Адыгэ Республикэр зызэхащагъэм имэфэкIрэ лъэс зекIоным и Урысые мафэрэ яхэгъэунэфыкIын къыдыхэлъытагъэу бжыхьэ марафонэу «Жъогъо 12» зыфиIорэр Мыекъуапэ щыкIощт. Тикъэлэ шъхьаIэ ыкIи республикэм щыпсэухэрэм ямызакъоу, Урысыем инэмыкI шъолъырхэм ялIыкIохэри Iофтхьабзэм хэлэжьэнхэ алъэкIыщт. Ащ икIэщакIор Мыекъуапэ физическэ культурэмкIэ ыкIи спортымкIэ и Комитет.

Зызыушэты зышIоигъохэм Iоныгъом и 29-м щегъэжьагъэу чъэпыогъум и 5-м нэс лъэбэкъу мини 100 къакIун фае. Приложениеу «Шаги ВКонтакте» зыфиIорэм иамалкIэ шъхьадж фызэшIокIыгъэр агъэунэфыщт. ТекIоныгъэр къыдэзыхыгъэхэм шIухьафтынхэр афагъэшъошэщтых. Лъэбэкъу мини 100 къэзыкIугъэхэм зэкIэм дипломхэр аратыщтых. ЛъэIу тхылъхэр Iоныгъом и 28-м нэс зэхэщакIохэм аштэх.