Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм «Адыгэ хьакIэщыр лъэпкъ хабзэм ылъапс» зыфиIорэ научнэ-практическэ семинар зэхищагъ. Адыгэ Рес­публикэм культурэмкIэ и Министерствэ, культурэм иунэхэм япащэхэр, шIэныгъэлэжьхэр зэхахьэм хэлэжьагъэх.

ЗэIукIэгъум Iофыгъоу къыщаIэтыгъэ­хэм анахь шъхьаIэхэм ащыщых адыгабзэм икъэухъумэн ыкIи изегъэушъомбгъун япхыгъэхэр, хьакIэщым ныбжьыкIэхэр адыгэ хабзэм щыфэбгъэсэн зэрэплъэкIыщтыр.
Iофтхьабзэр къызэIуихыгъ институтым ипащэу ЛIыIужъу Адам.
— Адыгабзэр къэухъумэгъэнымкIэ, зэгъэшIэгъэнымкIэ амалыкIэу щыIэхэр агъэфедэнхэм пае непэ институтым Iофышхо егъэцакIэ: адыгабзэм игъэфедэн иIофыгъохэм хэбзэгъэуцугъэ лъапсэ яIэныр, бзэм изэгъэшIэнкIэ адыгэ общественностым гъусэныгъэ дыряIэныр, еджа­пIэхэм ыкIи курсхэм бзэр ащызэгъэшIэгъэныр, езыгъэджэщтхэр гъэ­хьазырыгъэнхэр, культурэмкIэ, къэбарлъыгъэIэс амалхэмкIэ ыкIи социальнэ хъытыухэмкIэ нахь игъэ­кIотыгъэу бзэм иIофыгъохэр алъыгъэIэсыгъэнхэр.
Iэнэ хъураехэр, бзэхэм язэгъэшIэнкIэ лагерьхэр, зэнэкъокъухэр зэхэтэщэх. Джы хьакIэщхэм тызэращылэжьэщт амалхэм талъэхъу. НыбжьыкIэхэр адыгэ хабзэм фэ­гъэсэгъэнхэм тыдэлажьэ, — къы­Iуагъ ЛIыIужъу Адам.

АР-м культурэмкIэ иминистрэу Аулъэ Юрэ ипсалъэ къыщыхигъэщыгъ Адыгеим икультурэ кIэн изы Iахьэу щыт адыгабзэм икъэухъумэнрэ ихэхъоныгъэ­рэкIэ IофшIэнэу агъэцакIэрэм мэхьанэшхо зэриIэр.
— Адыгабзэм, лъэпкъ шэн-хабзэм якъэухъумэнкIэ ыкIи язэгъэшIэнкIэ пшъэрылъэу щытхэр зэшIохыгъэнхэм фытегъэпсыхьэгъэ проектхэр министерствэм егъэцIакIэх. АР-м и Концерт зэхахьэ зикIэщэкIо зэIухыгъэ къэгъэлъэгъонхэр АР-м и Къэралыгъо филармоние, «Мэздахэ», къэлэ паркым адэжь мы гъэмафэм бэу ащызэхэтщагъ. Къэралыгъо академическэ ансамблэу «Налмэсым» хореографическэ спектаклэу «Адыгэ нысэщэ джэгу» зыфиIорэр ыгъэу­цугъ, ащ тиныбжьыкIэмэ шэн-хэбзэ дахэу тиIэхэр щядгъэлъэгъугъ. Ащ ыуж «Налмэсым» къэлэдэсхэм шIухьафтын афишIыгъ — къэшъо­кIо купым ыцIэ зыхьырэ псэуалъэм иунэщыдыбжь оркестрэм мэкъамэхэр къыщыригъэIуагъэх. Поэтическэ Iофтхьабзэ бэмышIэу АР-м и Театральнэ зэхахьэ зэхищагъ. ТапэкIи тигъэхъагъэхэм ахэдгъэ­хъощт, — къыIуагъ Аулъэ Юрэ.
Iофтхьабзэм хэлэжьагъ филологие шIэныгъэхэмкIэ докторэу, институтым иIорIотэ отдел иIофышIэ шъхьаIэу Къуе­къо Асфар. «ХьакIэщымрэ адыгэ хабзэм­рэ» зыфиIорэ докладыр ащ къышIыгъ.
— ХьакIэщыр — цIыф зэхэхьапI, хъяр IотапI, ныбжьыкIэ гъэсапI, цIыф зэфыщытыкIэхэм якъэгъэлъэгъуапI, лъэпкъым шIоу ылэжьырэр зэрихьылIэрэ чIыпI. Адыгэу укъэ­хъун закъом къикIырэп уадыгэнэу, адыгабзэр пшIэн, адыгагъэр зепхьан фае. НыбжьыкIэхэр ары неущырэ мафэр зыIэ илъыр, ахэм куоу тадэлэжьэн фае, — хигъэунэфыкIыгъ Къуекъо Асфар.
Институтым IорIуатэмкIэ иотдел иIофышIэу Нэгэрэкъо Казбек пэсэрэ хьа­кIэщым къытегущыIагъ. Филологие шIэныгъэхэмкIэ кандидатэу, институтым инаучнэ IофышIэу Нэхэе Саидэ «Орэдым ихьакIэщ» игъэхьазырын пылъ Iофыгъо­хэр къыIотагъ.
Филологие шIэныгъэхэмкIэ докторэу, институтым иIорIотэ отдел ипащэу, Адыгэ Республикэм шIэныгъэхэмкIэ изаслуженнэ IофышIэу Цуекъо Нэфсэт хьакIэщым щызэшIопхын плъэкIышт амалыкIэхэр къекIолIагъэхэм къафиIотагъ.
ЗэхэгущыIэ-зэкIэдэIукIым тетэу, тынчэу научнэ-практическэ семинарыр кIуагъэ.
Лъэпшъыкъо Фатим.