Адыгэ Республикэм и Театральнэ зэхахьэ мы мазэм зичэзыу IофшIэгъу уахътэр ыублэщт. Творческэ гухэлъэу яIэхэм ягугъу къышIыгъ Театральнэ зэхахьэм ихудожественнэ пащэу Ацумыжъ Рустам.

Ащ къызэриIуагъэмкIэ, мы илъэсым Александр Пушкиным ыцIэкIэ щыт Урыс Къэралыгъо драматическэ театрэм ия 90-рэ илъэс хигъэунэфы­кIыщт. МэфэкI илъэсыр «Любовь и голуби» зыфиIорэ къэгъэлъэгъонымкIэ ащ ыуб­лэщт. МэфитIо зэкIэлъыкIоу, мы мазэм и 24 — 25-м ащ лъэтегъэуцо иIэщт.
— Зэдэтштагъэу спектаклыкIэхэр мэфитIурэ къэдгъэлъа­гъохэзэ тшIыщт. Урыс Къэралыгъо драматическэ театрэр пшысакIэм дэлажьэ. Ащ къыкIэлъыкIощт илъэсыкIэу къэбла­гъэрэм изыфэгъэхьазырын. Ащ Урыс ыкIи Лъэпкъ театрэхэр зэгъусэхэу зыфэдгъэхьазырыщт. Мыгъэ пщысэу «Золушкэр» дгъэуцущт, — къыIуагъ Ацумыжъ Рустам.
АР-м и Лъэпкъ театрэ мыгъэ я 99-рэ IофшIэгъу илъэсым пэгъокIыщт. Къэгъэ­лъэгъонхэр зикIасэхэм апае спектаклэ зэфэшъхьафхэр ащи егъэхьазырых. Бэ­хэм якIасэ хъугъэ театрэм идышъэ фонд хэхьэгъэ къэгъэлъэгъонхэм ащыщхэри икIэрыкIэу агъэуцужьыщтых. Ахэм ащыщэу «Тыкъэсыжьыгъ» зыфиIорэр театрэм иIофшIэгъу лъэхъаныкIэ хэтыщт.
— Тыздэлэжьэн IофшIэн гъэшIэгъонхэр, романхэр бэ дэдэу тиIэх. Джыдэдэм МэщбэшIэ Исхьакъ ироманхэм тадэлажьэ, инсценировкэхэр къытфашIы. Ахэр къэхьазырхэмэ, адыгабзэкIи урысыбзэкIи дгъэуцущтых. Нахь IэшIэх къытщыхъущт адыгабзэкIэ зэтыдзэкIыжьмэ. НыбжьыкIэхэр МэщбэшIэ Исхьакъ итворчествэ пэблагъэ тшIыхэ, лъэпкъым ицIыфхэу, тикультурэу, тичIыналъэу ар зыфэтхагъэхэм, зыфэусагъэхэм ащ ынэкIэ ядгъэплъыхэ тшIо­игъу. Илъэсыбэрэ итхыгъэхэмкIэ лъэпкъым фэлэжьагъ. Ащ ихъи­шъэ дунаим щызэлъаригъэшIагъ. Урыс драматическэ театрэм мы илъэсым классикэр нахьыбэу ирепертуар хэдгъэхьащт. ТхэкIо цIэрыIохэу Чеховым, Гоголым, Пушкиным ятхыгъэхэр ащ хэтыщтых, — къыIуагъ театрэм ихудожественнэ пащэ.
КъэгъэлъэгъоныкIэхэм анэмыкIэу Урысыем итеатрэхэм я Союз зылажьэ­рэр илъэси 150-рэ зэрэхъурэм фэгъэ­хьыгъэу творческэ зэIукIэгъухэр театрэр зикIасэхэм афызэхащэщтых. Чъэпы­огъум и 2-м щегъэжьагъэу и 5-м нэс кIэлэцIыкIухэм апае «Театральное Зазеркалье» зыфиIорэ фестивалыр кIощт. Рес­публикэм имызакъоу, къэралыгъом ичIыпIэ зэфэшъхьафхэм ятеатрэхэри ащ хэлэжьэщтых.
Джащ фэдэу ныбжьыкIэхэм яшIэныгъэ хэгъэхъогъэным фэIорышIэщт квест-къэ­гъэлъэгъонэу «Пушкиным инароднэ Ун» зыфиIорэр кIэу зыдэлэжьэщтхэм ащыщ. Ащ нэмыкIэу, театрэм дэкIыгъо къэгъэ­лъэгъонхэр зэхищэнхэр имурад. Усэхэм якъеджэн фэгъэхьыгъэ пчыхьэзэхахьэхэри лъагъэкIотэщтых.
Адыгеим и Театральнэ зэхахьэ шэпхъэшIухэм адиштэу зэрэлэжьэщтыр пресс-зэIукIэм къыщаIотагъ. Къэбар жъугъэм иамалхэм ялIыкIохэм пресс-зэ­IукIэм упчIабэ къыщатыгъ, ахэм яджэуапхэри игъэкIотыгъэу журналистхэм агъотыжьыгъ.
Лъэпшъыкъо Фатим.