Тэхъутэмыкъое районым хэгъэгу кIоцI IофхэмкIэ иотдел идежурнэ часть къуаджэу АдыгеякIэм щыпсэурэ бзылъфыгъэу илъэс 34-рэ зыныбжьым зыкъыфигъэзагъ, къызэретыгъуагъэхэмкIэ тхьаусыхэ тхылъ къытхыгъ.

Зэрар зэрахыгъэм къызэриIотагъэмкIэ, мафэ горэм зыщыпсэурэ фэтэрым къызэкIожьым, ахъщэу ыкIи дышъэм хэшIыкIыгъэ хьап-щыпэу ащ илъыгъэхэр зэратыгъугъэхэр къыхигъэщыгъ.
Тыгъон бзэджэшIагъэр зыщызэрахьэгъэ чIыпIэм къэкIогъэ следственнэ купым зэригъэунэфыгъэмкIэ, зэрарыр сомэ миллиониплIым нэсыгъ.
Районым иполицие мазэ фэдизырэ тыгъуакIом икъыхэгъэ­щын ыуж итыгъэх. Джы ар къаубытын алъэкIыгъ. Илъэс 39-рэ зыныбжь хъулъ­фыгъэу Шэуджэн районым щыщым фэшъхьаф тыгъон ыкIи нэмыкI бзэджэшIагъэхэр зэрэзэрихьагъэм пае ыпэкIэ мызэу, мытIоу уголовнэ пшъэдэкIыжь ыхьыгъ.
Полицием иIофышIэхэм зэрагъэунэфыгъэмкIэ, хъулъфыгъэм мы тыгъон бзэджэшIагъэм ишъыпкъэу зыфигъэхьазырыгъагъ. Фэтэрыбэу зэхэт унэм ичIэхьапIэ хэтыгъэ камерэр пихыгъагъ, зэтыгъощтым иунэ IункIыбзи къызIэкIигъэхьэ­гъагъ. ЫшIэщтыр зешIахэм, ащ унашъхьэр къызфигъэфеди нэмыкI пчъэ горэмкIэ унэ зэтетым къычIэкIыжьыгъ.
Хъулъфыгъэр къызаубытым, ытыгъугъэхэм ащыщхэр зыщыпсэурэ унэм къырахыжьыгъэх, адрэхэр ыщэнэу игъо ифагъ.
Урысые Федерацием и Уголовнэ Кодекс ия 158-рэ статья ия 4-рэ Iахь къызэрэдилъытэу, бзэджэшIагъэр зезыхьагъэу къаубытыгъэ хъулъфыгъэм ылъэныкъокIэ уголовнэ Iоф къызэIуахыгъ. Ар изоляторым чIагъэтIысхьагъ, мыщ нэмыкI бзэджэшIагъэхэр зэрихьагъэхэмэ джы полицием еуплъэкIу.