Урысые экологие Iофтхьабзэу «Зеленая Россия» зыфиIорэм къыдыхэлъытагъэу 2025-рэ илъэсым иIоныгъо мазэ Адыгеим шэмбэт шIыхьафхэр щэкIох.

Ахэм язэхэщэн ыкIи республикэм ичIыпIэхэм якъэбзэныгъэ санитар шап­хъэхэм адиштэу шIыгъэным фэгъэхьыгъэ унашъом АР-м и ЛIышъхьэ кIэтхагъ. Ащ къызэрэдилъытэрэмкIэ, чIыпIэ зыгъэIорышIэжьыпIэхэм Iоныгъо мазэм шIыхьафхэр ащызэхащэнхэ, къэралыгъо хэбзэ къулыкъухэр ахэм ахэлэжьэнхэ фае.
БлэкIыгъэ шэмбэтым шъолъырым ит псэупIэхэм ащыщхэм гъэкъэбзэн Iоф­тхьабзэхэр ащызэхащэгъагъэх. Ахэм ащыщ Тэхъутэмыкъое районым икъоджэ псэупIэхэр.
«Къэбзэныгъэм фэгумэкIырэ цIыфхэу непэрэ шэмбэт шIыхьафхэм ахэлэжьэгъэ пстэуми сафэраз! ТкIуачIэ зэхэлъэу тиурамхэр, паркхэр, зыгъэпсэфыпIэ ыкIи нэмыкI общественнэ чIыпIэхэр дгъэкъэ­бзагъэх, ахэр гоIу тшIыгъэх» — къыщитхыгъ Тэхъутэмыкъое район администрацием ипащэу Шъэо Аскэр ителеграмм нэкIубгъо.
Джащ фэдэу шIыхьаф мафэхэм ямызакъоу, мафэ къэс къэбзэныгъэм Тэхъу­тэмыкъое районым щылъыплъэнхэм пащэр къыфэджагъ.

Шэмбэтэу блэкIыгъэм шIыхьафышхо зыщыкIуагъэхэм ащыщ зэпахырэ узхэм зыщяIэзэхэрэ Адыгэ республикэ сымэджэщыр зыдэщыIэ районэу «ПанорамэкIэ» заджэхэрэр. Мыщ къыхиубытэрэ чIыпIэм щыпсэухэрэр гуфакIоу Жанна Алиевар япащэу зэхахьэхи, псыутIэу цIыфыбэм зызщагъэпсэфырэм ишъолъыр амалэу яIэмкIэ агъэкъэбзагъ. КъэIогъэн фае, къушъхьэтхым тет псыутIэр унагъохэр зэхэтхэу къызэкIуа­лIэхэу, пцэжъые зыщешэхэу щыт чIыпI, мыщ къешIэкIыгъэ чIыопсыр зэрэдахэм дакIоу, хьарзэ фыжь унагъо псым тес. Ау, гухэкI нахь мышIэми, загъэпсэфынэу мы чIыпIэм къакIохэрэм къапыкIыгъэ хэкIыр къыIуагъанэшъ, IокIыжьых.
«Панорамэм» щыпсэухэрэм псыутIэм ынэпкъхэм аIулъ хэкIыр аугъоигъ, чъыг къутэмэ гъугъэхэр гуахыкIыгъэх, лъэмыдж цIыкIоу екIурэм телъ пхъэжъыр тырахи, мыжъо гъэчъыгъэ плитэ тыралъхьагъ. Къыхэзгъэщымэ сшIоигъу нахьыжъхэм зыкъащарамыгъанэу кIэлэцIыкIухэми Iоф зэрэщашIагъэр. Iофтхьабзэр гуфэбагъэ хэлъэу рекIокIыгъ, шъхьадж иунэ илъ шхыныгъохэр къыздихьыгъэх. ЗэдеIэжь IофшIэнхэр заухыхэм, зэхэтIысхьэхи зэдэшхагъэх.
Джащ фэдэу шэмбэт шIыхьафым къе­блэгъагъ народнэ депутатхэм якъэлэ совет идепутатэу мы коимкIэ хадзыгъэ И.В. Морозовыр. Къэбзэныгъэм фэгумэкIырэ цIыфхэм къаугъоигъэ хэкIым иIущын ащ къафызэпигъэфагъ.
— Тирайон зыфэдэщтыр ащ щыпсэурэ цIыфхэм зэрялъытыгъэр къыдгурыIоным мэхьанэ иI. Щысэ зытырахырэ къэбзэ чIыпIэхэм афэдэ хъунэу сыфай тирайон. Мары шъолъэгъу, зэрягъэпсэфыгъо мафэм емылъытыгъэу, унагъохэр зэхэт­хэу Iофтхьабзэм къекIолIагъэх. Мыщ егъэзыгъэ Iоф хэлъыгъэп. Джы гухэлъы­шIоу тиIэхэм ащыщ къэкIощт илъэсым псыутIэм псыгуIанхэр тедгъэтIысхьанхэр ыкIи кIэлэцIыкIу джэгупIэ зыхэт зыгъэ­псэфыпIэу мыщ щытшIыщтым ипроект дгъэхьазырыныр, — хигъэунэфыкIыгъ Жанна Алиевам.
Iэшъынэ Сусан.