ФутболымкIэ Адыгэ Республикэм ичемпионат иапэрэ едзыгъо ыкIэм фэкIуагъ. Шъугу къэдгъэкIыжьын, командэ пэпчъ нэбгырий щешIэ. Мыекъопэ стадионэу «Юность» зыфиIорэм ящэнэрэ тхьамафэ хъугъэу ахэр щызэнэкъокъух.

Мы мафэхэм финалныкъом ихьэгъэ апэрэ командэхэр къэ­нэфагъэх. Купэу «А-м» хэтхэр зэкIэ текIоныгъэм фэбэнэнхэ амал яIагъ. Ау апэу зэнэкъокъум къыхэзыгъ «Насыпыр». Мы командэр «Блащэпсынэм» 0:0-у дешIагъ ыкIи Кощхьэблэ районым илIыкIохэр финалныкъом ихьанхэмкIэ а пчъагъэр афикъугъ, сыда пIомэ, мы зэIукIэгъум ехъулIэу «Насыпым» очко нахь макIэ иIагъ. «МФОК-у Ошъутенэр» «Космосым» 3:1-у текIуагъ ыкIи ыпэкIэ лъыкIотагъ. «Зэкъошныгъэм» щешIэщтыгъэ Къонэ Амиррэ (тIогъогогъо) мы командэм итренер шъхьаIэу Сергей Мирошниченкэмрэ, «Космосым» хэт Тагир Стращенкэм къэлапчъэм Iэгуаор дадзагъ. Мы зэIукIэгъу­хэм ауж «Насыпыр» (очкоуи 2), «Космосыр» (зы очко) текIоныгъэм фэбэнэнхэ алъэкIыщтэп. «МФОК-у Ошъутенэр» (очкоуи 7) ыкIи «Блащэпсынэр» (очкоуи 5) финалныкъом ихьагъэх.
Купэу «Б-м» хэт командэхэм яешIэгъу шъхьаIэхэр непэ кIощтых. Пчыхьэм сыхьатыр 8-м «Трояр» «Кавказым», пчыхьэм сыхьатыр 9-м «Фэдзыр» «Асбирым» адешIэщтых.
Купэу «Б-м» хэт командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Кавказ» — 4.
2. «Асбир» — 4.
3. «Троя» — 3.
4. «Фэдз» — 0.