Адыгэхэм я Мафэ Дунэе Адыгэ Хасэм мэфэкI Iофтхьэбзэ заулэ Налщык щызэхищагъ. ДАХ-м и Хэсашъхьэ изэхэсыгъо хэлэжьагъэх Къэбэртэе-Бэлъкъарым, Къэрэщэе-Черкесым, Адыгеим ялIыкIохэу ащ хэтхэр, УФ-м IофшIэнымкIэ и ЛIыхъужъэу, лъэпкъ тхэкIошхоу МэщбэшIэ Исхьакъ, Тыркуем, Иорданием, Израиль, Европэм хэхьэрэ къэралыгъохэм, Ставропольскэ ыкIи Краснодарскэ крайхэм къарыкIыгъэхэр.

Хасэм игъэцэкIэкIо куп хэтхэр зыдэ­лэжьэгъэхэ Iофыгъохэм язэфэхьысыжьхэм ДАХ-м и Тхьаматэу Сэхъурэкъо Хьаути зэхэсыгъом къекIолIагъэхэр щигъэгъозагъэх. Лъэпкъ шэн-хабзэхэм якъэухъумэнкIэ, непэрэ лъэхъаным ахэр унагъохэм зэращызэрахьэхэрэм ыкIи чIыпIэхэм ащызэхэщэгъэ хасэхэм а лъэныкъомкIэ яшIуагъэу къагъакIорэм афэгъэхьыгъэу зэхэсыгъом къыщыгущыIагъэх хы ШIуцIэ Iушъом щыпсэурэ шапсыгъэхэм я Адыгэ Хасэ итхьаматэу КIакIыхъу Мэджыдэ, Европэм щызэхэщэгъэ Адыгэ хасэхэм ятхьаматэу Вэ­рэкъо Зати, Ставрополь щызэхэщэгъэ «Адыгэ шэн-хабзэхэм яIофшIапIэ» ипащэу Шыбзыхъу Юрэ, нэмыкIхэри.
ДАХ-м игъэцэкIэкIо куп илIыкIохэу мыгъэ Тыркуем щыIагъэх Адыгэ Респуб­ликэм и Адыгэ Хасэ итхьаматэу ЛIымыщэкъо Рэмэзанрэ Хэсашъхьэм хэтэу, Къэралыгъо телерадиокомпаниеу «Адыгеим» ижурналистэу ГъукIэлI Сусанэрэ. Тыркуем ис тилъэпкъэгъухэм адыряIэгъэ зэIукIэгъухэм язэфэхьысыжьхэр зэхэсыгъом къыщашIыгъэх. Къэбэртэе-Бэлъ­къар Республикэм и Къэралыгъо университет тилъэпкъэгъоу щеджэхэрэм, ахэм яеджэн зэрэлъагъэкIуатэрэм, япсэукIэ зыфэдэм, IэкIыб къэралхэм арыс тилъэпкъэгъухэм зэпхыныгъэу адыряIэхэм гъунэ зэрэлъафырэм Сэхъу­рэкъо Хьаути къатегущыIагъ.
Джащ фэдэу «Урысыемрэ Тыркуемрэ: дунэе зэфыщытыкIэхэмрэ геополитикэ ухъумэнымрэ – 2025-рэ» зыфиIорэ Дунэе шIэныгъэ конференциер Къэбэр­тэе-Бэлъкъар университетым Iоныгъом и 19-м ыкIи и 20-м щыкIуагъ. ДАХ-мрэ Дипломатие дэIэпыIэнымкIэ фондэу Горчаковым ыцIэ зыхьырэмрэ ащ кIэщакIо фэхъугъэх. Къэбэртэе-Бэлъкъар Республикэм ипащэхэр, ДАХ-м хэтхэр, УФ-м IофшIэнымкIэ и ЛIыхъужъэу Мэщ­бэшIэ Исхьакъ, УФ-м и Къэралыгъо Думэ идепутатэу, СНГ-м иIофхэмкIэ, евразие къэралыгъохэм язэкъотныгъэкIэ, тичIыпIэгъухэм адыряIэ зэпхыныгъэхэмкIэ комитетым ипащэ иапэрэ гуадзэу Константин Затулиныр, УФ-м IэкIыб къэрал IофхэмкIэ и Министерствэ и ЛIыкIо гъэIорышIапIэ ипащэу Сергей Нюппэ, Анкара, Истамбыл къарыкIыгъэ шIэныгъэлэжьхэр конференцием иIоф­шIэн хэлэжьагъэхэм ащыщых.
2025-рэ илъэсым МэщбэшIэ Исхьакъ ыныбжь илъэс 95-рэ зэрэхъугъэм конференцием хэлажьэхэрэр Сэхъурэкъо Хьаути щигъэгъозагъэх. ДАХ-м иунашъо­кIэ 2025-р МэщбэшIэ Исхьакъ иилъэсэу зэрагъэнэфагъэр, ащ итворчествэ фэгъэхьыгъэ зэIукIэхэр зэкъош шъолъырхэм зэращырагъэкIокIыхэрэр ащ къыIуагъ. Москва къикIыгъэ хьакIэхэмрэ ДАХ-м итхьаматэрэ адыгэ кIакIор, адыгэ паIор ыкIи шъхьарыхъоныр шIухьафтынэу МэщбэшIэ Исхьакъ ратыгъ, тхэкIошхор агъэшIуагъ. Ащ фэдэу къызэрэпэгъокIыгъэхэр тхакIом лъэшэу игопагъ, адыгэ лъэпкъым тапэкIэ зиужьыжьынэу, лъэпкъ Iофыгъо дахэхэр зэшIохыгъэ хъунхэу пстэуми афиIуагъ.
Къэралыгъо зэфэшъхьафхэм къарыкIыгъэ лIыкIохэр, лъэпкъ шэн-хэбзэ зэфэмыдэхэр зезыхьэрэ цIыфхэр конференцием зэрэзэрищэлIагъэхэм мэхьанэшхо иIэу, зэдэлэжьэныгъэм илъэмыдж ащ ыгъэпытэу Сэхъурэкъо Хьаути къызэфихьысыжьыгъ.
Музыкэм итеатрэу Налщык дэтым адыгэхэм я Мафэ фэгъэхьыгъэ мэфэкI зэхахьэр щылъагъэкIотагъ. Адыгэ, Къэ­бэртэе-Бэлъкъар, Къэрэщэе-Черкес республикэхэм ыкIи Абхъазым ялъэпкъ тхакIоу, УФ-м IофшIэнымкIэ и ЛIыхъу­жъэу МэщбэшIэ Исхьакъ игъэхъагъэхэм уасэ къафишIэу Сэхъурэкъо Хьаути шIуфэс гущыIэхэр джыри фигъэзагъэх. Залым чIэсыгъэ цIыфхэр къэтэджыгъэх, щытхэу тхэкIошхом Iэгу фытеуагъэх. Нэужым Къэбэртэе-Бэлъкъар Респуб­ликэм иIэпэIасэхэм концерт къатыгъ.

НэкIэпыджэ
Замир.
АР-м ыкIи КъБР-м язаслуженнэ журналист.