Урысые Iофтхьабз
«Культура для школьников» зыфиIорэ проектымрэ Урысыем ис лъэпкъхэу зипчъагъэкIэ макIэ хъухэрэм якультурнэ форумрэ къадыхэлъытэгъэ урысые Iофтхьабзэу «Тятэжъхэм яшэн-хабзэхэр къэтыухъумэхэзэ» зыфиIорэр Iоныгъом и 26-м рагъэжьэщт.
«Тихэгъэгу щыпсэурэ лъэпкъхэу зипчъагъэкIэ макIэ хъухэрэм якультурэ къэухъумэгъэным сыдигъуи фэмыдэу непэ мэхьанэшхо раты. ТиIофтхьэбзакIэ зытегъэпсыхьагъэр лъэпкъ зэфэшъхьафхэм якультурэ къыткIэхъухьэрэ ныбжьыкIэхэр нэIуасэ фэшIыгъэнхэр ары. Ащ къыхэлажьэ зышIоигъо кIэлэеджакIохэм лъэпкъ цIыкIухэм яшэн-хабзэхэмрэ ятарихърэ нахь куоу зэрагъэшIэн ыкIи ямышIыкIэу ахэр къыраIотыкIын фае», — къыIуагъ статс-секретарэу, культурэмкIэ министрэм игуадзэу Жанна Алексеевам.
Зэнэкъокъур щэу зэтеутыгъэщт. Лъэныкъоу «Живое наследие» зыфиIорэм хэлажьэхэрэм лъэпкъ цIыкIухэм яхабзэхэм афэгъэхьыгъэу ашIэрэр къыраIотыкIын фае. «Наследники мудрости» зыфиIорэ лъэныкъом лъэпкъ цIыкIухэм къахэкIыгъэ кIэлэеджакIохэр хэлэжьэщтых. Якультурэ нэмыкI лъэпкъхэм яехэм зэратекIырэр ахэм къаIотэщт. «Шаги навстречу культуре» зыфиIорэ лъэныкъом хэлажьэ зышIоигъохэм амал яIэщт тихэгъэгу иэтнокультурнэ кIэн икъэухъумэнкIэ лъэпкъ пэпчъ икультурэ мэхьанэу иIэр, лъэпкъ хабзэхэм якъызэтегъэнэнкIэ нэбгырэ пэпчъ ышIэн ылъэкIыщтыр къыраIотыкIынэу.
Iофтхьабзэм хэлажьэ зышIоигъохэм эссе, видеоролик е проект-лъэтегъэуцо агъэхьазырын, ялъэIу тхылъ порталэу «Культурадляшкольников.РФ» зыфиIорэм рагъэхьан фае. 2025-рэ илъэсым шэкIогъум и 4-м нэс лъэIу тхылъхэр аштэщтых.
IофшIэгъэ анахь дэгъуи 100-у эксперт комиссием къыхихыщтхэр 2025-рэ илъэсым ишэкIогъу порталэу «Культурадляшкольников.РФ» зыфиIорэм къырагъэхьащтых.
Проектэу «Культура для школьников» зыфиIорэм изэхэщакIохэр Урысыем культурэмкIэ ыкIи гъэсэныгъэмкIэ иминистерствэхэр, культурэ стратегиехэмкIэ ыкIи проектхэм ягъэцэкIэнкIэ Гупчэр, культурэмкIэ Урысые фондыр ары.
Лъэпкъ цIыкIухэм яапэрэ урысые культурнэ форум 2025-рэ илъэсым иIоныгъо-ишэкIогъу мазэхэм зэхащэщт. Къэли 4-мэ ащыкIощт Iофтхьабзэм культурэмрэ искусствэмрэ яIофышIэхэр, Урысые Федерацием щыпсэурэ лъэпкъ цIыкIухэм народнэ творчествэмкIэ якупхэр, ахэм яобщественнэ организациехэм ялIыкIохэр хэлэжьэщтых. Форумыр Чукотскэ автоном коимкIэ къалэу Анадырь Iоныгъом и 26-м щырагъэжьэщт, чъэпыогъум къалэхэу Красноярскэ, Петрозаводск, шэкIогъум — Тюмень ар щылъагъэкIотэщт.