Адыгэ къуаем ия XIV-рэ фестивалэу Адыгеим щыкIуагъэм къэмыкIошъугъэхэм ащ фэгъэхьыгъэ къэбарэу дунэе хъытыум, телефонхэм къарагъэхьагъэу алъэгъугъэмкIэ щыгъуазэ ащ хъугъэх, лъэшэу ашIогъэшIэгъоныгъ. Ащ фэдэу мы хъугъэ-шIагъэм уасэ фэзышIыгъэу, зиеплъыкIэхэмкIэ къыддэгощагъэр Къэбэртэе-Бэлъкъар Республикэм илъэпкъ гъэзетэу «Адыгэ псалъэм» ижурналистэу Табыщ Мурат.

— Адыгэ къуаем ифестивалэу Адыгеим щыкIуагъэм сыкъэкIонэу мыхъугъэ­ми, сиIофшIэгъу журналистхэм яхъытыу нэкIубгъохэм къарагъахьэщтыгъэхэмкIэ сыкъылъыплъагъ. Джащ фэдэу НэкIэпыджэ Замирэ, Абидэкъо Люсанэ, Ас­лъаныкъо Мадинэ, ТIэшъу Светланэ, Тэу Замирэ къырагъахьэщтыгъэхэм сшIогъэ­шIэгъонэу сяплъыщтыгъ. Пстэури гъэшIэгъонэу зэрэзэхэщэгъагъэм гу лъыта­гъэтагъ. Нэм ылъэгъурэм узэригъэхъо­псэнэу щытыгъ. Фестивалым сыхэтымэ сшIоигъоу сыкъэхъугъ.
Iофыбэ сиIэти, сыкъэкIонэу хъугъэп. Сяни, сяти, скъошым иунагъуи, тисабыйхэри мэфитIум фестивалым щыIа- гъэх. ЦIыфыбэ къызэIукIэгъагъ. Адыгэ дунаим зыкъызэкIуицIыхыгъ пIонэу, хьа­лэмэтэу рекIокIыгъ. Нэбгырэ мин 70-рэ хэлэжьагъэу къаIожьыгъ. Зэрэхъу­рэмкIэ, Адыгэ хэкум щыпсэурэм ызыны­къо фэдиз фестивалым къекIолIэгъагъ.
Олахьэ, адыгагъэр зыгорэм къыще­жьэнэу щытмэ, ар а чIыпIэр арын фае. КъыбгурэIо ащ иинагъэ, ишIуагъэ, мэхьанэу иIэр зыфэдэр.
Лэжьыгъэшхо гъэзетхэм къарахьылIэ­жьыгъ сиIофшIэгъухэм. «Адыгэ макъэм», «Адыгэ псалъэм», «Черкес хэкум» фестивалыр зэрэрекIокIыгъэм адыгэ дунаир щагъэгъозагъ. ТиадыгабзэкIэ тижурналистхэм къызэраIотэжьыгъэм фэдэу зыми къыIотэжьышъунэп. Ащи мэхьанэшхо иIэу, купкI хэлъэу сэлъытэ. Фестивалыр блэзыгъэкIыгъэхэм къыкIэ­лъыкIорэ чэзыухэм ахэлэжьэшъунхэу фэдэ амалишъэрэ зырэ джыри къаритынэу сэлъаIо. Ащ фэдиз адыгагъэр, адыгабзэр, адыгамэ ащ щызэхэпшIэнэу, щыплъэгъунэу щытыгъ.
Шъхьащэфыжь щыщэу сятэ къошым ыкъом ыкъо цIыкIу ИнтернетымкIэ тызэдэгущыIэзэ къыIогъэ гущыIэм сыгу зыкъыридзагъ:
«Фестивалым сыкIуи сыкъызэкIо­жьым, «Сыдэу дэгъу сызэрэадыгэр!» сIуагъэ. Къуае нахьыбэу сшхын джы. Адыгэ къуае нахьыбэу зысшхырэм, нахьыбэу адыгэ сыхъун», — сабыим изэфэхьысыжь мэхьанэ лъэш иI.
Тызфэпсэурэри, тызфэлажьэрэри ащ фэдэ горэм пай. Алахьым тикIалэхэр къеухъумэх, гъогу зафэ тырегъэуцох. Журналистхэми яIофшIэн къарыу рахьылIагъ. Сызэгупшысагъэр — «Адыгэ псалъэм» щылажьэхэрэмкIэ тызэгъу­сэу адыгэ къуаем изичэзыу фестиваль тыжъугъакIу! Адыгэ журналистхэмкIэ тызэгъусэу тыщыжъугъэлажь! Тхьэм ыIомэ джащ фэдэу хъун!
Табыщ Мурат.