Мыгъэрэ гъэтхэ дзэ дэщыгъор зэрэрекIокIыгъэм ыкIи къэблэгъэрэ бжыхьэ дзэ дэщыгъом изэхэщэн Адыгеим зэрэщылъыкIуатэрэм, федеральнэ гупчэм къыгъэуцурэ пшъэрылъхэр гъэцэкIэгъэнхэмкIэ шIэгъэн фаехэм защытегущыIэгъэхэ зэхэсыгъо АР-м и Правительствэ зычIэт Унэм тыгъуасэ щыкIуагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, министрэхэр, муниципальнэ образованиехэм япащэхэр, хэгъэгу кIоцI IофхэмкIэ, ошIэ-дэмышIэ IофхэмкIэ министерствэхэм, прокуратурэм, ДОСААФ-м ялIыкIохэр, республикэ ыкIи район дзэ комиссариатхэм якъулыкъу­шIэхэр.
КIэрэщэ Анзаур зэхэсыгъор къызэIуихызэ, 2025-рэ илъэсым игъэтхэ дзэ дэщыгъо кампание зэрифэшъуашэу зэрэрекIокIыгъэр, къэралыгъом ищынэгъончъагъэ гъэпытэгъэнымкIэ ащ мэхьанэ зэриIэр хигъэунэфыкIыгъ. Ащ фэгъэзэгъэ къулыкъу пстэуми акIуачIэ зэрэзэхэлъыгъэм ар икIэухэу хъугъэ.
— УФ-м и УIэшыгъэ КIуачIэхэм къулыкъур ащызыхьыщт ныбжьыкIэ нэбгырэ 600 фэдиз гъатхэм ­Адыгеим икIыгъ. А пчъагъэр макIэп, пшъэрылъэу къытфагъэнэфагъэр дгъэцэкIагъэ. Джыри мы къэблэгъэрэ бжыхьэ дзэ дэщы­гъом къытфагъэуцугъэ пшъэрылъыр зэрэдгъэцэкIэщтым ыуж титын фае, — къыхигъэщыгъ КIэрэщэ Анзаур.
2025-рэ илъэсым игъэтхэ дзэ дэщыгъо зэрэкIуагъэм фэгъэхьыгъэу АР-м идзэ комиссариат ипащэу Александр Авериныр къэгущыIагъ. Ащ къызэриIуагъэмкIэ, блэкIыгъэ бжыхьэ дзэ дэщыгъом аныбжьыкIэ къулыкъу ахьынэу зытефэрэ нэбгырэ 3000 фэдиз чIыпIэ комиссариатхэм къякIо­лIагъ. ИкIыгъэ илъэсым игъатхэ нэбгырэ 600 фэдиз Урысыем и УIэшыгъэ КIуачIэхэм ащагъ. АщкIэ Адыгеим пшъэрылъыр ыгъэцэкIагъ.

— Дзэ дэщыгъор комиссариатым иIофшIэн анахь шъхьаIэхэм ащыщ. Арышъ, зэгурымыIоныгъэ цIыфхэмрэ военкоматымрэ ­азыфагу къимыкIэу, хэбзэукъоныгъэхэр хэмыхъухьэхэу а Iофтхьабзэр зэхэщэгъэным мэхьанэ иI. Районхэм ащыIэ комиссиехэм гъэтхэ дзэ дэщыгъом дэгъоу Iоф ашIагъ, — хигъэунэфыкIыгъ дзэ комиссар шъхьаIэм.
Джащ фэдэу Александр Авериным къызэриIуагъэмкIэ, дзэ-учетнэ сэнэхьатхэмкIэ Урысыем и ДОСААФ игъэсэныгъэ организациехэм нэбгырэ 60-м ехъу къагъэ­хьазырыгъ. АщкIэ Къыблэ дзэ округым къафигъэуцугъэ пшъэры­лъыр проценти 100-м нэсэу гъэцакIагъэ хъугъэ.
Медицинэ уплъэкIунхэр зыкIугъэ­хэм ащыщэу зипсауныгъэ изытеткIэ къулыкъур зыхьын зылъэкIыщ­тыр процент 60 фэдиз мэхъу, процент 30-м япсауныгъэкIэ къулыкъур амыхьышъущтэу алъытагъ.
Александр Авериныр къызыщыуцугъэхэм ащыщ дзэ-патриотическэ пIуныгъэр республикэм зэрэщылъа­гъэкIуатэрэр. Мы лъэныкъом ­Адыгеим и ЛIышъхьэу КъумпIыл Мурат лъэшэу ынаIэ зэрэтыригъэ­тырэр зэхэсыгъом щыхагъэунэфыкIыгъ. НыбжьыкIэ армейцэ 9343-рэ мы уахътэм республикэм щатхыгъ. «Юнармием» игъогу картэ къыдыхэлъытагъэу, 2025-рэ илъэсым ащ исатырхэм республикэмкIэ нэбгырэ 1620-рэ аштагъ.
Дзэ комиссар шъхьаIэм зэхэсыгъом хэлажьэхэрэм анаIэ зытыраригъэдзагъэхэм ащыщ дзэ дэщыгъом илъэхъан макъэ зэрамыгъэ­Iушъугъэу зылъыхъухэрэр нэбгыри 180-рэ фэдиз зэрэхъухэрэр.
— 2025-рэ илъэсым чъэпыогъум и 1-м бжыхьэ дзэ дэщыгъор едгъэ­жьэщт. Ащ къыдыхэлъытагъэу къулыкъур зыхьынэу къызтефэрэ нэбгырэ мини 3 фэдизмэ тыкъя­джэщт. Ащ щыщэу непэ ехъулIэу нэбгырэ 2600-мэ макъэ арагъэIугъах, — къыхигъэщыгъ А. Авериным.
Нэужым къэгущыIагъэх АР-м гъэсэныгъэмрэ шIэныгъэмрэкIэ иминистрэу Евгений Лебедевыр, псауныгъэр къэухъумэгъэнымкIэ министрэу Мэрэтыкъо Рустем, полицием иучастковэ уполономоченнэхэм яIофшIэн зэхэщэгъэнымкIэ отделым ипащэ иIэнатIэ зы­гъэцэкIэрэ Мэлгощ Рэмэзан, Урысыем и ДОСААФ и Адыгэ шъолъыр къутамэ итхьаматэу Барцо Тимур.
Зэхэсыгъом кIэух зэфэхьысыжьхэр фашIызэ, бжыхьэ дзэ дэщыгъоу къэблагъэрэм ипшъэрылъ шъхьаIэхэм язэшIохынкIэ анахьэу анаIэ зытырагъэтын фаехэр Владимир Свеженец къыгъэнэфагъэх. АР-м хэгъэгу кIоцI IофхэмкIэ и Министерствэ илIыкIохэм муниципальнэ образованиехэм япащэхэр ягъусэхэу къулыкъум зыщызыдзыехэрэм нахь пхъашэу алъыхъунхэу афигъэпытагъ.
— Ыпэрэ илъэсхэм афэдэу къэблэгъэрэ бжыхьэ дзэ дэщыгъор зэрифэшъуашэу редгъэкIокIын фае. Мыщ тикъэралыгъо изыкъэухъумэжьын гъэпытэгъэнымкIэ мэхьанэшхо зэриIэр, гражданскэ пшъэ­дэкIыжьэу ащкIэ ныбжьыкIэхэм яIэр къагурыIон фае, — къыIуагъ Владимир Свеженец.
Iэшъынэ
Сусан.