Унэ мини 2-м ехъу Адыгеим щатхыгъ
Росреестрэм и ГъэIорышIапIэу АР-м щыIэм унэе псэупIэу мы илъэсым ытхыгъэхэм япчъагъэ зэфихьысыжьыгъ.
2025-рэ илъэсым пыкIыгъэ мэзи 8-р пштэмэ, ащ фэдэу унэ 2356-рэ кIэу республикэм щашIыгъэу кадастрэ учетым хагъэуцуагъ. Ар квадрат метрэ 281724-рэ мэхъу.
Нахьыбэу зы къат хъурэ унэхэр ары республикэм щыпсэухэрэм агъэуцухэрэр. Росреестрэм и ГъэIорышIапIэ зэригъэунэфыгъэмкIэ, щылэ мазэр къызихьагъэм къыщыублагъэу Iоныгъом нэс пштэмэ, ащ фэдэ псэолъэ 1752-рэ ашIыгъ.
КъатитIоу зэтет унэхэри мымакIэу агъэуцух. ПстэумкIи 551-рэ аухыгъэу ГъэIорышIапIэм щатхыгъ. Ау къатищ хъухэрэм япчъагъэ бэп. Унэ 53-рэ ныIэп учетым хагъэуцуагъэр.
«Зыщыжъугъэгъупшэ хъущтэп, унэе псэупIэр ухыгъэу зыплъытэн плъэкIыщтыр учетым хэжъугъэуцоу, фитыныгъэу фышъуиIэр яжъугъэтхэу, амыгъэкощырэ мылъкум и ЗыкI къэралыгъо реестрэ зыхэжъугъахьэкIэ ары. Псэуалъэм тхылъэу пылъын фаехэр хэбзэгъэуцугъэхэм адиштэу мыгъэпсыгъэхэмэ, ухыгъэкIэ кIорэп, бгъэфедэн уфитэп», - къыхигъэщыгъ Росреестрэм и ГъэIорышIапIэу АР-м щыIэм ипащэ иIэнатIэ зыгъэцэкIэрэ ЕмыкI Мариет.