ЩыIэныгъэ гъогу шIагъу ыкIи социальнэ пшъэдэкIыжьышху. ШэхэкIэй щыпсэухэрэм анахьыжъэу, медалэу «Шъачэ иобщественнэ ыкIи иполитическэ щыIакIэ иIахь зэрэхилъхьагъэм фэшI» зыфиIорэр къызфагъэшъошэгъэ Хъущт Заур Дунэкъае ыкъор къуаджэм игумэкIыгъохэм язэшIохын игъашIэм чанэу хэлажьэ, ныбжьыкIэхэм щысэтехыпIэ афэхъу.

Урым-рим бэнэнымкIэ олимпийскэ чемпионэу Хъущт Аслъанбэч апэрэу ШэхэкIэй къызэкIом, иIахьылхэр ащ лъыпытэу къыгъотыгъэх. 2008-рэ илъэсым Пекин щыкIогъэ Гъэмэфэ олимпийскэ джэгунхэм дышъэ медаль къащыдэзыхыгъэ Хъущт Аслъанбэч къоджэдэс нэбгырэ шъэныкъом къехъоу къыпэгъо­кIыгъэмэ иIахьыл-гупсэр къахигъэщын ылъэкIыгъ: «Мыр Хъущт шъыпкъ!» Апэрэу ятэжъ пIашъэхэм ячIыгу олимпийскэ чемпионым ыIапэ щызыубытыгъагъэр ялIакъокIэ анахьыжъэу Хъущт Заур арыгъэ. А зэIукIэгъум бэрэ ежагъэхэу щытыгъэти, къуаджэм щыщхэм ямыза­къоу, пэблэгъэ псэупIэми цIыфхэр къа­рыкIыгъагъэх. ШэхэкIэй щыпсэухэрэм Урысыем ыкIи IэкIыб къэралхэм къарыкIыгъэхэр бэрэ къафэкIох — Тыркуем, Израиль, Шам, Иорданием, Германием, Швейцарием, США-м, джащ фэдэу Абхъазым ыкIи СНГ-м хэхьэрэ къэралыгъохэм ялIыкIохэр, ахэм бэшIагъэу ясэжьыгъэх, ау мыдрэ мафэр анахь къахэщыгъ ыкIи агу къинэжьыгъ.
Хъущтмэ яIахьылэу дунаим щызэлъа­шIагъэр къызщыкIощт мафэм игъэкIотыгъэу зыфагъэхьазырыгъ. Хъущт Заур ищагу Iэнэшхор къыщызэIуахыгъагъ, орэдыр къырагъаIощтыгъ, лъэпкъ ансамблэу «Шапсыгъэм» концерт къытыщтыгъ. ШэхэкIэйхэр хьакIэмэ апэгъо­кIынхэр якIас, ащ ишIыкIи фэIэпэIасэх. Ижъырэ хабзэм тетых, Iанэм ыпшъэкIэ нахьыжъхэр ыкIи къуаджэм щалъытэ­хэрэр щысых, ныбжьыкIэхэр нахь апэчыжьэх.

Хъущт Заур адыгагъэу хэлъым, хьа­кIэхэм зэрапэгъокIырэм икъэбар Шъачэ нахь чыжьэуи Iугъэ, ШэхэкIэй къахэзыгъэщыхэрэм ар ащыщ. Зыгъэпсэфыным епхыгъэ IофшIэным илъэс пчъагъэм пылъыгъ — охътабэм Къэбэртэе-Бэлъкъарым мэкъу-мэщымкIэ и Министерствэ изыгъэпсэфыпIэу «Iошъхьэмафэм» ипэщагъ, ар поселкэу Головинкэм дэжь щагъэпсыгъагъ, икIэрыкIэу кIишIыкIы­жьыгъ пIоми хъун. Я 90-рэ илъэсхэм адыгэ къуаджэхэм лъэпкъ пчыхьэзэхахьэхэр, шоу-программэхэр ащызэхэщэгъэнхэр апэрэу зигукъэкIыгъэр ыкIи игъэцэкIэн ыуж итыгъэр Хъущт Заур. Хы ШIуцIэ Iушъом щыпсэурэ шапсыгъэ­хэр чIыдэлъфэу зэрэщытхэр, ахэм ятарихъ чыжьэу къызэрэщежьэрэр, яшэн-хабзэхэр цIыфхэм ягъэшIэгъэным ар дэлажьэщтыгъ. Джырэ уахътэм Шъа­чэ изекIо картэ ащ фэдэ пчыхьэзэхахьэхэр хэмытынхэр зыми къыпфидэжьыщтэп. ЗекIо Iофым пытэу хэуцуа­гъэх, чIыпIэрысхэми хьакIэхэми шIу ахэр алъэгъугъэх.

Лъэпкъ зекIоным гугъапIэу къыты­хэрэр а лъэхъаным дэгъоу къызгурыIогъэгъэ Хъущт Заур нахь чыжьэу игу­къэкIхэмкIэ ыкIи иIофхэмкIэ лъыкIотагъ, лъэпкъ комплекс ин ыгъэпсыгъ.
Хъущтым икомплекс анахь дэгъоу Шъачэ щалъытэщтыгъ, пащэхэми зекIо IофымкIэ специалистхэми осэшхо къыфашIыщтыгъ. Мызэу, мытIоу ащ дэжь упчIэжьакIо къакIохэу хъугъэ, гъунэгъу республикэхэми къарыкIыщтыгъэх, унэе бизнесым игъэпсынкIэ щысэ тырахыщтыгъ. Iо хэмылъэу, зызфэбгъэсэн щыIагъ.
Хъущтмэ яадыгэ щагу ренэу зэIу­хыгъ — ащ чэщи, мафи Iоф ешIэ. Мыщ лIыкIо купышхомэ, зекIо купмэ ащыпэгъо­кIых. Анахьэу ахэм адэжь къеблагъэ­хэрэр тилъэпкъэгъухэу IэкIыб къэралыгъомэ къарыкIыхэрэр ары.
— Мыщ фэдэ сэ зыми щыслъэ­гъугъэп, — къеIо Истамбыл щыщ Натхъо Джахьфарэу илъэс заулэкIэ узэкIэIэбэжьмэ ащ къеблэгъэгъагъэм. — ЗэкIэмэ анахь лъэшэу сызыгъэгушIуагъэр Iофым екIолIакIэу мыщ щыфыряIэр ары — зэкIэ ашIэрэм акъыл хэлъэу, дахэу, анахь лъэгэпIэ инмэ анэсэу щыгъэпсыгъ. Адыгэмэ якультурэ нэмыкI лъэпкъмэ, Шъачэ къеблэгъа­гъэмэ арэу лъэшэу ашIогъэшIэгъонынэу сшIагъэп, ащ лъэпкъ зэфэшъхьафхэр зэрепхых, ишIогъэшхо къэкIо.
Хъущт Заур ишIушIэ IофхэмкIи зэлъа­шIэ, къуаджэм ыкIи районым илъ гумэкIыгъохэм язэшIохын хэлажьэ, иIахь хелъхьэ. 2014-рэ илъэсым щыIэгъэ Олим­пиадэм илъэхъан хы ШIуцIэ Iу­шъом щыпсэурэ шапсыгъэмэ янахьыжъхэм ягъусэу ар Шъачэ и Олимпийскэ парк къыщызэIуахыгъэгъэ «Адыгэм и Унэ» хьакIэмэ щапэгъокIыщтыгъ, лъэпкъым итарихъ щигъэгъуазэщтыгъэх.
— Лъытэныгъэу Заур Дунэкъае ыкъом цIыфмэ къыфашIырэр тефэ дэд, — къеIуатэ хы ШIуцIэ Iушъом щыпсэурэ шапсы­гъэмэ я Адыгэ Хасэ итхьаматэу КIакIыхъу Мэджыдэ. — Ар ыныбжь закъом паеп, гъэхъа­гъэу ыкIи шIушIэгъэ гъунэнчъэу иIэхэм къахэкIы.
Илъэс заулэкIэ узэкIэIэбэжьмэ, Хъущт Заур ыныбжь нахьыжъыгъо уахътэм зынэсым, медалэу «Шъачэ иобщественнэ ыкIи иполитическэ щыIакIэ иIахь зэрэхилъхьагъэм фэшI» зыфиIорэмкIэ къыхагъэщыгъ. Шъачэ иныдэлъф лъэпкъ пштэмэ, Заур Дунэкъае ыкъор ары ащ фэдэ бгъэхалъхьэ апэрэу къызфагъэшъо­шагъэр.
— ТичIыгогъумэ Хъущт Заур агъэлъапIэ, упчIэжьэгъоу яI, — къыкIегъэтхъы ШэхэкIэй къоджэ псэупIэм иадминистрацие ипащэу Шъыжъ Мурат. — Ар, апэрэмкIэ, Iофым ицIыф, иунэе бизнес хэхъоныгъэу ригъэшIырэ закъомкIэ къэуцурэп, илъэс пчъагъэхэм социальнэ учреждениехэм IэпыIэгъу афэхъу, джащ фэдэу къуаджэм изэтегъэпсыхьанкIэ проектэу щыIэхэр лъегъэкIуатэх, къахэлажьэ. ЦIыфхэм апашъхьэкIэ пшъэдэкIыжь зэрэтхьын фаем Хъущт Заур ищыс, ар тэри, ныбжьыкIэхэми ялъэ­гъохэщ.
Ныбэ Анзор.