Мы мафэхэм Адыгэкъалэ дэт гурыт еджапIэу N 2-м мэфэкI шIыкIэм тетэу арт-объект къыщызэIуахыгъ. Проектэу «Творческая перезагрузка школьных пространств «Окно в культуру» зыфиIорэм ар къыдыхэлъытагъ.

Арт-объектыр квадрат метрэ 60 мэхъу. Тарихъ мэхьанэ зиIэ сюжет пчъагъэ къыдыхэлъытагъ. Композицием игупчэ адыгэ цые зыщыгъ лIыжъыр ит, заом кIорэ шыуищыр ащ егъэкIуатэ. Ахэр Берлин зэрэнэсыгъэхэр сурэтым пхырыщыгъ, зым «ТекIоныгъ. 1945-рэ» тетхагъ, ятIонэрэм — танкистыр лезгинкэ къэшъо, ящэнэрэм быракъ плъыжьыр къыIэтэу тет.
СурэтхэмкIэ зэнэкъокъум текIоныгъэ къыщыдэзыхыгъэ ЗекIогъу Камилэрэ Нэхэе Анзоррэ яIофшIагъэхэм эскизхэр атехыгъэх.
ЕджапIэр арт-объектым къызэригъэ­дэхагъэм имызакъоу, тарихъ мэхьэнэ ин иI, тихэгъэгу къаухъумэзэ лIыхъужъныгъэу нахьыжъхэм зэрахьагъэр къыщыгъэлъэгъуагъ.
Урысыем ыкIи Адыгэ Республикэм ягимнхэмкIэ мэфэкI Iофтхьабзэр ауб­лагъ. Къэзэрэугъоигъэхэм шIуфэс сэлам еджапIэм ипащэ игуадзэ къарихыгъ ыкIи проектым ипащэу Карен Каракьян рэзэныгъэ тхылъ ритыгъ.
— Мамырныгъэ щыIакIэр къытфэзыхьыгъэхэм шъхьэ­кIафэ зэрафэтшIырэр мы Iоф­шIэным къеушыхьаты. Искусствэм иамалхэмкIэ нахьыжъхэм лIы­хъужъныгъэу зэрахьагъэр зэрэтщымы­гъупшэрэр къэтэгъэ­лъагъо, — къыIуагъ Карен.
Нэужым волонтерэу IэпыIэгъу къы­фэхъугъэхэм зэрафэразэр къыхигъэ­щыгъ ыкIи сурэтхэмкIэ зэнэкъокъум текIоныгъэ къыщыдэзыхыгъэхэм шIухьафтынхэр аритыгъэх.
МэфэкI Iофтхьабзэм ыуж кIэлэ­цIыкIухэм ясурэтхэм якъэгъэлъэгъон рагъэблэгъагъэх. КIэлэеджакIохэм яIоф­шIэнхэм афэгъэхьыгъэу хьакIэхэм къафаIотагъ. Хэгъэгу зэошхом фэ­гъэхьыгъэ чIыпIэу еджапIэм иIэми рагъэблэгъагъэх.