Адыгэ Республикэм и Премьер-министрэу щытыгъэ, Урысые Федерацием и Гупчэ банк Адыгэ Респуб­ликэмкIэ и Лъэпкъ банк итхьамэтагъэу Педан Николай Гаврил ыкъом ыныбжь илъэс 84-м итэу идунай ыхъожьыгъ.
Николай Гаврил ыкъор Краснодар краимкIэ Абинскэ районым ит станицэу Мингрельскэм 1941-рэ илъэсым тыгъэгъазэм и 12-м къыщыхъугъ.
1965-рэ илъэсым Пшызэ мэкъумэщ институтыр къыухыгъ. Ащ ыуж илъэси 10 Кировым ыцIэкIэ щыт колхозым щылэжьагъ, инженерэу ригъажьи, тхьамэтэ IэнатIэм нэсыгъ. 1975-рэ илъэсым Абинскэ райисполкомым итхьаматэу агъэнэфагъ. ЗиIоф хэшIыкIышхо фызиIэ пэщэ чанэу мыщ зыкъыщигъэлъэ­гъуагъ.
1980-рэ илъэсым Н.Г. Педан Адыгэ автоном хэкумкIэ партием и Джэджэ райком иапэрэ секретарэу Iоф ышIэу ригъэжьагъ.
Ар якIэщакIоу хъызмэт, предприятие пэрытхэм яIофышIэхэм, сабыибэ зэрыс унагъохэм псэукIэ амалэу яIэхэр нахьышIу шIыгъэнымкIэ ищыкIэгъэ Iофтхьабзэхэр зэрахьагъэх. А илъэсхэм гъогухэр, паркхэр, кIэлэцIыкIу IыгъыпIэхэр агъэпсыгъэх, район гупчэр зэтырагъэ­псыхьагъ. Район гупчэ сымэджэщыр, гурыт еджапIэр, цIыфхэм яфэIо-фашIэхэр зыщагъэцэкIэрэ унэр ашIыгъагъэх.
1992-рэ илъэсым Николай Гаврил ыкъор Адыгэ Республикэм и Правительствэ и Тхьаматэ иапэрэ гуадзэу агъэнэфагъ, 1995-рэ илъэсым щегъэжьагъэу Адыгэ Республикэм и Премьер-министрэу щытыгъ.
1997-рэ илъэсым Николай Гаврил ыкъор Урысые Федерацием и Гупчэ банк Адыгэ РеспубликэмкIэ и Лъэпкъ банк итхьаматэу агъэнэфагъ. Пенсием окIофэ, 2011-рэ илъэсым игъэтхапэ нэс, ащ Iоф щишIагъ.
Николай Гаврил ыкъор Адыгеим ихэбзэгъэуцу, игъэцэкIэкIо хабзэ икъулыкъухэм язэхэщэн чанэу хэлэжьагъ, мэкъу-мэщым, къыдэгъэкIыжьыным, социальнэ лъэныкъом язегъэушъомбгъункIэ, республикэм исоциальнэ-экономикэ хэхъоныгъэкIэ бэ ышIагъэр.
Ар сыдигъуи цIыф къызэрыкIоу, гупцIанэу, гукIэгъу­лэу щытыгъ. Сыд фэдэрэ IэнатIэ зыIоти, пшъэ­дэкIыжьышхо зэрихьырэр къызыгурыIорэ, куоу гупшысэрэ пэщагъ. НэмыкIхэм пхъашэу ар афыщытыгъ, ышъхьэкIи зыфигъэкIотэжьыщтыгъэп.
ИIоф хэшIыкIышхо зэрэфыриIагъэм, илъэсыбэрэ хьалэлэу зэрэлэжьагъэм афэшI Николай Гаврил ­ыкъом орденэу «Хэгъэгум ыпашъхьэ гъэхъагъэу щыриIэхэм афэшI» зыфиIоу я IV-рэ шъуашэ зиIэр, «Щытхъум и Тамыгъ» зыфиIорэ орденитIу, медальхэу «Адыгеим и Щытхъузехь», «За трудовую доблесть», «За доблестный труд в ознаменование 100-летия со дня рождения В.И. Ленина» зыфиIохэрэр къыфагъэшъошагъэх. Н.Г. Педан Абинскэ районымрэ станицэу Джаджэрэ яцIыф гъэшIуагъэу щытыгъ. Адыгэ Республикэм и Къэралыгъо Совет – Хасэм и Щытхъу тамыгъэу «Закон. Пшъэрылъ. ЦIыфыгъ» зыфиIорэри ащ къыфагъэ­шъошэгъагъ.
IэпэIэсэныгъэ инрэ цIыфыгъэшхорэ зыхэлъ пащэу ар щытыгъ, иIофшIэгъухэмрэ республикэм исхэмрэ лъытэныгъэ инрэ осэшхорэ къыфашIыщтыгъ.
Пэщэ чаныр, цIыф шIагъор дунаим зэрехыжьыгъэр АдыгеимкIи, ар зышIэщтыгъэ пстэухэмкIи чIэнэгъэшхо хъугъэ.
Зидунай зыхъожьыгъэм игупсэхэмрэ иIахьылхэмрэ тафэтхьаусыхэ, якъин адэтэгощы. Педан Николай Гаврил ыкъор егъашIи гукъэкIыжь дахэкIэ тыгу ­
илъыщт.
М. Къ. КъумпIыл, В. И. Нарожный, А. А. Джарым, А. К. ТхьакIущын, И. Ш. МэщбашI, А. А. КIэращ, В. П. Свеженец, Н. М. ГъукIэлI, А. А. Къуаджэ,Е. И. Салов, А. Хъ. ЛIыIужъу, Г. А. Митрофанов, А. Н. Таранухин