Урысые Федерацием и Президентэу Владимир Путиным правительствэм хэтхэм зэдэгущыIэгъоу адыриIагъэм программэу «Владимир Путиным тыкIыгъоу илъэс зэфэхьысыжьхэр» зыфиIорэм зыкъыфэзыгъэзэгъэ цIыфхэм ягумэкIыгъохэм япхыгъэ Iофыгъохэм щатегущыIагъэх. Ащ епхыгъэу Народнэ фронтым игъэцэкIэкIо комитет ипащэу Михаил Кузнецовым зэфэхьысыжьхэр къышIыгъэх.

— Унашъоу щыIэхэм атетэу цIыфхэр зыгъэгумэкIырэ упчIэ миллиони 2-рэ мин 600-мэ язэхэфын Iоф дэтшIагъ. АщкIэ Сберыр IэпыIэгъу къызэрэтфэхъугъэмкIэ тыфэраз, IэрышI акъылыр дгъэфедэн амал къытитыгъ. ДжырэкIэ процент 46-мэ яупчIэхэм джэуапхэр яттыжьыгъэх, гъэрекIорэ къэгъэлъэгъоным елъытыгъэмэ, ар проценти 5-кIэ нахьыб, — къыIуагъ Михаил Кузнецовым.
Зэфэхьысыжьхэм къызэрагъэлъэгъуа­гъэмкIэ, мы лъэныкъомкIэ анахь дэгъоу Iоф зышIагъэхэр Тульскэ, Кемеровскэ, Челябинскэ ыкIи Ростовскэ хэкухэр ары.
Народнэ фронтым иэкспертхэм цIыфхэр анахь зыгъэгумэкIырэ упчIэхэр агъэнэфагъэх. Анахь шъхьаIэр хэушъхьа­фыкIыгъэ дзэ операцием шъобж хэзыхыгъэхэм ыкIи ахэм яунагъохэм арысхэм ялъэIухэр ары. УIагъэ зытелъхэм яIахьылхэм къызэраIорэмкIэ, ыпкIэ хэмылъэу госпиталым зэ нахь умыкIоныр макIэ, сыда пIомэ ­къулыкъушIэр мэзэ пчъагъэрэ ащ чIэлъэу къыхэкIы.
Сэкъатныгъэ зиIэхэм ящыкIэгъэ Iэмэ-псымэхэр къызIэкIагъэхьанхэ амал яIэным иIофыгъуи цIыфхэр егъэгумэкIых. Анахьэу электроннэ сертификатхэм ахъщэр игъом къазэрарымыхьэрэр, мэзэ заулэрэ ащ зэрежэхэрэр ыкIи ящыкIэгъэ Iэмэ-псымэхэр къызэримыхьхэрэр къа­Iуагъ. УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ къызэрэщаIуагъэмкIэ, зэхэтэу пщэфын уасэм елъытыгъэу ахъщэр къатIупщы, зырызэу пщэфырэр нахь лъапIэу къекIы. Мы лъэныкъор зэхэфыгъэн фаеу зэралъытэрэр Народнэ фронтым игъэцэкIэкIо комитет ипащэ къыIуагъ.
Сабыибэ зэрысхэм ялъэIухэм шъхьа­фэу Михаил Кузнецовыр къащыуцугъ.
Къуаджэхэм ащыпсэухэрэм гумэкIыгъоу къагъэнэфагъэхэм ащыщ гъогухэм асфальт зэратемылъым къыхэкIэу еджа­пIэм екIолIэрэ автобусхэр ахэм къазэрадэмыхьэхэрэр. КIэлэеджакIохэм лъэсэу километрэ пчъагъэ къакIун фае мэхъу. НэмыкI гумэкIыгъоу цIыфхэм къаIэтыгъэхэм Президентыр ащагъэгъо­загъ.
ЦIыфхэм ягумэкIыгъохэр къыраIотыкIынхэмкIэ линие занкIэр Iэрыфэгъоу зэрэщытыр Урысые Федерацием и Президентэу Владимир Путиным къыхигъэ­щыгъ.