Гупчэр зэрагъэпсырэм зыщигъэгъозагъ
АР-м и ЛIышъхьэу КъумпIыл Мурат псауныгъэр зыщагъэпытэрэ физкультурэ комплексэу «Ошъутенэм», теннис цIыкIумкIэ шъолъыр гупчэр зыщагъэпсырэм, щыIагъ.
ПсэолъэшIыпIэм джащ фэдэу кIогъагъэх АР-м иминистрэхэм я Кабинет и Тхьаматэ игуадзэу, Адыгеим финансхэмкIэ иминистрэу Виктор Орловыр, АР-м физическэ культурэмрэ спортымрэкIэ и Комитет итхьаматэу Дэгужъые Мурат, теннис цIыкIумкIэ шъолъыр федерацием ипащэу Юрий Гороховыр.
АР-м физическэ культурэмрэ спортымрэкIэ и Комитетрэ Урысые физкультурэ-спорт общественнэ организациеу «Урысыем теннис цIыкIумкIэ и Федерациерэ» зэдашIыгъэ зэзэгъыныгъэм диштэу гупчэр агъэпсы. Ащ пае федерацием сомэ миллиони 100 къыхигъэкIыгъ.
ПсынкIэу агъэпсырэ гупчэм квадрат метрэ 1230-м ехъу зэлъиубытыщт, зыгъэхьазырынымкIэ, зэнэкъокъухэм язэхэщэнкIэ ищыкIэгъэ спорт Iэмэ-псымэхэр ащ чIэтыщтых. МазэкIэ узэкIэIэбэжьмэ, псэолъэшIын IофшIэнхэр рагъэжьэгъагъэх, мы илъэсым ащ ишIын аухынэу рахъухьэ. А зы уахътэм нэбгырэ 50 ащ чIэфэщт. Спорт еджапIэу N 1-у С. Джэнчатэм ыцIэ зыхьырэм теннис цIыкIумкIэ исекцие, республикэ спорт еджапIэу N 3-м теннис цIыкIумкIэ икъутамэ къякIолIэрэ теннисистхэр ары спорт комплексым щешIэщтхэр.
Урысыем теннис цIыкIумкIэ и Федерацие дашIыгъэ зэзэгъыныгъэм диштэу мыщ фэдэ гупчэ Тэхъутэмыкъое районми щагъэпсынэу щыт.
Республикэм и ЛIышъхьэ псэуалъэу ашIырэр къызэпиплъыхьагъ, АР-м физическэ культурэмрэ спортымрэкIэ и Комитет ипащэхэм, подряднэ организацием илIыкIохэм адэгущыIагъ, ар заухын фэе пIалъэмкIэ, гупчэм Iоф зэришIэщтымкIэ пшъэрылъ гъэнэфагъэхэр афишIыгъэх.
«Тиспортсменхэм теннис цIыкIумкIэ шъолъыр гупчэм зызэрэщагъэхьазырыщтым нэмыкIэу, зэнэкъокъу лъэпкъ зэфэшъхьафхэри мыщ щызэхащэщтых. Ар къызызэIуахыкIэ, теннис цIыкIум пыщагъэхэр нахьыбэ зэрэхъущтхэм, тиспортсменхэм текIоныгъакIэхэр зэрашIыщтхэм тицыхьэ телъ. Урысыем теннис цIыкIумкIэ и Федерацие, ащ ипащэу Александр Бабаковым «тхьауегъэпсэу» есIо сшIоигъу мы спорт лъэпкъым Адыгеим зыщегъэушъомбгъугъэнымкIэ IэпыIэгъу къызэрэтфэхъурэм фэшI», — къыIуагъ республикэм ипащэ.