Чъэным и Мафэ ихэгъэунэфыкIын къыдыхэлъытагъэу Мыекъуапэ испортсменхэр хэлэжьагъэх «Кросс нации-2025-рэ» зыфиIорэм.

ЗэхэщакIохэм къызэрэхагъэщырэмкIэ, илъэс къэс зэхащэрэ мы Iофтхьабзэм пшъэрылъ шъхьа­Iэу иIэр цIыфхэм япсауныгъэ агъэпытэным фэщэгъэнхэр, атлетикэ псынкIэм пылъ спортсменхэм анахь чанхэр къахэгъэщыгъэнхэр, спортым, физкультурэм нахьыбэу ахэщэгъэнхэр ары.
Нэбгырэ 50 фэдиз къызэдэ­чъагъ, ахэр Адыгеим имуниципалитетхэм, Краснодар краим, Ростов хэкум къарыкIыгъэх.

Аныбжь елъытыгъэу спортсменхэр купитфэу гощыгъагъэх, ахэм зы километрэ ыкIи километритIу къачъынэу щытыгъ. Iофтхьабзэр стадионэу «Зэкъошныгъэм» щыкIуагъ. Мы мафэхэм зэфэхьысыжьхэр ашIых, ау куп пэпчъ текIоныгъэ къыщыдэзыхыгъэхэм шIухьафтынэу къалэжьыгъэхэр аратыгъэх.