АР-м псауныгъэр къэухъумэгъэнымкIэ и Министерствэ общественнэ псауныгъэмкIэ и Гупчэ иIофышIэхэм Мыекъопэ къэралыгъо технологическэ университетым иполитехническэ колледж игуфэкIо медикхэр ягъусэхэу «Пчъэ зэIухыгъэхэм я Мафэ» псауныгъэм и Гупчэ щырагъэкIокIыгъ. Сымаджэм ищынэгъончъагъэ ыкIи псауныгъэм и Гупчэ афэгъэхьыгъэу нахьыбэу ягъэшIэгъэным итхьамафэу Iоныгъом и 15 — 21-м нэс кIуагъэм ар къыдыхэлъытэ­гъагъ.
— Тхьамафэу икIыгъэм псауныгъэм игъэпытэн фэIорышIэрэ Iофтхьабзэхэр IэзапIэхэм, еджапIэхэм ащызэхэтщагъэх. Непэ Гупчэм зипсауныгъэ щязыгъэуплъэ­кIунэу къекIолIэгъэ пстэуми ыпкIэ хэмылъэу лъым хэлъ шъоущыгъур, холес­териныр, лъыдэкIуаер, жьыкъэщэпIэ зэхэтыр игъэкIотыгъэу Iэмэ-псымэ зэфэшъхьафхэмкIэ афауплъэкIугъ, агу скрининг афашIыгъ ыкIи нэкIоцI лъыдэкIуаер афашыгъ. Джащ фэдэу япсауныгъэ зэрэлъыплъэщтхэ шIыкIэ-амалхэр зэрытхэгъэ гукъэгъэкIыжьхэр афагощыгъэх, — къыIуагъ Гупчэм коммуникационнэ ыкIи общественнэ проектхэмкIэ иотдел ипащэу Керим-Заде Джульетэ.
ТигущыIэгъу къызэрэхигъэщыгъэмкIэ, шъоущыгъу уз зиIэ нэбгыриплI «Шъоущыгъу узым иеджапIэ» агъэкIуагъэх.
Iофтхьабзэм хэлэжьагъэхэм ащыщ илъэс 67-рэ зыныбжь Ольга К.
— Сэщ фэдэ ныбжь зиIэхэм япсауныгъэ изытет зэпымыоу лъыплъэнхэу щыт. Ащ къыхэкIэу мыщ фэдэ Iоф­тхьабзэхэр щыIэхэу зызэхэсхыкIэ, сигуапэу сахэлажьэ. Шъоущыгъу узыри сиIэшъ, ащ шъхьафэу улъыплъэн фае, ащкIэ шIэныгъэ икъу зэзгъэгъотынэу еджапIэм сыкIощт, — еIо
Ольгэ.
КъекIолIэгъэ пстэуми уплъэкIунхэр зафашIыхэ нэуж врач-терапевтыр ­яплъыгъ, ищыкIэгъэ Iэзэгъухэр афигъэ­нэфагъэх.
Псауныгъэм нахь лъапIэ хэткIи щыIэп. Ащ изытет тэры нахьыбэрэмкIэ зэпхыгъэр, щыIэныгъэм зекIуакIэу къыщыхэт­хырэр ары. Анахь шъхьаIэр — пэшIорыгъэшъэу псауныгъэм улъыплъэн фае. АщкIэ амалышIух Гупчэм щызэхащэрэ уплъэкIунхэр, диспансеризациер.
Iэшъынэ Сусан.