Теннис цIыкIумкIэ зэнэкъокъоу «Предгорье Кубани» зыфиIорэм иятIонэрэ тур къыдыхэлъытагъэу спортсменхэр Апшеронскэ районым ипсэупIэу Николаенкэм щызэрэугъоигъэх. Адыгеир къэзыгъэлъэгъуагъэхэр спорт еджапIэу С. М. Джэнчатэм зыщызыгъасэхэрэр ары.

Зэнэкъокъур рагъэжьэным ыпэкIэ апэрэ турым текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэм зэхэщакIохэр афэгушIуагъэх. Ахэм Мыекъуапэ илIыкIуи 4 ахэтыгъ.
ЯтIонэрэ лигэм зыщызыушэтыгъэ София Рычковам дышъэ медаль къыхьыгъ, Бзаго Даринэ ящэнэрэ хъугъэ. Ящэнэрэ лигэм Пэфыф Суандэ пэрытныгъэр щиубытыгъ, Дамир Бабабековым ящэнэрэ чIыпIэр къыдихыгъ.

ЯтIонэрэ турым къыдыхэлъытэгъэ зэнэкъокъум республикэм икъэлэ шъхьаIэ нэбгыри 7-мэ къыщагъэлъэгъуагъ. Апэрэ лигэм текIоныгъэр къыщыдихыгъ Артем Вариводиным. Джащ фэдэу София Рычковамрэ Дамир Бабабековымрэ хагъэунэфыкIырэ чIыпIэхэр къафагъэшъошагъэх.
Зэнэкъокъум зэкIэмкIи спортсмен 51-рэ хэлэжьагъ. Ящэнэрэ турыр чъэпыогъум зэхащэщт.