Къалэу Мыекъуапэ иурамэу Депутатскэм тет унэу N 25-м, машIом зэрар зэрихыгъагъэм, иунашъхьэ зыпкъ зэрэрагъэуцожьырэр республикэм и ЛIышъхьэу КъумпIыл Мурат зэригъэшIагъ.

Республикэм ипащэ игъусагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ министрэм иапэрэ гуадзэу Лафышъэ Рэмэзан, Мыекъуапэ имэрэу Геннадий Митрофановыр.
Шъугу къэтэгъэкIыжьы мы илъэсым ишышъхьэIу машIом мы унэм зыкъызэрэщиштэгъагъэр, квадрат метрэ 900 фэдиз ащ зэрэзэлъиубытыгъагъэр. Унашъ­хьэмрэ мансард къатымрэ машIом хэкIодагъэх, фэтэр 30 фэдизмэ зэрар ахьыгъагъ, фэтэри 7 стыгъагъэ. МашIом зыкъызештэ нэуж республикэм ипащэ псынкIэу зэIукIэ зэхищэгъагъ, ыужкIэ унэм чIэсхэм аIукIэгъагъ. ТхьамыкIагъом къыздихьыгъэ гумэкIыгъохэм ядэгъэзыжьынкIэ пшъэрылъ гъэнэфагъэ­хэр Мыекъуапэ имэриерэ АР-м псэолъэ­шIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэрэ афишIыгъагъэх.

КъумпIыл Мурат тыгъуасэ мы чIыпIэм къызэкIом, унашъхьэр зыпкъ игъэуцожьыгъэнымкIэ Iофэу зэшIуахыгъэхэм защигъэгъозагъ, унэм чIэсхэмрэ псэолъэшIхэмрэ адэгущыIагъ. Къалэм имэриерэ АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэрэ къызэратыгъэмкIэ, гъэстыныпхъэ шхъуантIэр, псыр, электроэнергиер икъоу мы унэм къыIэкIэхьэх. Пкъыгъоу стыгъэхэр зэблахъугъэх, машIом зыкъимыштэнымкIэ щыфэ гъэнэфагъэхэр зыфашIыгъэ пхъэцухэр унашъхьэм дахьыягъэх, ащ иIэтын ыуж итых.
КъумпIыл Мурат АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Минис­терствэрэ Мыекъуапэ иадминистрациерэ пшъэрылъ афишIыгъ гъэцэкIэжьын Iоф­шIэнхэр нахь агъэпсынкIэнхэу, Iофхэр зэрэкIорэм мафэ къэс гъунэ лъафынэу.
«Бжыхьэ ощххэр къызэрежьагъэм епхыгъэу унашъхьэм иIэтын гъэпсынкIэгъэн фае. Армырмэ, ощхышхохэм чIэнэгъэ ин арагъэшIын алъэкIыщт. Ау щыкIагъэ гори афэмыхъоу, Iофхэр зэкIэ дэгъоу зэшIуахын фае», — къыIуагъ КъумпIыл Мурат.
Адыгэ Республикэм и ЛIышъхьэ пшъэ­рылъ зэрафишIыгъэм тетэу анахьэу зэрар зыхьыгъэ фэтэрхэм якоммуникациехэр зыпкъ рагъэуцожьыщтых. ТхьамыкIагъом зэрар зэрихыгъэ нэмыкI фэтэрхэм ащыпсэухэрэми ахъщэ аратэу аублагъ. Комиссиеу зэхащагъэм унагъо­хэм чIэнагъэу ашIыгъэр къелъытэ, акт гъэнэфагъэхэр зэхегъэуцо. Фэтэрхэр зыехэу ищыкIэгъэ документхэр аIэкIэзыгъахьэхэрэр ары ахъщэ къызэратыхэрэр.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.