IэкIэ шIыгъэ нысхъапэхэм якъэгъэлъэгъонэу «Шляпные истории» зыфиIорэр Мыекъуапэ къыщызэIуахыгъ. Тикъалэ имызакъоу, нэмыкI шъолъырхэм арыс IэпэIасэхэм яIэшIагъэхэри ащ къыщагъэлъэгъуагъэх.

IэкIэ шIыгъэ ижъырэ нысхъапэхэр, пэIо зэфэшъхьафхэр цIыфмэ ашIогъэшIэгъоныгъэх. Ахэм афэгъэхьыгъэ къэбар зэфэшъхьафхэр зэрэзэхахыгъэм дакIоу викторинэм хэлэжьагъэх, зыфэехэ паIо­хэр ащыгъхэу сурэтхэр зытырарагъэ­хыгъ. Iофтхьабзэм къекIолIагъэхэм агу рихьыгъэ Iэпэщысэхэр къащэфынхэ амал яIагъ. Нысхъапэхэр шэкIым, тхылъыпIэм, бзыхьафхэм, пхъэм, уарзэм ыкIи нэмыкI­хэм ахэшIыкIыгъэх.
Автоном мысатыу организациеу «Нысхъапэхэм ятарихъ иунэ-музей» зыфиIорэм джэголъэ зэмы­лIэужыгъохэр зэрэщызэгъэуIугъэм имызакъоу, лъэпкъ зэфэшъхьафхэм ятарихъи ахэм нэIуасэ уфашIы.

Къэгъэлъэгъоныр зытегъэпсыхьагъэр Мыекъуапэ икIэрыкIэу щызэхащэжьыгъэ социокультурнэ псэуалъэр цIыф кIуапIэ шIыгъэныр, лъэпкъ зэфэшъхьафхэм якIэн бай нэIуасэ фэшIыгъэнхэр, шэн-хабзэхэр агъэлъапIэу ныбжьыкIэхэр пIугъэнхэр ары.
Проектым кIэщакIо фэхъугъэр психологэу, зекIо псэолъэ цIыкIухэмкIэ эксперт-аудиторэу, лъэпкъ нысхъапэхэр зыугъоеу Галина Яроваямрэ сурэтышIэу, искусствоведэу Урысыем исурэтышIхэм я Ассоциацие хэтэу Евгения Быковамрэ.
— Тинепэрэ къэгъэлъэгъон IэкIэ шIыгъэ ижъырэ нысхъапэхэмрэ пэIо зэфэшъхьафхэмрэ хэхьагъэх, IэшIэгъэ 300 фэдиз мэхъух. Нысхъапэхэм яугъоин сыздэлажьэрэр илъэс пшIыкIутIу фэдиз хъугъэ. ЫужкIэ музей сиIэ хъумэ, къыщызгъэлъэгъонэу шIухьафтын къысфашIыщтыгъэх, аущтэуи къысатыщтыгъэх, сэри нысхъапэхэм яшIыкIэ зэзгъэшIагъ. Ау ахэм яунэ-музей зызэхэсщагъэр бэшIагъэп, илъэситIу фэдизкIэ узэкIэIэбэжьмэ ары, — еIо «Нысхъапэхэм ятарихъ иунэ-музей» зыфиIорэм ипащэу Галина Яроваям.
— Шъыпкъэр пIощтмэ, къэгъэлъэгъоныр гъэшIэгъон дэд. Нысхъапэхэр непэрэ лъэхъаным диштэхэу шIыгъэх, ау ящыгъынхэр япаIохэр ижъырэ шIыкIэм техыгъэх. Ахэр дыгъэх, хъыгъэх, зэхэгъэпкIагъэх, тхылъыпIэм, хъэдэным, пхъэм, бжъэм, уарзэм, нэмыкIхэм ахэшIыкIы­гъэх. Ныбжьэу яIэмкIи зэфэшъхьафых. Шъхьэм­рэ Iэ-лъакъохэмрэ китай фарфорым хэшIыкIыгъэх. Шъуашэу ащыгъхэр IэкIэ дыгъэх. Я 19-рэ лIэшIэгъум иублэгъум ашIыгъагъэх. Тикъалэ мыщ фэдэ культурнэ чIыпIэхэр къызэрэдэуцохэрэм те­гъэгушIо, — къыIуагъ Евгения Быковам.
— Адыгееу тызщыпсэурэм илъэпкъ шэн-хабзэхэр тымыукъохэу непэрэ щыIакIэм къызэрекIущтхэм игъэкIоты­гъэу Iоф дэсэшIэ. Бзылъфыгъэ лъэпкъ паIохэр сэшIых. Непэрэ къэгъэлъэгъоным сиIэшIагъэхэр хэлажьэх. Анахьэу сыгу рихьырэр пэсэрэ лъэхъаным ашIыщтыгъэ пкъы­гъохэр непэрэ мафэхэм зэрадиштэхэрэр ары. Адыгэ Республикэм искусствэхэмкIэ иколледж кIэлэегъаджэу сигъашIэм сыщылэжьагъ, мыгъэ сыкъыIукIыжьыгъэу IэшIагъэхэм зястыгъ, — къыIуагъ АР-м культурэмкIэ изаслуженнэ IофышIэу Ольга Плетневам.
Къэгъэлъэгъоныр Iоныгъом и 30-м нэс зэIухыгъэщт, къекIуалIэхэрэм IэшIагъэу агу рихьыхэрэр ащэфынхэ амал яIэщт.
Лъэпшъыкъо Фатим.