Проектэу «Тиехэр гум итынэхэрэп!» зыфиIорэм къыдыхэлъытагъэу, Урысыем зыкъэухъумэжьынымкIэ и Министерствэ яIэпыIэгъоу къэралыгъо фондэу «Хэгъэгум иухъумакIохэм» ыкIи компаниеу «РЖД Тур» зыфиIохэрэм социальнэ-патриотическэ мэхьанэ зиIэ Iофтхьабзэу илъэс къэс зэхащэрэр ыкIэм фэкIуагъ.

Проектыр мэзаем и 5-м рагъэжьэ­гъагъ, Москва икIэу Великий Устюг нэсэу, нэужым мэшIокугъогу зекIо гъо­гуанэу «Урысыем и Золотое кольцо» зыфиIо­рэмкIэ (Iоныгъом и 4 — 7-м) ау­хыгъ.
2025-рэ илъэсым хэушъхьафыкIыгъэ дзэ операцием иветеранхэм, ахэм ягупсэхэм ыкIи хэкIодагъэхэм яунагъо­хэм апае кIогъу 12 афагъэхьазыры­гъагъ: «Города Великой Победы», «По Золотому кольцу», «Малахит», «В Карелию», «В Карелию и Санкт-Петербург», «Зимняя сказка» зыфиIохэрэр. Урысыем ишъолъыр 76-мэ къарыкIыгъэ дзэ операцием иветеран ыкIи хэкIодагъэхэм яунагъохэм ащыщэу нэбгырэ 2300-м ехъу зекIо щыIагъэх. Ахэм ащыщэу нэбгырэ 25-р Адыгеим икIыгъэх.
— Фондэу «Хэгъэгум иухъумакIохэм» пшъэрылъ шъхьаIэу иIэр ветеранхэр тызыхэт мамыр щыIакIэм псынкIэу хэгъэ­гъозэжьыгъэнхэр ары. ШIэныгъэ зыхахыщт ыкIи культурнэ Iофтхьабзэхэм ащкIэ шIуагъэ къаты, ахэр етIани ягупсэхэм, ежьмэ афэдэу гупшысэхэрэ цIыф­хэм ахэтхэ зыхъукIэ. ЛIыхъужъхэм ыкIи ягупсэхэм Урысыем щызэлъашIэрэ зекIо гупчэхэм ятарихъ, якультурэ, яархитектурнэ саугъэтхэр зэрагъэлъэгъунхэ амал яIагъ. Компаниеу «РЖД-м» тыфэраз хэгъэгум иухъумакIохэм IэпыIэгъу зэра­фэхъурэмкIэ, — хигъэунэфыкIыгъ УФ-м зыкъэухъумэжьынымкIэ иминистрэ игуадзэу, къэралыгъо фондэу «Хэгъэ­гум иухъумакIохэр» зыфиIорэм ипащэу Анна Цивилевам.
ЗекIо гъогууанэр зэракIугъэ мэшIокухэр зэтегъэпсыхьэгъагъэх. Дзэ операцием иветеранхэр ыкIи ягупсэхэр къызыщыуцугъэхэ къалэ пэпчъ интер­актив ыкIи мастер-классхэр зыхэхьэрэ хэушъхьафыкIыгъэ программэхэр къащяжэщтыгъэх.
— Проектэу «Тиехэр гум итынэхэрэп!» зыфиIорэм тызэрэхэлажьэрэм тэркIэ мэхьанэшхо иI. ПшъэдэкIыжьыр зэхатшIэу ащ изэхэщэн тыпылъ. Гъогууанэр акIуфэ тиветеранхэм ыкIи яунагъохэм ящынэгъончъагъэ тынаIэ тет. Тигуапэ ахэр къызэрэтфэразэхэр, — къыIуагъ «РЖД Тур» зыфиIорэм игенеральнэ пащэу Роман Бараковских.
КъэIогъэн фае ветеранхэм ащыщыбэхэр апэрэу мыщ фэдэ гъогу зекIо зэрэтехьагъэхэр ыкIи алъэгъугъэр лъэшэу агу зэрэрихьыгъэр. ГущыIэм пае, Тэхъутэмыкъое районым щыщ ветеранэу Денис Алеевскэм къылъэгъугъэр ыгу зэрэрихьыгъэр иусэ къыщыриIотыкIыгъ.
Проектыр зыщыIэ 2022-рэ илъэсым къыщегъэжьагъэу къэралыгъом зэлъа­шIэрэ ичIыпIэхэр мэшIокукIэ нэбгырэ 10600-мэ къакIухьагъ.
Iэшъынэ Сусан.