Адыгэ Республикэм инахьыжъхэм я Совет хэтхэм лъэшэу агу къеуагъ Адыгэ Республикэм изаслуженнэ псэолъэшIэу Цуекъо Уцужьыкъо Хьисэ ыкъом идунай зэрихъожьыгъэр ыкIи иIахьылхэм, игупсэхэм афэтхьаусыхэх.

Уцужьыкъо 1934-рэ илъэсым Теуцожь районым ит къуаджэу Хьэлъэкъуае къы­щыхъугъ. Гурыт еджапIэм ыуж Новочеркасскэ инженер-мелиоративнэ институтыр къыухыгъ. Адыгеим ипсэолъэшIын хэхъоныгъэхэр зыщишIыгъэхэ илъэсхэм ащ иIофшIэн-гъэшIэ гъогу япхыгъагъ. Мастерэу IофшIэныр ыублэгъагъ, ащ къыкIэлъыкIоу прорабэу, участкэм ипащэу, инженер шъхьаIэу, Адыгэ хэкум игъэцэкIэкIо комитет псэо­лъэшIынымкIэ и ГъэIорышIапIэ итхьаматэ игуадзэу, Мыекъопэ къэлэ гъэцэкIэкIо комитетым итхьаматэ игуадзэу, хъызмэт­шIапIэу «Адыгпромстроим» игъэIорышIакIоу, проектнэ институтым ипащэу лэжьагъэ. Хэкум инароднэ депутатхэм я Совет гъогогъу пчъагъэрэ идепутатэу хадзыгъагъ.
Адыгеим иэкономикэ илъэныкъо пстэуми зэхапшIэу зыкъызыщаIэтыщтыгъэ лъэхъаныгъ ар. Унэ ыкIи промышленнэ псэуалъэхэм, псауныгъэм ­икъэухъумэн, гъэсэныгъэм, культурэм, социальнэ лъэныкъом япхыгъэ псэуалъэ­хэм яшIынкIэ хэхъоныгъэхэр нэрылъэгъугъэх, джащ фэдэу инженер коммуникациехэр агъэпсыщтыгъэх, къэлэ хъызмэтыр зэтырагъэпсыхьэщтыгъ. Iофэу Уцужьыкъо зэшIуихыгъэхэм ябагъэ ­къипIотыкIыным фэшI щысэ заулэ къэтхьымэ икъущт: къати 9-у зэтет апэрэ псэупIэ унэхэр ыкIи микрорайонхэр Мыекъуапэ икъохьэпIэ лъэныкъо щашIыгъагъэх, заводхэу редукторышIыр, точмашыр, станконормалыр, промсвязыр, керамзитышIыр, хьалыгъу гъэжъапIэр, целлюлоз-картонышIыр, кIэпсэшI фаб­рикэр, нэмыкIхэри бэу трестэу ­«Адыгпромстроим» ар зипэщагъэм а лъэхъаным ыгъэуцугъагъ. Цуекъо Уцужьыкъо сэнаущыгъэшхо, теубытэгъэ шэн пытэ зыхэлъыгъэ зэхэщэкIуагъ. Ар игухэлъ ренэу факIощтыгъ, зиIоф хэшIыкIышхо фызиIэ IэпэIэсэ шъыпкъэу ­щытыгъ.
Уцужьыкъо трестым унэе базэ иIэ хъуным лъэшэу ынаIэ тетыгъ. Псэо­лъэшIын материалхэр ыкIи конструкциехэр къэзышIырэ заводыр ыгъэпсыгъ. ГъэIорышIапIэхэр зэхищагъэх: механизациемкIэ, производственнэ-техноло­гическэ комплектациемкIэ, хэушъхьафыкIыгъэ субподряднэ организациехэм ыкIи профтехучилищхэм ахэр афэгъэ­хьыгъагъэх, псэолъэшIыным фытегъэ­псыхьэгъэ специалистхэр ащагъэхьазырыщтыгъэх.
Цуекъо Уцужьыкъо социальнэ псэуа­лъэхэм ягъэпсыни ынаIэ тетыгъ: трестым щылажьэрэмэ апае унэхэр ыкIи кIэлэцIыкIу IыгъыпIэхэр ышIыщтыгъэх. Унагъо пэпчъ игумэкIыгъохэм ащыгъозагъ, иамал къызэрихьэу адэIэпыIэщтыгъ, гукIэгъушхо зыхэлъ цIыфыгъ. ГукъэкI ыкIи гуетыныгъэ зиIэ лэжьакIомэ ишIуа­гъэ аригъэкIыщтыгъ. Ащ ыгъэсэгъэ нэбгырэ бэдэдэ Урысыем ыкIи Адыгеим псэолъэшIынымкIэ язаслуженнэ IофышIэ хъугъэх, лIэужыбэмэ ягъэсэкIуагъ. Ахэм ащыщхэр непэ къызнэсыгъэм псэолъэшIыным щэлажьэх. НэмыкIхэм къахэзыгъэщыщтыгъэ шэнэу ащ хэлъыгъэхэм ащыщых зышъхьамысыжьэу Iоф ышIэныр, Iофым ыкупкI шъыпкъэ зыщигъэгъозэныр ыкIи рихьыжьагъэр кIэухым негъэсыфэ ыуж имыкIыжьыныр. Пэщэныгъэ зыдызэрихьэрэми ащ фэдэ шэнхэр зэрахилъхьащтым пылъыгъ. АщкIэ цIыфхэр, ахэм ягумэкIыгъохэр апэрэ чIыпIэм щыты­гъэх, дэлэжьагъэхэм, рабочхэм ыкIи ветеранхэм шIукIэ агу къэкIыжьы.
Цуекъо Уцужьыкъу Хьисэ ыкъор Адыгэ Республикэм изаслуженнэ псэолъэшI, орденхэу «Знак Почета», «Дружбы народов» зыфиIохэрэр, «В. И. Лениныр къызыхъугъэр илъэси 100 зэрэхъу­гъэм фэшI медаль, Адыгэ Республикэм и Къэралыгъо Совет — Хасэм ишIэжь тамыгъэу «Закон Пшъэрылъ ЦIыфыгъ» зыфиIорэр, къулыкъу бгъэхалъхьэхэр, щытхъу тхылъхэр къыфагъэшъошагъэх.
Ишъхьэгъусэрэ ежьыррэ лъфыгъитIу зэдапIугъ. ИкIалэу Муратэ ятэ игъогу къыхихыгъ, псэолъэшI компаниеу «Марк-Сервисым» ипэщагъ.
Уцужьыкъо иаужырэ мафэхэм анэсэу общественэ IофшIэнхэм ахэлэжьагъ, общественнэ движениеу «Адыгэ Хасэм» инахьыжъхэм я Совет хэтыгъ. Зигъэпсэфынэу зэтIысыжьми, ар псэолъэшIыным хэхъоныгъэ зэришIырэм лъыплъэщтыгъ, адэIэпыIэщтыгъ. Ащ инэгушIуагъэ, ишэн-гъэпсыкIэ тэ, зышIэщтыгъэхэм, гущыIэгъу фэхъущтыгъэхэм, егъашIэм тыгухэм къарынэщт, ишIэжь дгъэлъэ­пIэщт. Тхьэм джэнэт лъапIэ къырет.
Адыгэ Республикэм
инахьыжъхэм я Совет хэтхэр,
иIофшIэгъугъэхэр, иныбджэгъухэр, псэолъэшIыным иветеранхэр.