ПсэупIэ-коммунальнэ хъызмэтымкIэ ГъэIорышIапIэу Адыгеим щыIэм ипащэу Ныбэ Руслъан тызэрэщигъэгъозагъэмкIэ, фабэр цIыфхэм аIэкIэзгъэхьэрэ псэуалъэхэм япроцент 90-м ехъур бжыхьэ-кIымэфэ уахътэм фэхьазыр.

ПстэумкIи мыгъэ котельнэ 258-рэ, фабэр къэзытырэ пунктэу 25-рэ, ащ икIуапIэу километрэ 288-рэ, гъэстыныпхъэ шхъуантIэм ирыкIуапIэу километрэ мини 5-м ехъу, псы къабзэм ирыкIуапIэу километрэ 2274-рэ, псы шIоир зэрыкIорэу километрэ 400-м ехъу, фэтэрыбэу зэхэт унэ 1958-рэ агъэцэкIэжьыгъ.
Шапхъэхэм къызэрадэлъытагъэм те­тэу, кIымафэр икIи фабэр къатын имыщыкIэгъэжь зэхъум, муниципальнэ образование пэпчъ ипсэупIэ-коммунальнэ хъызмэт епхыгъэ псэуалъэхэм язытет зыфэдэр агъэунэфыгъ, зэфэхьысыжьхэм къапкъырыкIхэзэ гъэцэкIэжьын IофшIэнэу зэшIуахын фаехэм яплан зэхагъэуцуагъ, нэужым республикэм зэрэщытэу щашIэщтыр агъэнэфагъ, ащ диштэу IофшIэнхэри зэшIуахыгъэх.
Джащ фэдэу Ростехнадзорымрэ Стройнадзорымрэ ялIыкIохэр зыхэхьэрэ комиссиехэр районхэм ыкIи къалэхэм ащызэхащагъэх. Ахэм бэдзэогъу мазэм къыщегъэжьагъэу фабэр цIыфхэм къязытырэ организациехэр, ахэр зэпстэумкIи 21-рэ зэрэхъурэр, ауплъэкIугъэх. Хэбзэгъэуцугъэм зэрэщыгъэнэфагъэм тетэу, комиссиехэм ахэтхэм котельнэхэм, фабэм ирыкIуапIэхэм, нэмыкI псэуалъэу агъэцэкIэжьыгъэхэм язытет, тхылъэу агъэхьазырыгъэхэр, ахэм Iоф ащызышIэхэрэм икъу фэдизэу япшъэ­рылъхэм хэшIыкI афыряIэмэ зэрагъэшIагъ.
Ныбэ Руслъан къызэриIуагъэмкIэ, щыкIагъэу 386-рэ къыхагъэщыгъагъ. Ащ щыщэу 306-р дагъэзыжьыгъах, къэнэгъэ 80-р агъэтэрэзыжьынэу чъэпыогъум и 1-м нэс пIалъэ яI.
«Ащ ыуж, чъэпыогъум и 6-м щыублагъэу, Ростехнадзорым джыри зэ уплъэ­кIунхэр зэхищэщтых. ЩыкIагъэхэр къахи­мы­гъэщыжьхэу, шапхъэхэм адиштэу зыфагъэхьазырыгъэу ыгъэунэфымэ, унэ­хэм ягъэфэбэн зэрэфэхьазырхэр къэзыушыхьатырэ тхылъхэр чъэпыогъум и 15-м шIомыкIэу къаритыщтых», — къыIуагъ ащ.
ХЪУТ Нэфсэт.