Лъэпкъ журналистикэм иеджапlэ икlэлэегъаджэхэу Къэралыгъо телерадио­ком­паниеу «Адыгеим» ипащэу Ацумыжъ Адам, Урысыем, Адыгеим яза­служеннэ журналистэу Тэу Замирэ, Адыгеим иза­служеннэ журналистэу, АР-м ижурналистхэм я Союз итхьаматэу Тlэшъу Светланэ ыкlи Къэралыгъо телерадиокомпаниеу «Адыгеим» ижурналистэу Гъукlэлl Сусанэ зыхэхьэгъэхэ купыр мы мафэхэм шъо­лъырым икъуаджэхэм ащыIагъ.

Ушъхьагъур лъэпкъ журналистикэм иеджапIэ иапэрэ егъэджэнхэм защызгъэ­сэщт ныбжьыкIэхэр къыхэгъэщыгъэнхэр ары. Теуцожь, Тэхъутэмыкъое районхэм ыкIи Адыгэкъалэ ахэр ащыIэгъахэх. ЗэкIэмкIи я 9 — 11-рэ классхэм арыс нэбгырэ 55-мэ аIукIэнхэу агъэнэфэгъагъ, ау АдыгэкъалэкIэ зызытхыгъэгъэ нэбгырэ 12-м ычIыпIэ 25-рэ къекIолIагъ. Пстэури ныдэлъфыбзэр зыIулъ ныбжьыкIэх, адыгабзэмкIэ зэнэкъокъухэм, олим­пиадэхэм хагъэунэфыкIырэ чIыпIэхэр къащызыхьыгъэх. Журналистхэм загощи, нэбгырэ пэпчъ шъхьафэу дэгущыIагъэх, упчIэхэр аратыгъэх.
ГущыIэм пае, къуаджэу Очэпщые игурыт еджапIэ адыгабзэмрэ литературэмрэкIэ икIэлэегъаджэу Пщыдатэкъо Риммэ икIэлэеджэкIо нэбгыриплI журналистхэм зэхащэгъэ зэIукIэм къыщагъэх.
— КIэлэеджакIохэм ашIогъэшIэгъо­нэу къэкIуагъэх. Журналист ахэр хъущт­хэмэ джыдэдэм къэшIэгъуай, ау ащ фагъэсэщтхэм ахэфэнхэу фаех. Тэри ар тигуапэ хъущтыгъ, сыда пIомэ, адыгабзэкIэ тижурналистхэм Iоф зэрашIэрэм тылъэплъэ ыкIи лъэшэу тыгу рехьы, — къы­Iуагъ Пщыдатэкъо Риммэ.
— ТыздэгущыIагъэхэр адыгабзэкIэ дэгъоу къеджэх, къэгущыIэх, ягупшысэхэр къыраIотыкIышъух. Ахэр мэхьанэ зиIэ лъэныкъохэм ащыщых. Ары нахь мышIэми, гущыIэгъу сызыфэхъугъэ ныбжьыкIэмэ янахьыбэр медицинэ сэнэхьатым феджэнхэу фаех. Ар шъхьэ­ихыгъэу къыса­Iуагъ. Арэу щытмэ къызкIэкIуагъэхэмкIэ сызяупчIым, сшIогъэшIэгъоныгъ яджэуапхэр. «Къы­хэпхыгъэр зэблэпхъу­жьын плъэ­кIыщта?» сIуи шъхьадж сызеупчIым «арынкIи хъун» зыIуа­гъэу джащ фэдизым къахэкIыгъэр зы нэбгыр ныIэп. А зым пае сыкъэкIуагъэу сэлъытэ, — къыхигъэщыгъ Урысыем, АР-м язаслуженнэ журналистэу Тэу Замирэ.
Адыгеим илъэпкъ журналистикэ изегъэужьын дэлэжьэщтхэм непи яIофшIэн лъагъэкIуатэ. Мызыгъэгум ахэр зэблэгъагъэхэр Кощхьэблэ, Шэуджэн районхэр ары. Шэуджэнхэм яныбжьыкIэ 48-м, кощхьаблэхэмкIэ къуаджэу Еджэркъуае иеджэкIо 12-мэ ахэр аIукIэщтых. МэфитIум къыкIоцI нэбгыри 100-м нахьыбэ къызэлъаубытыщт. Пчъагъэм щыщэу къыхахыщтыр нэбгырэ 20.
Лъэпкъ журналистикэм ылъэныкъокIэ мыщ фэдэ егъэджэнхэр Адыгеим зэрэщызэхащэхэрэр апэр. Шъугу къэдгъэ­кlыжьын, ащ ипроект АР-м lофшlэнымрэ социальнэ хэхъоныгъэмрэкlэ и Министерствэ игранткlэ гъэцэкlагъэ хъущт.
Анцокъо Ирин.