Урысыем и Къыблэ шъолъыр ипарламентхэм я Ассоциацие зичэзыу я XLIII-рэ Конференцие иIагъ. Мызыгъэгум ар къалэу Волгоград щыкIуагъ.

Адыгеим икIыгъэ лIыкIо купэу ащ хэлэжьагъэм хэтыгъэх АР-м и Къэралыгъо Совет — Хасэм и Тхьаматэу Владимир Нарожнэр, ащ игуадзэу Цэй Эдуард, депутатхэу Александр Лобода, Мыгу Адам ыкIи Наталья Широковар. Къыблэ ыкIи Темыр Кавказ федеральнэ шъолъырхэм, Абхъаз Республикэм яхэбзэихъухьэ къулыкъу 17-мэ ялIыкIохэм ягъусэхэу ахэр непэ зигъо Iоф 80-м ехъумэ атегущыIагъэх. Ахэм ащыщэу 6-р Адыгеим и Парламент ыгъэхьазырыгъэ джэпсалъэх.
Конференцием къыдыхэлъытагъэу Ассоциацием икомитетхэр зэхэсыгъэх, повесткэм ипэшIорыгъэшъ проектхэм атегущыIагъэх. Ащ дакIоу Къыблэ шъо­лъыр парламентхэм я Ассоциацие и Совет хэбзэихъухьэ къулыкъухэм япащэу хэтхэр яеплъыкIэхэмкIэ зэдэгощагъэх. Ахэм ауж Пленарнэ зэхэсыгъом зэпстэури щызэфахьысыжьыгъ.

Адыгеим и Парламент илIыкIохэм лъэныкъо зэфэшъхьафхэм афэгъэхьы­гъэу кIэщакIо зыфэхъугъэхэр къызщыраIотыкIырэ джэпсалъэхэр къыхалъхьагъэх. Ахэр зыпари зылъымыплъэрэ псэушъхьэ­хэр зыщаIыгъхэм шапхъэу ащагъэцэкIэн фаехэм, страхование зышIыгъэхэм япенсиехэр зэрэзэIукIэрэм ылъэныкъокIэ яфитыныгъэхэм, хъызмэтшIэпIэ цIыкIу­хэм федеральнэ къэбар системэхэм зызэращатхыщтыр нахь къызэрыкIо шIыгъэным, УФ-м МэзхэмкIэ икодекс гъэтэрэзыжьынхэр фэшIыгъэнхэм, дзэкIолIэу фэхыгъэм исабыеу зыныбжь имыкъугъэхэм ахъщэу ясчетхэм къарагъахьэрэр зэрищыкIагъэм тетэу гъэфедэгъэнхэм, «Урысые мэкъу­мэщ Гупчэм» иаккредитацие афэгъэхьыгъэх.
Конференцием къыдыхэлъытагъэу дзэкIолIхэр социальнэу щыIэныгъэм хэгъэгъозэжьыгъэнхэмкIэ, ветеранхэм яIофхэмкIэ ыкIи патриотическэ пIуныгъэм­кIэ Комиссиеу Адыгеим Парламент хэбзэихъухьанымкIэ и Комитет ипащэ игуадзэу Мыгу Адамэ зыхэтыр зэхэсыгъ. Тидепутат игъусэу ащ щыIагъэх «Урысыем илIыхъужъхэр» зыфиIорэ программэм хэлажьэхэу, Къэралыгъо Советыр — Хасэр зигъэсэкIохэ Алексей Бардюгрэ Илья Донцовымрэ.
Мыхэм Комиссиер хэплъэнэу къызэдыхалъхьагъ хэушъхьафыкIыгъэ дзэ операцием хэкIодагъэхэм ясабыеу зыныбжь имыкъугъэхэм ахъщэу къафатIупщырэр зэрищыкIагъэм тетэу гъэфедэгъэ­ным фэгъэхьыгъэ джэпсалъэр. Ащ фэдэ кIэлэцIыкIухэм нахьыжъэу алъыплъэрэр наркологическэ е психоневрологическэ сымэджэщхэм яучетхэм ащыщ хэтэу е ипсэукIэ, изекIуакIэхэр мытэрэзхэу, ахъщэр кIэлэцIыкIухэм ящыкIагъэхэм апэIуимыгъахьэу, ежь зэрэфаеу ыгъэфедэу бэрэ къыхэкIы. Ащ фэгъэхьыгъэ тхьаусыхэ тхылъ цIыфхэм яфитыныгъэхэр къэухъумэгъэнхэмкIэ АР-м и Уполномоченнэ е депутатхэм мызэу, мытIоу къа­рахьылIагъ. Ары джэпсалъэр аштэным ушъхьагъу фэхъугъэр.
Адыгеим идепутатхэм УФ-м зыкъэу­хъумэжьынымкIэ и Министерствэрэ хэбзэ къулыкъухэмрэ дзэкIолIэу хэкIодагъэм икIэлэцIыкIухэм апае къатIупщырэ ахъщэр зэрагъэхьащт хэушъхьафыкIыгъэ счетхэр къафызэIухыгъэнхэр, сабый ибэхэм е лъыплъэн имыIэу къэнагъэхэм афэгъэзэгъэ къулыкъухэм яшIэ хэмылъэу нахьыжъхэм ар агъэфедэн фимытхэу шIыгъэныр нахь тэрэзэу алъы­тэ. Ащ фэгъэхьыгъэ гъэтэрэзыжьынхэр федеральнэ хэбзэгъэуцугъэм фэшIы­гъэнхэу къызщиIорэ джэпсалъэ агъэхьазырыгъ.
АР-м и Къэралыгъо Совет — Хасэм ыгъэхьазырыгъэ джэпсалъэхэм зэкIэми Урысыем и Къыблэ шъолъыр ипарламентхэм я Ассоциацие хэтхэм къадырагъэштагъ ыкIи федеральнэ Гупчэм фэгъэхьыгъэнхэ фаеу алъытагъ.
— Мы Конференциер анахь Iофыгъуа­бэм Ассоциациер зыщытегущыIагъэхэм ащыщ. Федеральнэ ыкIи шъолъыр хэбзэгъэуцугъэхэр гъэкIэжьыгъэнхэм, уахътэм къыздихьырэ зэхъокIыныгъэхэм адиштэу гъэпсыгъэнхэм апае пэшIорыгъэшъэу депутатхэм Iофышхо зэрэзэдашIагъэм ар ишыхьат. Ащ фэдэ зэдэлэжьэныгъэр шъолъырхэм, къэралыгъом зэрэщытэу хэхъоныгъэхэр ашIынхэм, экономикэмрэ социальнэ лъэныкъомрэ гъэкIэжьыгъэнхэм, цIыфхэм ящыIакIэ нахьышIу хъуным афэIорышIэ, — къыIуагъ АР-м и Къэралыгъо Совет — Хасэм и Тхьаматэу Владимир Нарожнэм зэпстэури къызэфихьысыжьзэ.
Зыгъэхьазырыгъэр ХЪУТ Нэфсэт.