БоксымкIэ зэнэкъокъоу «Кавказым ижъуагъу» зыфиIорэр Мыекъопэ районым ипсэупIэу Тульскэм щыкIуагъ.

ЛIыхъужъныгъэ зэрихьэзэ хэушъхьафыкIыгъэ дзэ операцием щыфэхыгъэ Валерий Кондрус ишIэжь фэгъэхьыгъэ турнирым спортсмени 155-рэ хэлэжьагъ. Ахэм илъэс 13 – 18 аныбжь, Адыгеим, Краснодар краим, Курскэ ыкIи Ростовскэ хэкухэм ялIыкIох.
Аныбжь елъытыгъэу боксерхэр купищэу гощыгъагъэх. «Кавказым ижъуагъо» зэнэкъокъу къодыеу щытэп, къыткIэхъухьэрэ лIэужхэм яхэгъэгу шIу алъэгъоу пIугъэнхэм ар фэIорышIэ. ЛIыхъужъым ишIэжь зыщагъэлъэпIэгъэ турнирыр спортсменхэмкIи, ахэм яплъынэу къэзэрэугъоигъэ цIыфхэмкIи Iэрыфэгъоу щытыным зэхэщакIохэм анаIэ тырагъэтыгъ.

Зэфэхьысыжьхэм ялъытыгъэу текIоныгъэр ыкIи хагъэунэфыкIырэ чIыпIэхэр къыдэзыхыгъэхэм медальхэр, кубокхэр ыкIи шIэжь шIухьафтынхэр афагъэшъошагъэх. Ахэр зыгъэсэгъэ тренерхэм рэзэныгъэ гущыIэхэр апагъохыгъэх. Турнирыр илъэс къэс зэхащэзэ ашIынэу рахъухьэ.
ЗэхэщакIохэм зэрэхагъэунэфыкIыгъэмкIэ, мы спорт лъэп­къым шъолъырым зыщиушъомбгъуным, ащ пыщэгъэ ныбжьыкIэхэм япчъа­гъэ нахьыбэ хъуным, яхэгъэгу шIу алъэгъоу ахэр пIугъэнхэм «Кавказым ижъуагъо» афэIорышIэщт. Мы спорт Iофтхьабзэр Тульскэм щыпсэухэрэм мэфэкI шъыпкъэ афэхъугъ, лIэуж зэфэшъ­хьафхэр зэрипхыгъэх.