Адыгеим илIыкIо купэу республикэм ипащэу КъумпIыл Мурат зипэщагъэр Краснодар краим игубернатор IэнатIэ Вениамин Кондратьевыр зэрэIухьагъэм фэгъэхьыгъэ Iофтхьабзэм хэлэжьагъ. Краснодар краим и Хэбзэгъэуцу ЗэIукIэ изимычэзыу сессиеу спикерэу Юрий Бурлачко тхьамэтагъор зыщызэрихьагъэм ар щыкIуагъ.

ИкIэрыкIэу хадзыжьыгъэ губернаторым тхьэлъанэ къызешI нэуж УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым ыцIэкIэ Вениамин Кондратьевым фэгушIуагъ Полномочнэ лIыкIом игуадзэу Владимир Гурба. Аужырэ илъэсхэм Пшызэ шъолъыр гъэ­хъагъэу ышIыгъэхэр Полномочнэ лIыкIом игуадзэ къыхигъэщыгъэх, Урысыем и Президентэу Владимир Путиным краим ипащэхэм къафигъэуцурэ пшъэрылъ шъхьа­Iэхэр къыгъэнэфагъэх.
Адыгеим и ЛIышъхьэу КъумпIыл ­Мурат икIэрыкIэу губернаторэу зэрэхадзыжьыгъэм фэшI Вениамин Кондратьевым фэгушIуагъ. Хэдзынхэм ялъэхъан хэдзакIохэм азыныкъо нахьыбэм амакъэ ащ зэрэфатыгъэр къыхигъэщыгъ.

«Пшызэ шъолъыр исхэм ащ фэдэу цыхьэ къызэрэпфашIырэм, ти Президентэу Владимир Путиным къызэрэбдыригъаштэрэм къагъэлъагъорэр уиIофшIэн осэшхо къызэрэфашIырэр ары. Мы аужырэ илъэсхэм уиIофшIэгъухэр шIуагъэ къытэу лэжьагъэх, лъэныкъо шъхьаIэхэмкIэ зэхъокIыныгъэшIухэр ашIынхэ алъэ­кIыгъ. Амалышхоу иIэхэм зыкъызэIуаригъэхызэ, Пшызэ шъолъыр теубытагъэ хэлъэу хэхъоныгъэ зэришIырэр тинэрылъэ­гъу: къыдэгъэкIыжьынымкIэ, мэкъу-мэщымкIэ, зекIонымкIэ шъолъырым гъэхъэ­гъэшIухэр ышIыгъэх, социальнэ лъэныкъоми Iофхэр нахьышIу щэхъух. ГумэкIыгъохэр зыщыщыIэ лъэхъанми о дэ­гъоу Iоф ошIэ, шъолъырым гъэхъагъэу иIэхэм ахигъэхъоным уишъыпкъэу удэлажьэ», — къыIуагъ Адыгеим и ЛIышъхьэ.
КъумпIыл Мурат зэрэхигъэунэфыкIыгъэмкIэ, икIэрыкIэу хадзыжьыгъэ губернаторым кIэгъэкъон пытэ фэхъущтых Пшызэ шъолъыр исхэм къызэрэдырагъа­штэрэмрэ федеральнэ гупчэм иIэпыIэгъурэ. Шъолъырхэм язэдэлэжьэныгъи мэхьанэшхо иI. ИлъэсипшI пчъагъэ хъугъэ шъолъыритIум зэныбджэгъуныгъэ азыфагу зилъыр, зэфыщытыкIэшIу зызэдыряIэр.
«Тишъолъырхэм зэдыряIэ зэгъунэ­гъушIу зэфыщытыкIэхэм язегъэушъомбгъун уиIахьэу хэпшIыхьэрэм осэшхо фэтэшIы. Тэ тызэгъусэу лъэпкъхэм азыфагу илъ зэгурыIоныгъэр къэтэухъу­мэ. Адыгеимрэ Пшызэ шъолъыррэ ядзэ­кIолIхэм непэ тихэгъэгу исуверенитет къызыщаухъумэрэ лъэхъаным тизэныбджэгъуныгъэ нахь мэпытэ. Президентым къытфигъэуцурэ пшъэрылъхэр зэкIэ тызэгъусэу тапэкIи зэрэзэшIотхыщтхэм, Краснодар краимрэ Адыгэ Рес­публикэмрэ ащыпсэухэрэм апае тишъо­лъырхэм язэдэлэжьэныгъэ зызэриушъом­бгъущтым тицыхьэ теплъ», — къы­Iуагъ АР-м и ЛIышъхьэ.
Iофтхьабзэм икIэухым КъумпIыл ­Мурат джыри зэ губернатор IэнатIэм зэрэIухьагъэмкIэ Вениамин Кондратьевым фэгушIуагъ. Игухэлъхэр щыIэныгъэм щып­хырищынхэмкIэ IэпэIэсэныгъэу иIэр, Пшызэ шъолъыр къыщыхъурэ Iофыгъохэм зэращыгъуазэрэр IэпыIэгъу къыфэхъунхэу ар губернаторым фэлъэIуагъ. ­Адыгеим и ЛIышъхьэ Краснодар краим исхэм псауныгъэ пытэ, щыIэкIэ-псэукIэ дэгъу яIэнэу, шIум щымыкIэнхэу афиIуагъ.
Адыгэ Республикэм и ЛIышъхьэ ипресс-къулыкъу
къытырэ къэбархэмкIэ
ЛIышэ Саныет.