Хабзэр амыукъонымкIэ АР-м и Координационнэ зэIукIэ зэхэсыгъоу иIагъэм бзэджэшIагъэхэм къакIе­гъэчыгъэнымкIэ амалэу зэра­хьэ­хэ­рэм, псэушъхьэ гъорыкIо­хэм цIыфхэр ащыухъумэ­гъэнхэм, ма­шIом мэзхэм закъыщимыштэным гъунэ зэрэлъа­фырэм ыкIи нэмыкI Iофыгъохэм щатегущыIагъэх.

эралыгъо Совет – Хасэм и Тхьаматэу Владимир Нарожнэр, республикэм иминистрэхэм я Кабинет и Тхьаматэу КIэ­рэщэ Анзаур, федеральнэ инспектор шъхьаIэу Сергей Дрокиныр, хэбзэухъумэ­кIо, уплъэкIокIо къулыкъухэм, цIыфхэм ялъыхъункIэ ыкIи якъэгъэнэжьынкIэ къу­лыкъухэм, муниципалитетхэм япащэхэр.
Зэхэсыгъор рагъэжьэным ыпэкIэ Адыгеим и ЛIышъхьэ хэбзэухъумэкIо, уплъэкIокIо къулыкъухэу адыгэ къуаем ифестиваль щынэгъончъэу кIоным фэгъэзэгъагъэхэм «тхьауегъэпсэу» ари­Iуагъ. Муниципалитетхэу, предприятиехэу, культурэм иIофышIэхэу фестиваль программэм изэхэщэн зиIахь хэзышIыхьагъэхэми зэрафэразэр къыхигъэщыгъ.
АР-м хэгъэгу кIоцI IофхэмкIэ и Министерствэ общественнэ рэхьатныгъэм икъэухъумэнкIэ полицием ипащэ игуа­дзэ ипшъэрылъхэр зыгъэцэкIэрэ Пщыдатэкъо Руслъан бзэджэшIагъэхэм къакIегъэчыгъэнымкIэ амалэу зэрахьэхэрэм къатегущыIагъ.
Зэрэхэгъэгоу пштэмэ, Адыгеим иобщественнэ чIыпIэхэм – урамхэм, парк­хэм, скверхэм бзэджэшIагъэхэр мэкIэ дэдэу зэращызэрахьэрэр зэхэсыгъом къыщаIуагъ. Мы лъэныкъомкIэ респуб­ликэм Урысыем ишъолъырхэм азыфагу я 3-рэ чIыпIэр щеубыты. Мэзи 8-м къыкIоцI проценти 8-кIэ нахь макIэу бзэджэшIагъэхэр зэрахьагъэу агъэунэфыгъ. Къэбар-телекоммуникационнэ технологиехэр зыщыгъэфедэгъэ бзэджэшIагъэхэр проценти 7,7-кIэ къеIыхыгъэх. ИнтернеткIэ зэрагъапцIэхэрэм фэгъэ­хьыгъэ Iофэу зэхафыгъэр процент 35,3-кIэ нахьыбэ хъугъэ.

Зыныбжь имыкъугъэхэу бзэджэшIагъэ зезыхьэхэрэм япчъагъэ процент 17-кIэ къеIыхыгъ. Гъогухэм атехъу­хьэрэ тхьамы­кIагъохэм процент 13,5-кIэ къызэракIичыгъэр зэхэсыгъом щыхагъэунэфыкIыгъ.
Росгвардием АР-мкIэ и ГъэIорышIапIэ ипащэ ипшъэ­рылъхэр зыгъэцэкIэрэ Владимир Кущевым къызэрэхигъэщыгъэмкIэ, Росгвардием иIофышIэхэр мыгъэ Iоф­тхьэбзэ 50-мэ ахэлэжьагъэх. Хэгъэгу кIоцI IофхэмкIэ чIыпIэ отделениехэм хабзэр зыукъогъэ нэбгыри 157-рэ аращэлIэгъагъ. НэмыкI хэбзэухъумэкIо къу­лы­къухэм ягъусэхэу бзэджэшIагъэхэр зезыхьагъэкIэ зэгуцэфэхэрэ нэбгырэ 68-рэ къаубытыгъ.
УФ-м и Следственнэ комитет АР-мкIэ иследственнэ гъэIорышIапIэ иотдел ипащэу Дмитрий Жеребцовыр псэушъхьэ гъорыкIохэм гъунэ зэралъафырэм зэхэсыгъом къыщытегущыIагъ. АР-м хэгъэгу кIоцI IофхэмкIэ и Министерствэ къызэритыгъэмкIэ, 2024-рэ илъэсым хьэ гъорыкIохэр гъогогъуи 156-рэ, 2023-рэ илъэсым — гъогогъуи 138-рэ цIыфхэм атебэнагъэхэу агъэунэфыгъ. Мыекъуапэ имэрэу Геннадий Митрофановым къызэритыгъэмкIэ, илъэсыр къызихьагъэм щегъэжьагъэу зыныбжь имыкъугъэ­хэм хьэхэр къазэратебэнагъэхэмкIэ къэлэ проку­ратурэм итхылъ 92-рэ хьыкумым IэкIигъэхьагъ. Адыгеим и ЛIышъхьэ пшъэ­рылъ афишIыгъ нэмыкI шъолъырхэм мы лъэныкъом­кIэ опытэу яIэр къызфагъэфедэзэ, псэушъхьэ гъорыкIохэр Адыгеим исхэм атемыбэнэнхэмкIэ амал тедзэхэр зэрахьанхэу.
Зэхэсыгъом икIэухым машIом мэзхэм закъыщимыштэнымкIэ пэшIорыгъэшъ Iоф­тхьаб­зэхэм къатегущыIагъ АР-м мэзхэмкIэ и ГъэIо­рышIапIэ ипащэу Былымыхьэ Рэщыдэ. Уплъэ­кIун, пэшIорыгъэшъ Iофтхьабзэхэу машIом мэзхэм закъыщимыштэнымкIэ ыкIи ахэм ягъэкIосэжьынкIэ Адыгеим икъулыкъухэм зэрахьэхэрэм ар къащыуцугъ. МашIом зыкъи­мыштэнымкIэ шапхъэхэр зэраукъуа­гъэм епхыгъэу мыгъэ протокол 18 зэхагъэуцуагъ, сакъынхэу гъогогъу 30-рэ афагъэпытагъ. Мы илъэсыр къызихьа­гъэм щегъэжьагъэу машIом зэ мэзым зыкъы­щиштагъэу агъэунэфыгъ, псынкIэуи ар агъэкIосэжьыгъ.
Диспетчерскэ къулыкъухэмрэ машIом мэзхэм закъы­щимыштэным фэгъэзэгъэ къулыкъухэмрэ шIуагъэ къытэу лэжьэнхэм, машIом зыкъимыштэнымкIэ ищыкIэгъэ амал пстэури бэджэндыштэхэм зэрахьанхэм мэхьанэшхо зэриIэр респуб­ликэм и ЛIышъхьэ къыхигъэщыгъ. Мэзхэм апэблагъэу хыпкъыхэм лыгъэ щарамыдзынымкIэ мэзым икъэухъумэн фэгъэзэгъэ къулыкъухэми, цIыфхэми, чIыпIэ зыгъэIорышIэжьынымкIэ къулыкъухэми Iоф зэрэзэдашIэн фаем КъумпIыл Мурат анаIэ тыраригъэ­д­загъ.
Адыгэ Республикэм и ЛIышъхьэ ипресс-къулыкъу къытырэ къэбархэмкIэ ЛIышэ Саныет.