Нахьыжъхэм я Советэу АР-м щызэхащагъэм зичэзыу зэхэсыгъо тыгъуасэ иIагъ.

Iофтхьабзэм хэлэжьагъэх АР-м ­лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет ипащэ игуадзэу Евгений Щербаковыр, Адыгеим иветеранхэм я Совет ипащэу Къоджэ Аслъан, Адыгэ Республикэм ыкIи Краснодар краим арыс быслъымэнхэм ямуфтиеу Къэрдэн Аскэрбый, Мыекъопэ ыкIи Адыгэ епархием яархиепископэу Тихон, ермэл апостольскэ чылысым иклирикэу Тер Мушег-Хачатрян, нэмыкIхэр. Iофтхьабзэр зэрищагъ нахьыжъхэм я Совет ипащэу ГъукIэлI Нурбый.
Лъэпкъ ыкIи дин зэфыщытыкIэхэр ары анахьэу тинахьыжъхэм ялIыкIохэр зытегущыIагъэхэр. Советым ипащэ мы лъэныкъом нахьыпэкIи мызэу, мытIоу игугъу зэрашIыгъэр, дунаим техъу­хьэхэрэр, лъэпкъхэм азыфагу зэгурымыIоныгъэ къизылъхьэ зышIоигъохэм диныр зэрагъэфедэрэр, аужырэ уахътэхэм динлэжьхэм жъалымыгъэу адэзекIохэу, Iимамхэр, чыристан дин пащэхэр аукIыхэу бэрэ къызэрэхэкIырэр къыдалъытэзэ, джыри зэ а гумэкIыгъом къызэрэфагъэзэжьыгъэр къыIуагъ.
Терроризмэр быслъымэн диным нахьыбэу зэрэрапхырэм дебгъэштэнэу зэрэщымытым ГъукIэлI Нурбый къыкIигъэтхъызэ, чыристан диным пылъхэми, быслъымэн диным рылажьэхэрэми зэфэдэу лъэпкъ зэгурыIоныгъэр, унэгъо хабзэхэр, ныбжьыкIэхэр патриотизмагъэм фэпIугъэнхэр зэрагъэлъапIэрэр щысэхэмкIэ къыушыхьатыгъ.
— Диныр политическэ гухэлъ шIойхэр зиIэхэм ежьхэм зэрэфаеу агъэфедэ, чыристанхэмрэ быслъымэнхэмрэ зэраутэкIынхэм пылъых. Ахэм уапэшIуекIоным фэшI узэгурыIон, узэкъотын фае. Нахьыжъхэм я Совет тапэкIэ Адыгеим культурэмкIэ и Министерствэ, лъэпкъ гъэсэныгъэм, лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым, дин ыкIи общественнэ организациехэм язэдэлэжьэныгъэ нахь агъэлъэшын, унашъоу ашIырэм шIуагъэ нахьыбэу къыхьыным ыуж итынхэ фаеу елъытэ. Мэщытым, чылысым къякIуалIэхэрэм, цIыфэу республикэм исхэм, анахьэу ныбжьыкIэхэм, Iоф адэшIэгъэн, еджапIэхэр, кIэлэцIыкIу IыгъыпIэхэр къэкIухьэгъэнхэ, цIыф зэхахьэхэр зэхэщэгъэнхэ фае. ЦIыфхэм щыIэкIэшIу яIэныр конфессие пстэумэ апшъэ зэрашIырэр зэкIэми алъыгъэIэсыгъэным мэхьанэ иI, — къыIуагъ ащ.
Нэужым дин пащэхэр, Советым хэтхэр къэгущыIагъэх. ЯеплъыкIэхэр къыраIотыкIыгъ, къаIэтыгъэ IофыгъохэмкIэ нахьыжъхэм я Совет зэрэдырагъаштэрэм къыкIагъэтхъыгъ.
ХЪУТ Нэфсэт.