Адыгэ шъуашэм и Мафэ, Iоныгъом и 28-р, зыгъэпсэфыгъом зэрэтефэрэм къыхэкIэу, ащ ихэгъэунэфыкIын фэгъэ­хьыгъэ Iофтхьабзэхэр Iоныгъом и 26-м Мыекъуапэ щыкIуагъэх. АР-м и Концерт зэхахьэу «Налмэсым» ахэр щырекIокIыгъэх. Лъэпкъ шъуашэм идэхагъэ икъа­шъохэмкIэ зыгъэлъэгъорэ Къэралыгъо академическэ ансамблэм ыцIэ зыхьырэм ар зэрэщызэхащэрэр апэр. ЧIэхьапIэм шъолъырым илъэпкъ IэпэIасэхэм яIэшIагъэхэм якъэгъэлъэгъон щыгъэпсы­гъагъ. Адыгэ шъуашэм идынкIэ IэпэIасэу, дизайнерэу Мыгу Рузанэ иIофшIагъэхэмкIэ мэфэкI концертыр къызэIуахыгъ. Пэсэрэ лъэпкъ шъуашэм иIахьхэмрэ непэрэмрэ зэхигъащэхэзэ ыгъэхьазырыгъэ щыгъын купэу «Уахътэм идышъэ Iудан» цIэу зыфишIыгъэр ащ къыгъэлъэ­гъуагъ. Шъуашэхэм якъэгъэлъэгъон лъагъэкIотагъ IэпэIасэхэу Джарымэкъо Зуретрэ Уджыхъу Сусаннэрэ яIофшIагъэхэм. Фэдэ шIыкIэмкIэ ахэм адыгэ шъуашэр, дышъэ идагъэр щыIэныгъэм къыхащэжьы, лъэпкъым лIэшIэгъу пчъа­гъэхэм ылэжьыгъэр къаухъумэ, лIэужыкIэхэм анагъэсыжьы.
— ЛIэуж пэпчъ тикультурэ щыпсэунэу сыкIэхъопсы. ТиныбжьыкIэхэр рыгушхохэу лъэпкъ кIэныр зэрахьанэу, лъагъэкIотэнэу сыфай, — еIо IэпэIасэу Уджыхъу Сусаннэ.
МэфэкI зэхахьэр АР-м итворческэ купхэм ыкIи иорэдыIохэм яконцерткIэ лъагъэкIотагъ. Лъэпкъ къашъохэмкIэ Къэралыгъо академическэ ансамблэу «Налмэсым» ар ыублагъ.
Шъугу къэдгъэкIыжьын, Адыгэ шъуа­шэм и Мафэ Iоныгъом и 28-м зэрэтефэрэм ушъхьагъу гъэнэфагъэ иI. Мы мафэм къэхъугъ адыгэ конструктор-модельерэу, АР-м культурэмкIэ изаслуженнэ IофышIэу, искусствэм ылъэныкъо­кIэ Къэралыгъо тыным илауреатэу СтIашъу Юрэ. Ар мэфэкI пчэгум къырагъэблэгъагъ, имафэу къэблагъэрэмкIэ фэгушIуагъэх ыкIи итворчествэ ихьатыр­кIэ адыгэ шъуашэм идэхагъэ зэриIуа­тэрэмкIэ «тхьауегъэпсэу» раIуагъ.
Зэрэхабзэу мэфэкIым адыгэ джэгур кIэух фэхъугъ.
МэфэкIым итарихъ
АР-м и Адыгэ Хасэ игукъэкIкIэ 2011-рэ илъэсым Iоныгъом и 28-м апэрэу адыгэ шъуашэм и Мафэ Адыгеим щыхагъэунэфыкIыгъ. 2014-м къэралыгъо мэхьанэ иIэ хъугъэ ыкIи илъэс мэфэкIхэм ямэфэпчъ хэуцуагъ. Лъэпкъ культурэм икъэухъумэн, изегъэужьын, лIэужыкIэхэр ащ ищысэкIэ пIугъэнхэм, адыгэхэм ялъэпкъ IэшIагъэхэр, дышъэ идагъэр ашIогъэшIэгъоныным ар фэIорышIэ.
Анцокъо Ирин.