ЩыIэныгъэм чIыпIэ къин ригъэуцуагъэхэм IэпыIэгъу ягъэгъотыгъэнымкIэ гупчэу «Важные вещи» зыфиIорэр Мыекъуапэ мы мафэхэм къыщызэIуахыгъ.

— ТиIофшIэн зедгъэжьагъэр илъэсищым ехъугъ, а уахътэм къыкIоцI нэбгырэ мини 5-м ехъумэ тишIуагъэ ядгъэ­кIыгъ. Джы гупчэ шъхьаф тиIэ зэрэхъу­гъэм лъэшэу тырэгушхо. ЩыIэныгъэм чIыпIэ къин ригъэуцогъэ нэбгырэ пэпчъ къы­тэолIэн, зыфэе пкъыгъуищ ыпкIэ хэмы­лъэу къыхихын ылъэкIыщт. Пшъэ­рылъ шъхьаIэу тиIэр чIыпIэ къин ифагъэхэм зэрямызакъор зэхядгъэшIэныр, IэпыIэгъу ядгъэгъотыныр ары, — къы­Iуагъ гупчэм ипащэу Ирина Дербеневам.
«Важные вещи» зыфиIорэ гупчэр шIушIэ IэпыIэгъу языгъэгъотырэ закъоу щымытэу, социальнэ тучаным зэрэфэдэщтыр бзылъфыгъэм къыхигъэщыгъ. КъекIуалIэхэрэм нэгушIоу апэгъокIыщтых, сабыйхэр зыщыджэгунхэ алъэкIыщт чIыпIи къыдыхэлъытагъ. КъеуалIэхэрэм ежь-ежьырэу зыфэе щыгъынхэр, лъэкъо­пылъхьэхэр къыхахынхэ, ыпкIэ хэмы­лъэу аштэнхэ алъэкIыщт.
Президент грантхэм я Фонд иIэпыIэгъоу псэуалъэр зэтырагъэпсыхьагъ, ищыкIагъэхэр къащэфыгъэх. Джащ фэдэу Мыекъопэ къэлэ администрациер, предпринимательхэр, цIыф къызэрыкIохэр IэпыIэгъу къафэхъугъэх. ШIушIэ проектыр зэхащэнымкIэ зишIуагъэ къэкIуагъэхэм нэужым рэзэныгъэ тхылъхэр пащэм афигъэшъошагъ.
Гупчэм IэпыIэгъу зищыкIэгъэ пенсионерхэр, гъот макIэ зиIэхэр, сабыибэ зэрыс унагъохэр, сэкъатныгъэ зиIэхэр къекIолIэнхэ алъэкIыщт. Ныбжь зэфэшъхьафхэм афытегъэпсыхьэгъэ щыгъын­хэр, лъэкъопылъхьэхэр, джэгуалъэхэр, сабыйхэм апае тхылъхэр чIэлъых.
IэпыIэгъу языгъэкIы зышIоигъохэм апае Мыекъуапэ контейнери 4 дэт, джы гупчэм ыпашъхьи зы къагъэуцугъ.
Лентэ плъыжьыр зэпаупкIыгъ, псэуалъэр зэрэгъэпсыгъэр Iофтхьабзэм къекIолIагъэхэм зэрагъэлъэгъугъ. Мые­къуапэ иурамэу Пролетарскэм тет унэу N 97-м ар чIэт. УпчIэ зиIэхэр телефонэу: 8-918-292-60-03-мкIэ теонхэ алъэкIыщт.
ДЕЛЭКЪО Анет.