсидиехэр къаратынымкIэ шапхъэу щыIэхэр цIыфхэм къащафаIотагъэх, яупчIэхэм джэуап къащаратыжьыгъ.
Субсидиехэр къаратынымкIэ шапхъэу щыIэхэр хабзэм игъэцэкIэкIо къулыкъу­хэм ясайтхэм, Министерствэм исоциальнэ хъытыухэм арагъэхьагъэх, респуб­ликэ къэбарлъыгъэIэс амалхэмкIэ къатыгъэх. Апэрэ чэзыум телъытагъэу тхылъ 27-рэ къарахьылIэгъагъ. Ащ щыщэу нэбгырэ 20-мэ сомэ миллион 67,2-рэ хъурэ субсидиехэр къаратыгъэх. Мы илъэсым Iоныгъом и 16-м къыщегъэжьагъэу ятIонэрэ чэзыум хэлэжьэщтхэм ядокументхэр аштэщтых, чъэпыогъум и 16-м нэс лъэIу тхылъхэр аIэкIагъэхьан алъэкIыщт.
Муниципалитетхэм япащэхэм программэм хэлажьэ зышIоигъохэм якъы­хэхынкIэ чIыпIэхэм Iофэу ащашIэрэм фэгъэхьыгъэу республикэм ипащэ къыфаIотагъ.
«Цумпэ лъэпкъ зэфэшъхьафхэр зылэжьыхэрэм мылъку къазэрафыхагъэ­кIырэр мэкъу-мэщым зэхъокIыныгъэ фэшIыгъэнымкIэ, мэкъумэщ-къыдэгъэ­кIыжьыным зегъэушъомбгъугъэнымкIэ Iофышхоу зэшIуахырэм щыщ. Ар зыфытегъэпсыхьагъэр Адыгеим къыщахьыжьырэ, хэгъэгум ибэдзэрхэм арагъэолIэрэ цумпэ лъэпкъхэр нахьыбэу къэгъэкIыгъэнхэр ары. Муниципалитетхэм ­ащыпсэухэрэм нахь икъоу къэбархэр аIэкIэжъу­гъахь, фермерхэм упчIэжьэгъу шъуа­фэхъу, ищыкIэгъэ тхылъхэм язэхэгъэуцонкIэ IэпыIэгъу яжъугъэгъот», — къы­Iуагъ КъумпIыл Мурат.
Гъэтхасэхэм яIухыжьын зэрэкIорэм фэгъэхьыгъэу АР-м мэкъу-мэщымкIэ и Министерствэ зэфэхьысыжьэу къышIыгъэми мыщ щедэIугъэх. 2025-рэ илъэсым гъэтхасэхэр гектар мини 104,7-мэ ащашIэгъагъ. Непэрэ мафэм ехъулIэу гектар мин 48,5-р Iуахыжьыгъ. Тыгъэгъэзэ тонн мин 74,4-рэ къаIожьыгъ, гурытымкIэ зы гектарым тыгъэгъэзэ центнер 18,2-рэ къырахыгъ. Натрыф тонн мин 16,2-рэ къаIожыгъ, зы гектарым центнер 30 къырагъэтыгъ, сое тонн къахьыжьыгъ, зы гектарым центнер 1,4-рэ къырахыжьыгъ.
Къуанэ Анзаур къызэриIуагъэмкIэ, бжыхьасэу мыгъэ республикэм къыщахьыжьыгъэр 2024-рэ илъэсым икъэгъэлъэгъон тIэкIу шъхьадэкIы. Ар зэп­хыгъэр 2024-рэ илъэсми, мыгъи огъоу зэрэщытыгъэр ары.
Зыщыогъу лъэхъаным машIом зыкъы­штэным ищынагъо зэрэщыIэр ­зэхэсыгъом къыщаIуагъ. Мы илъэсыр къызихьагъэм щегъэжьагъэу машIом мэкъумэщ мэхьанэ зиIэ чIыгухэм гъогогъу 23-рэ закъыщиштагъэу агъэунэфыгъ. НахьыбэрэмкIэ хыпкъхэм лыгъэ зэрарадзыгъэр ары ар зэпхыгъагъэр.
КъумпIыл Мурат Адыгеим икъалэхэмрэ ирайонхэмрэ япащэхэм пшъэрылъ афишIыгъ губгъохэм язытет ауплъэкIунэу, машIом зыкъымыштэнымкIэ шапхъэхэр къыдалъытэнэу чIыгулэжьхэм афагъэпытэнэу. Джащ фэдэу республикэм и ЛIышъхьэ игъо ылъэгъугъ губгъохэр зэрэзэтеутыгъэ мэз шъолъырхэм якъыдекIокIын фермерхэр фэгъэзэгъэнхэу.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.